Wn/shn/ႁႃးမၢတ်ႉသ်ၶဝ် ဢဝ်မၢၵ်ႇရွၵ်ႉၵႅတ်ႉ ပိုတ်းယိုဝ်း ဢိတ်ႇသရေး
ဝၼ်းၸၼ်၊ ၸၼ်ႇဝႃႇရီႇ 1၊ 2024
တီႈၵႃႇၸႃႇ မိူဝ်ႈၼႆႉၼႆႉ ၸိူဝ်းပဵၼ် ၸုမ်းၵေႃႇၵၢၼ်ႁၢႆႉႁႃးမၢတ်ႉသ်ၶဝ် လႆႈဢဝ် မၢၵ်ႇရွၵ်ႉၵႅတ်ႉ ပိုတ်းယိုဝ်းထပ်ၵၼ်လႄႈ တီႈၼႂ်းမိူင်းဢိတ်ႇသရေးပတ်ႉပိုၼ်ႉ လႆႈငိၼ်းသဵင်ပၼ်ၽၢင်ႉ ပေႃးမေႃးၼၼ်ႈၵႂႃႇသဵင်ႈယဝ်ႉ။ ယွၼ်ႉပိူဝ်ႈဢဝ် မၢၵ်ႇရွၵ်ႉၵႅတ်ႉ ပိုတ်းယိုဝ်းသေလႄႈ ၶၢဝ်ႇဢၼ်ဝႃႈ ၵူၼ်းလႆႈလုတၢႆၼၼ်ႉတႄႉ ပႆႇႁၼ်လႆႈငိၼ်းၼင်ႇၵဝ်ႇ။ တီႈၵႃႇၸႃႇၼၼ်ႉ ၸိူဝ်းပဵၼ် တပ်ႉဢိတ်ႇသရေးၶဝ်ၵေႃး တွၼ်ႈတႃႇ ၽဵဝ်ႈမူၺ်ႉပႅတ်ႈ ႁႃးမၢတ်ႉသ်ၶဝ်ၼႆႉသေ တိုၵ်ႉၶဝ်ႈတိုၵ်းယူႇသေ ၽၢႆႇႁႃးမၢတ်ႉသ်ၶဝ်ၵေႃႈ တိုၵ်ႉသိုပ်ႇတိုၵ်း ဢိတ်ႇသရေးၶိုၼ်းယူႇၼင်ႇၵဝ်ႇ။
တီႈၵႃႇၸႃႇၼၼ်ႉ တပ်ႉဢိတ်ႇသရေးၶဝ် တိုၵ်းႁၢင်ႈတပ်ႉလိၼ် တပ်ႉၵၢင်ႁၢဝ်သေ လေႃႇတိုၵ်းယူႇသေ၊ ယွၼ်ႉပိူဝ်ႈဢဝ်ႁိူဝ်းမိၼ်းတိုၵ်းသေ မိူဝ်ႈလိူၼ်ဢွၵ်ႇထူဝ်ႇပႃႇ 7 ဝၼ်းၼၼ်ႉ ၽူႈၵွၼ်းတပ်ႉႁႃးမၢတ်ႉသ် ၵေႃႉၼိုင်ႈ ဢၼ်ပဵၼ် ၽူႈဢွၼ်ႁူဝ် ၶဝ်ႈတိုၵ်းတီႈ မိူင်းဢိတ်ႇသရေး ပွတ်းၸၢၼ်းၼၼ်ႉ လႆႈလုတၢႆၵႂႃႇၼႆ မီးလွင်ႈပိုၼ်ၶၢဝ်ႇဢွၵ်ႇဝႆႉယူႇ။ Adel Mesmah ၵေႃႉဢၼ်လႆႈတၢႆၵႂႃႇၼၼ်ႉ မၼ်းပဵၼ် ၽူႈဢွၼ်ႁူဝ် ႁႃးမၢတ်ႉသ်ၶဝ် ၸိူဝ်းဢၼ်တိုၵ်းတင်း တပ်ႉဢိတ်ႇသရေး ၼၼ်ႉၼႆယဝ်ႉ။
ယွၼ်ႉပိူဝ်ႈ ဢိတ်ႇသရေးၶဝ် ၶဝ်ႈတိုၵ်းၶိုၼ်း တီႈၵႃႇၸႃႇလႄႈ ၵူၼ်း လႆႈလုတၢႆၵႂႃႇ 21,800 ၵေႃႉၼႆ ၽၢႆႇထၢၼ်ၽွင်းလူင်ပၢႆးယူႇလီ ႁႃးမၢတ်ႉသ်ၶဝ် လႆႈမွၵ်ႇလၢတ်ႈဝႆႉယူႇ။ ၼႂ်းၵႃႈ ၸိူဝ်းလႆႈတၢႆၵႂႃႇၼၼ်ႉ ႁူမ်ႈဝႃႈ ဢမ်ႇၸႅၵ်ႇၼႄဝႆႉႁူဝ်ၼပ်ႉ ၵူၼ်းမိူင်း လႄႈ ၵူၼ်းၸိူဝ်းၵေႃႇၵၢၼ်ႁၢႆႉသေတႃႉ ၼႂ်းၵႃႈ ႁူဝ်ပၢၵ်ႇ 70 ၸိူဝ်းဢၼ်လႆႈတၢႆၵႂႃႇၼၼ်ႉ ပဵၼ် ၼၢင်းယိင်း လႄႈ လုၵ်ႈဢွၼ်ႇ ဝႃႈၼႆႉယဝ်ႉ။ ၽၢႆႇႁႃးမၢတ်ႉသ်ၶဝ် တိုၵ်ႉသိုပ်ႇၺွပ်းဝႆႉ တူဝ်ယိူဝ်ႇ 129 ၵေႃႉသေ၊ တပ်ႉသိုၵ်းဢိတ်ႇသရေးၶဝ်ၵေႃႈ လၢတ်ႈဝႃႈ ၼႂ်းၵႃႈ ၶၢဝ်းတၢင်းပၢင်တိုၵ်းၼႆႉ ၽူႈႁၢပ်ႇၵၢၼ်ၽၢႆႇသိုၵ်း ဢၼ်လႆႈလုတၢႆၵႂႃႇ မီးယူႇ 172 ၵေႃႉ ဝႃႈၼႆယဝ်ႉ။
ငဝ်ႈငႃႇ[edit | edit source]
- AGENCIES and TOI STAFF. "At stroke of midnight, Hamas attacks Israel with heavy New Year rocket barrage" — The Times of Israel, January 1, 2024
- VOA News. "အစ္စရေးကို ဟာမတ်စ်အဖွဲ့ ရော့ကတ်ဒုံးတွေနဲ့ တိုက်ခိုက်" — VOA News, January 1, 2024
