Wp/aeb/مالطا
مالطا (بالمالطي Malta)، راسميا الجمهورية متاع مالطا (بالمالطي Repubblika ta' Malta)، هي بلاد جزرية في جنوب اوروپا، جاية في البحر المتوسط بين سقلية وشمال افريقيا. مالطا تبعد 80 كيلومتر علا اطاليا، 284 كيلومتر علا تونس، و333 كيلومتر علا ليبيا. مساحت مالطا هي 316 كيلومتر مربع، وهي عاشر اصغر بلاد في العالم، اما فيها اكثر من 500000 ساكن، وهي تاسع اكثر بلاد مكتضة سكنيا في العالم. عاصمت مالطا هي ڢاليتا (بالمالطي Valletta). مالطا تابعة للاتحاد الاوروپي. مالطا خذات استقلالها من بريطانيا عام 1964 وولات جمهورية عام 1974. اللغات الراسمية متاع مالطا هم المالطي واللنجليزي، اما في الواقع المالطي كهو هي لغت الشعب، والانجليزي هي لغة راسمية علا خاتر الاحتلال البريطاني. اللغه الاطالية زادا عنها تاثير كبير في مالطا.
اللغة
[edit | edit source]اللغة المالطية قريبة ياسر للتونسي.
المالطي اصلو من لهجة متاع عربي كانو يحكوها العرب في سقلية من وقت الفتحات الاسلامية غاديكا في عام 827 ميلادي حتا القرن 11 وقت طرردو العرب مالجزيرة، اما قعدو يحكيو بها في جزيرة مالطا وبالوقت ولات المالطي.
المالطي تاثر ياسر بالاطالي، وخاصتا اللهجة متاع سقلية. تقريبا نص الكلمات في المالطي اصلها اطالي، و ثلث كهو جاي مالعربي. الباقي من لغات اخرا، خصتا الانجليزي علا خاتر الاحتلال البريطاني.
رغمنو المالطي اصلو مالعربي، هو يتكتب بالالفبات اللاتيني.