Wn/shn/ၽွင်းတၢင်ထၢၼ်ႈယႂ်ႇ မိူင်းၶႄႇ ႁွတ်ႈထိုင် သိင်ႇၵႃႇပူဝ်ႇ
ဝၼ်းသုၵ်း၊ မၢတ်ႉၶျ် 29၊ 2024
.svg)
.jpg)
"ၵမ်ႇၽႃႇလူင်ၼႆႉ မၼ်းလူဝ်ႇ ဢၼ်ၶဵင်ႇၵပ်းသိုပ်ႇတိတ်းတေႃႇၵၼ်။ ဢမ်ႇၸႂ်ႈဝႃႈ တႃႇတႅပ်းၶၢတ်ႇၵၼ်“ ၼႆ လျိဝ်ၵျိၼ်းၶျၢဝ်ႇ (Liu Jianchao) ၵေႃႉပဵၼ် ၽွင်းတၢင်ထၢၼ်ႈယႂ်ႇ ဢၼ်ဢွၼ်ၵၼ်ႁၼ်ထိုင်ဝႆႉဝႃႈ တေပဵၼ်မႃး ၽွင်းလူင် ၵၢၼ်ၼွၵ်ႈမိူင်း မိူင်းၶႄႇ ၼၼ်ႉ လႆႈမွၵ်ႇလၢတ်ႈ တီႈၶၢဝ်းတၢင်း သိင်ႇၵႃႇပူဝ်ႇ ဢၼ်ႁိုင် သီႇဝၼ်းၼၼ်ႉယဝ်ႉ။
လျိဝ်ႇ ၼႆႉ ပဵၼ် ၽူႈယႂ်ႇ တီႈ ထၢၼ်ၵၢၼ်ၵူႈမိူင်းမိူင်း ပႃႇတီႇၶွမ်ႇမိဝ်ႇၼိတ်ႉၶႄႇသေ လႆႈႁွတ်ႈၽႅဝ် သိင်ႇၵႃႇပူဝ်ႇၼႆႉ ပဵၼ် တွၼ်ႈတႃႇ ထူပ်းၵၼ်တင်း ၸွမ်ၽွင်းလူင် သိင်ႇၵႃႇပူဝ်ႇ လီႇသျိၼ်ႇလုၼ်း၊ ၵႅမ်ၸွမ်ၽွင်းလူင် ရေႃးရိၼ်ႉဝၢဝ်ႇ ၼၼ်ႉယဝ်ႉ။ ၼႂ်းၶေႃႈမွၵ်ႇလၢတ်ႈ တီႈပၢင်ၵႅဝ်ႈ လွင်ႈဢုပ်ႇဢူဝ်း မိူဝ်းၼႃႈၶႄႇ ၼၼ်ႉ မၼ်းမွၵ်ႇလၢတ်ႈဝႃႈ တီႈသၢႆငၢႆ ဢၼ်ပဵၼ်လွင်ႈသုၵ်ႉယုင်ႈၼမ်ယူႇ မိူၼ်ၼင်ႇယၢမ်းလဵဝ်ၼႆႉ လူၵ်ႈၵမ်ႇၽႃႇၼႆႉ မၼ်းလူဝ်ႇၽိင်ႈငႄႈ ဢၼ်ၶဵင်ႇၵပ်းသိုပ်ႇတိတ်းတေႃႇၵၼ်၊ ဢမ်ႇၸႂ်ႈၽိင်ႈငႄႈ ဢၼ်တိုၵ်းတေႃးၵၼ် ဝႃႈၼႆယဝ်ႉ။
တီႈဢုပ်ႇဢူဝ်း လွင်ႈသိူၵ်ႈသမ်ႇၵၼ်တင်း ဢမႄႇရိၵၢၼ်ႇၼၼ်ႉတႄႉ မၼ်းလၢတ်ႈဝႃႈ ဢမႄႇရိၵၢၼ်ႇၼႆႉ ၶဝ်ပႆႇၸုၼ်ႉပႅတ်ႈ လၵ်းၵၢၼ် ဢၼ်ၶႂ်ႈၵုမ်းၵမ်ၶႄႇ၊ ဢၼ်ၶႂ်ႈတဵၵ်းတဵင်ၶႄႇ ဝႃႈၼႆယဝ်ႉ။ၶေႃႈၽွမ်ႉၸႂ် ဢၼ်ပဵၼ် တီႈၼႂ်းၵႄႈ မိူင်းၶႄႇ လႄႈ မိူင်းသိင်ႇၵႃႇပူဝ်ႇ ၵူၼ်းမိူင်းၶဝ်ၼႆႉ ဢမ်ႇတၢပ်ႈလူဝ်ႇဝီႇသႃႇသေ ဢႅဝ်ႇလႄႇၵၼ်လႆႈ တႃႇ 30 ဝၼ်း ၼၼ်ႉၵေႃႈ လႆႈပိုၼ်ၽၢဝ်ႇ တီႈၼႂ်း ၶၢဝ်းတၢင်းၼႆႉၼင်ႇၵဝ်ႇ။ ထၢၼ်ၽွင်းလူင် ၵၢၼ်ၼွၵ်ႈမိူင်း သိင်ႇၵႃႇပူဝ်ႇ လႆႈမွၵ်ႇလၢတ်ႈဝႃႈ မိတ်ႉသတႃႇ လျိဝ်ႇ လႄႈ ၸွမ်ၽွင်းလူင်လီႇၶဝ် လႆႈမွၵ်ႇလၢတ်ႈ တႃႇမႄႇၶႂၢၵ်ႈ လွင်ႈႁူမ်ႈသၢင်ႈ တီး ၵၢၼ်ၵႃႉၶၢႆ လႄႈ ၵၢၼ်ၽင်တိုၼ်းလၢင်း ဝႃႈၼႆယဝ်ႉ။
ငိူၼ်ႈငဝ်ႈတိုၼ်း
- Adam Hancock. "Chinese Diplomat Liu Jianchao Meets With Singapore's Leaders" — VOA News, March 28, 2024
- VOA News. "တရုတ်အကြီးတန်သံတမန် စင်ကာပူရောက်ရှိ" — VOA News, March 29, 2024
