Jump to content

Wn/shn/Gantz လွၵ်ႈငိူတ်ႈဝႃႈ ပေႃးဢမ်ႇဝၢင်းၽႅၼ် ၵႃႇၸႃႇ တေထွၼ်ဢွၵ်ႇတီႈ ၸုမ်ႈၽွင်းလူင်ၵၢၼ်သိုၵ်း

Add links
From Wikimedia Incubator
< Wn | shn
Wn > shn > Gantz လွၵ်ႈငိူတ်ႈဝႃႈ ပေႃးဢမ်ႇဝၢင်းၽႅၼ် ၵႃႇၸႃႇ တေထွၼ်ဢွၵ်ႇတီႈ ၸုမ်ႈၽွင်းလူင်ၵၢၼ်သိုၵ်း

ဝၼ်းဢႃးတိတ်ႉ၊ မေႇ 19၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း
မိၵ်ႈမၢႆ လွင်ႈငမ်းယဵၼ် ၼႂ်းၵႄႈ ဢိတ်ႇသရေး လႄႈ ပႃးလဵတ်ႈသတၢႆး
ႁူမ်ႈသၢင်ႈ!
ပႅၼ်ၼီးၵႅၼ်ꩡ် ၽူႈၶဝ်ႈၸုမ်းၽွင်းလူင်ၵၢၼ်သိုၵ်း ဢိတ်ႇသရေး ဢၼ်ပႃး ၽူႈၶဝ်ႈၸုမ်း သၢမ်ၵေႃႉ

မိူဝ်ႈဝၼ်းသဝ်ၼၼ်ႉ ပႅၼ်ၼီးၵႅၼ်ꩡ် ဢၼ်မီး ပၢႆးဝူၼ်ႉၵၢၼ်ပၢႆးမိူင်းၽဵင်ႇပဵင်းၼၼ်ႉ လႆႈလွၵ်ႇငိူတ်ႈဝႃႈ ပေႃးထႅင်ႈ ၼႂ်းၶၢဝ်းတၢင်းသၢမ်ဝူင်ႈတေမႃး သင်ၸိူဝ်ႉ ဢမ်ႇဝၢင်းၽႅၼ်မႂ်ႇ ဢၼ်ၵဵဝ်ႇၵပ်းလူၺ်ႈ ပၢင်တိုၵ်းၵႃႇၸႃႇၼႆၸိုင် မၼ်းတေ ထွၼ်တူဝ်ဢွၵ်ႇၵႃႈတီႈ ၸုမ်းၽွင်းလူင်ၵၢၼ်သိုၵ်း ဢၼ်ၶဝ်ႈပႃး လုၵ်ႈၸုမ်းသၢမ်ၵေႃႉ ၶွင် ဢိတ်ႇသရေးၼၼ်ႉ ဝႃႈၼႆယဝ်ႉ။ ယွၼ်ႉၼၼ်လႄႈ တွၼ်ႈတႃႇ ပႅၼ်ၸမိၼ်ႇ ၼႄႇတၼ်ႇယႃႇႁု ၼႆႉ လႆႈပဵၼ်သၢႆငၢႆ တႃႇလႆႈတိူဝ်းပိုင်ႁိုင်ၼိူဝ် ဢူၺ်းလီမိုဝ်းၶႂႃ တီႈၼႂ်းၸုမ်းလူင်ပွင်ၸိုင်ႈမၼ်းၼၼ်ႉယူႇယဝ်ႉ။

ၵႅၼ်ꩡ် ၼႆႉ လႆႈတၢင်ႇလၢတ်ႈဝႆႉ လၢႆးငၢၼ်း ဢၼ်ၶဝ်ႈပႃးဝႆႉ လွင်ႈတၢင်း ႁူၵ်းၶေႃႈ ၸိူဝ်ႈပဵၼ် တႃႇႁႂ်ႈ ၵူၼ်းၸိူဝ်းထုၵ်ႇၺွပ်းၵႂႃႇၼၼ်ႉ ႁႂ်ႈလွတ်ႈဢွၵ်ႇမႃး၊ တႃႇႁႂ်ႈ လွင်ႈႁႃးမၢတ်ႉသ်ၶဝ် ဢုပ်ႇပိူင်ႇတီႈ ၵႃႇၸႃႇၼၼ်ႉ ႁႂ်ႈသုတ်းသဵင်ႈ၊ တႃႇပိုၼ်ၽၢဝ်ႇ ထုင်ႉၵႃႇၸႃႇတင်းဢၼ် ႁႂ်ႈပဵၼ်တီႈ ဢမ်ႇမီးသိုၵ်း လႄႈ ၶဝ်ႈပႃး တႃႇတင်ႈၸုမ်း ၸတ်းၵၢၼ်ၵူႈမိူင်းမိူင်း ဢၼ်ၵဵဝ်ႇၵပ်းလူၺ်ႈ ၵူၼ်းမိူင်း ၼၼ်ႉယဝ်ႉ။ လိူဝ်သေၼၼ်ႉဢမ်ႇၵႃး မၼ်းလႆႈၵမ်ႉထႅမ်ပႃး လွင်ႈၶတ်းၸႂ် တႃႇႁႂ်ႈမီး လွင်ႈၵပ်းသိုပ်ႇတိတ်းတေႃႇ ပိူင်ၵဝ်ႇၵၼ်တင်း မိူင်းသေႃႇတီႇဢႃႇရေးပီးယႃး ၼႆယဝ်ႉ။ ၵႅၼ်ꩡ်လၢတ်ႈဝႃႈ ဝႆႉလိူၼ်ၸုၼ်ႇ 8 ပဵၼ်လိုၼ်းသုတ်းသေ သင်ၸိူဝ်ႉဝႃႈ ဢမ်ႇၵမ်ႉထႅမ်ၸွမ်း လၢႆးငၢၼ်းမႂ်ႇၼႆ မၼ်းတေထွၼ်တူဝ်ဢွၵ်ႇတီႈ ၸုမ်းလူင်ပွင်ၸိုင်ႈ ဝႃႈၼႆယဝ်ႉ။

မၼ်းလၢတ်ႈဝႃႈ “သင်ၸိူဝ်ႉ တိုဝ်တၼ်သေ တေလိူၵ်ႈသဵၼ်ႈတၢင်း ႁႂ်ႈမိူင်းတင်းမိူင်း လႆႈတူၵ်းႁူၺ်ႈၵႂႃႇၼႆတႄႉ မၼ်းတေလႆႈ ထွၼ်တူဝ်ဢွၵ်ႇတီႈ ၸုမ်းလူင်ပွင်ၸိုင်ႈ“ ဝႃႈၼႆယဝ်ႉ။ ၵႅၼ်ꩡ် ၵေႃႉဢၼ်ပဵၼ်မႃး ၸွမ်ပွင်သိုၵ်းၵေႃႈၸႂ်၊ ၽွင်းလူင်ၵၢၼ်ၵႅတ်ႇၵင်ႈၵေႃႈၸႂ်ႈၼၼ်ႉ မၼ်းပဵၼ် ၵေႃႉၶႄႉၶဵင်ႇၵၢၼ်ပၢႆးမိူင်းၶၢဝ်းယၢဝ်း ၵၼ်တင်း ၼႄႇတၼ်ႇယႃႇႁုသေ တႄႇပဵၼ်ပၢင်တိုၵ်းၵႃႇၸႃႇမႃး မၼ်းလႆႈၶဝ်ႈၼႂ်း ၸုမ်းလူင်ပွင်ၸိုင်ႈႁူမ်ႈပွင်း လႄႈ ၸုမ်းၽွင်းလူင်ၵၢၼ်သိုၵ်း ၵၢၼ်ၵႅတ်ႇၵင်ႈၼၼ်ႉယဝ်ႉ။

သင်ၸိူဝ်ႉဝႃႈ မၼ်းထွၼ်တူဝ်ဢွၵ်ႇၵႂႃႇတီႈၼႂ်း ၸုမ်းလူင်ပွင်ၸိုင်ႈၼႆၸိုင် ၼႄႇတၼ်ႇယႃႇႁုၼႆႉ တေလႅပ်ႈၸမ်ၵၼ်ၵႂႃႇတင်း ၵူၼ်းမိုဝ်းၶႂႃ ဢၼ်မီးၵၢင်ၸႂ်ၶဵင်ႈၶႅင်သေ တီႈၵၢၼ်ငူပ်ႉငိ တႃႇႁႂ်ႈၵူၼ်းထုၵ်ႇၺွပ်းၵႂႃႇ ႁႂ်ႈလွတ်ႈမႃး လႄႈ တႃႇၵိုတ်းတိုၵ်းၼႆႉ မၼ်းတေ တိူဝ်းယၢပ်ႇယဵၼ်းၵႂႃႇ ဝႃႈၼႆယဝ်ႉ။ ၵူၼ်းမိုဝ်းၶႂႃႇ တီႈၼႂ်းလူင်ပွင်ၸိုင်ႈ ဢိတ်ႇသရေးၼၼ်ႉ ၶဝ်ပဵၼ်ၵူၼ်းၸိူဝ်းဢၼ်ၶႂ်ႈႁႂ်ႈသိမ်းဢဝ် ၵႃႇၸႃႇသေ တေႁႂ်ႈၵူၼ်းၸၢဝ်းၵျူးၶဝ် ယူႇသဝ်းၵႂႃႇၼၼ်ႉယဝ်ႉ။

ၽွင်းလူင်ၵၢၼ်ၵႅတ်ႇၵင်ႈ ဢိတ်ႇသရေး ယူဝ်ဢႅၾ်ႉၵႄးလ်လၼ်ႉ ၵေႃႉဢၼ်ပဵၼ် ၽူႈၶဝ်ႈၸုမ်း ၽွင်းလူင်ၵၢၼ်သိုၵ်း ထႅင်ႈၵေႃႉၼိုင်ႈတႄႉၵေႃႈ မိူဝ်ႈပူၼ်ႉမႃးလၢႆလၢႆဝၼ်းၼၼ်ႉ မၼ်းလႆႈလၢတ်ႈဝႃႈ မၼ်းလႆႈတုၵ်းယွၼ်း ၸုမ်းၽွင်းလူင်ၶဝ် တႃႇတႅပ်းတတ်း သၢႆငၢႆ ဝၢႆးသိုၵ်း ဢိၵ်ႇတင်း ပိူင်ဢုပ်ႉပိူင်ႇၵူၼ်းမိူင်း ပႃးလဵတ်ႈသတၢႆး တွၼ်ႈတႃႇ ၵႃႇၸႃႇ ဝႃႈၼႆယဝ်ႉ။ ဢမ်ႇႁိုင်လၢႆဝၼ်း ၽွင်းလူင်ၵၢၼ်ၵႅတ်ႇၵင်ႈဢိတ်ႇသရေး ယူဝ်ဢႅၾ်ႉၵႄးလ်လၼ်ႉ လႆႈမွၵ်ႇလၢတ်ႈမႃး တႅၵ်ႇတႅၵ်ႇလႅင်းလႅင်း ၼၼ်ႉယဝ်ႉ။

သၢႆငၢႆ ၼႄႇတၼ်ႇယႃႇႁု ယၢမ်းလဵဝ်ၼႆႉ ႁဵင်းတဵၵ်း တိူဝ်းမႃးယူႇ ၵူႈၽၢႆႇၵူႈတၢင်းယဝ်ႉ။ ၵူၼ်းၸိူဝ်းမီးၸႂ်ႁၢဝ်ႈႁႅင်း တီႈၼႂ်းၸုမ်းလူင်ပွင်ၸိုင်ႈမၼ်းၼၼ်ႉ ၶႂ်ႈႁႂ်ႈ သၢၼ်ၶတ်းလွင်ႈၵူႈမိူင်းမိူင်းတုၵ်းယွၼ်းသေ ႁႂ်ႈၶဝ်ႈတိုၵ်းဝဵင်းရႃႇၾႃႇ ဢၼ်မီးတီႈ လႅၼ်လိၼ်ဢီးၵျိပ်ႈ တီႈ ၽၢႆႇၸၢၼ်းသုတ်း ၵႃႇၸႃႇၼၼ်ႉသေ ၽဵဝ်ႈမူၺ်ႉပႅတ်ႈ ႁႃးမၢတ်ႉသ်ၶဝ်ၼၼ်ႉယဝ်ႉ။ ၵပ်းၵၢႆႇလူၺ်ႈ လွင်ႈၶဝ်ႈတိုၵ်း ဝဵင်းရႃႇၾႃႇ ဢၼ်ၶိုင်ႈႁူဝ်ၼပ်ႉၵူၼ်း 2.3 လၢၼ်ႉ တီႈၵႃႇၸႃႇ လႆႈသေႃႉယူႇယူႇၼၼ်ႉဢမႄႇရိၵၢၼ်ႇလႄႈ မိူင်းတၢင်ႇၸိူဝ်း လႆႈပၼ်ၽၢင်ႉသေ လႆႈလွၵ်ႇငိူတ်ႈဝႆႉဝႃႈတေယွၼ်ႇယွမ်း လွင်ႈဢၼ်ၵမ်ႉထႅမ်ပၼ် ဢိတ်ႇသရေးယူႇၼၼ်ႉ ဝႃႈၼႆယဝ်ႉ။


ငိူၼ်ႈငဝ်ႈတိုၼ်း

Retrieved from "https://incubator.wikimedia.org/w/index.php?title=Wn/shn/Gantz_လွၵ်ႈငိူတ်ႈဝႃႈ_ပေႃးဢမ်ႇဝၢင်းၽႅၼ်_ၵႃႇၸႃႇ_တေထွၼ်ဢွၵ်ႇတီႈ_ၸုမ်ႈၽွင်းလူင်ၵၢၼ်သိုၵ်း&oldid=6289678"