Jump to content

Wn/shn/ၸွမ်ၽွင်းလူင် ဢိၼ်းတီးယႃး ႁွတ်ႈထိုင် ဝဵင်းၶိပ်ႉၾ် တႃႇဢုပ်ႇဢူဝ်း ၸွမ်ၸိုင်ႈ ယူႇၶရဵၼ်း

Add links
From Wikimedia Incubator
< Wn | shn
Wn > shn > ၸွမ်ၽွင်းလူင် ဢိၼ်းတီးယႃး ႁွတ်ႈထိုင် ဝဵင်းၶိပ်ႉၾ် တႃႇဢုပ်ႇဢူဝ်း ၸွမ်ၸိုင်ႈ ယူႇၶရဵၼ်း

ဝၼ်းသဝ်၊ ဢေႃးၵၢတ်ႉ 24၊ 2024

လိၵ်ႈႁွမ်တွမ် ၸိူဝ်းၵဵဝ်ႇၵပ်း
ဢွင်ႈတီႈ ယူႇၶရဵၼ်း
ႁူမ်ႈသၢင်ႈ!
Wn/shn/ယူႇၶရဵၼ်း
Wn/shn/ယူႇၶရဵၼ်း
ၸွမ်ၽွင်းလူင် ဢိၼ်းတီးယႃး လႄႈ ၸွမ်ၸိုင်ႈယူႇၶရဵၼ်း

မိူဝ်ႈဝၼ်းသုၵ်းၼၼ်ႉ ၸွမ်ၽွင်းလူင် ဢိၼ်းတီးယႃး ၼရႅၼ်ႇတရႃႇမူဝ်ႇတီႇ ဢွၵ်ႇၶၢဝ်းတၢင်းၵႂႃႇ တီႈဝဵင်းၶိပ်ႉၾ်သေ ႁူပ်ႉထူပ်း ၸွမ်ပွင်ၸိုင်ႈ ယူႇၶရဵၼ်း ဝေႃႇလေႃႇတီးမႃးရ် ၸႄးလႅၼ်းသၵီး။ ဝၢႆးသေ မိူင်းယူႇၶရဵၼ်း လႆႈၽၢတ်ႇဢွၵ်ႇ မိူင်းႁူမ်ႈတုမ် သူဝ်ႇဝီႇယႅတ်ႉ မိူဝ်ႈပီ 1991 ၼၼ်ႉယဝ်ႉ မၼ်းၵေႃႈ ပဵၼ်ၸွမ်ၽွင်းလူင် ဢိၼ်းတီးယႃး ၵေႃႉဢွၼ်တၢင်းသုတ်း ဢၼ်မႃးဢႅဝ်ႇမိူင်းယူႇၶရဵၼ်းၼၼ်ႉယဝ်ႉ။

ၸွမ်ၽွင်းလူင် မူဝ်ႇတီႇ မႃးဢႅဝ်ႇမိူင်းယူႇၶရဵၼ်းၼႆႉ ပဵၼ်ယွၼ်ႉ ၸွမ်ပွင်ၸိုင်ႈ ယူႇၶရဵင်ႇ ၸႄးလႅၼ်းသၵီး ၽိတ်ႈမွၵ်ႇမၼ်းသေ ၸႄးလႅၼ်းသၵီး လႆႈၸႂ်လမ် ယွၼ်ႉ မူဝ်ႇတီႇ ၵႂႃႇႁူပ်ႉထူပ်း ၸွမ်ပွင်ၸိုင်ႈ ရတ်ႈသျႃး ပူႇတိၼ်ႇ တီႈမွသ်ႉၵူဝ်ႇ မိူဝ်ႈလိူၼ်ပူၼ်ႉမႃးၼၼ်ႉယဝ်ႉ။

ၼႂ်းၶေႃႈပိုၼ်ၽၢဝ်ႇ ႁူမ်ႈၵၼ်ဢွၵ်ႇ မိူဝ်ႈပႆႇထိုင်ပၢင်ၵုမ် ၽူႈဢွၼ်ႁူဝ်သွင်မိူင်းၼၼ်ႉ မူဝ်ႇတီႇ လၢတ်ႈဝႃႈ လွင်ႈဢၼ်မၼ်းၵႂႃႇမိူင်းယူႇၶရဵၼ်းၼၼ်ႉ ပဵၼ်တႃႇ လွင်ႈငမ်းယဵၼ်ၼႆသေ တုၵ်းယွၼ်းႁႂ်ႈ ရတ်ႈသျႃးလႄႈ ယူႇၶရဵၼ်း ဢုပ်ႇဢူဝ်းၵၼ်ငူပ်ႉငိၵၼ် တင်းသွင်ပႃႈသွင်ၽၢႆႇ ဝႃႈၼႆယဝ်ႉ။

ဢိၼ်းတီးယႃး လႄႈ ရတ်ႈသျႃးၼႆႉ မီးလွင်ႈၵပ်းသိုပ်ႇၵၼ်မႃး ႁိုင်ၼၢၼ်းသေ လႆႈၸတ်းႁဵတ်း ပၢင်ၵုမ်လူင် ၵူႈပီ ၸဵမ်မိူဝ်ႈပီ 2000 ၼၼ်ႉသေတႃႉ ၼႂ်းလိူၼ်ၵျူႇလၢႆႇၼႆႉ ပဵၼ်ပွၵ်ႈဢွၼ်တၢင်းသုတ်း ဢၼ်မၼ်းၵႂႃႇလႄႇ ဝဵင်းမွသ်ႉၵူဝ်ႇ ၼႂ်းၶၢဝ်းတၢင်း 5 ပီၼၼ်ႉယဝ်ႉ။

ဢိၼ်းတီးယႃး လၢတ်ႈတီႈ ၸွမ်ပွင်ၸိုင်ႈ ၸႄးလႅၼ်းသၵီးဝႃႈ လွင်ႈၶတ်းၸႂ် တႃႇလွင်ႈငမ်းယဵၼ် ၼႂ်းၵႄႈ ရတ်ႈသျႃးလႄႈ ယူႇၶရဵၼ်း ဢၼ်လႂ်သေဢမ်ႇဝႃႈ ဢိၼ်းတီးယႃး တူဝ်ႈတၼ်းတႃႇ ၶဝ်ႈပႃးပဵၼ် ၼင်ႇဢူၺ်းၵေႃႉ ၼႆယဝ်ႉ။ ၸွမ်ၽွင်းလူင် မူဝ်ႇတီႇ ႁူမ်ႈၵၼ်ဢွၵ်ႇၶေႃႈပိုၼ်ၽၢဝ်ႇဝႃႈ လွင်ႈငမ်းယဵၼ်ၼႆႉ ပေႃးဢဝ်လွင်ႈဢုပ်ႇဢူဝ်းၵၼ် လႄႈ လွင်ႈၽွင်းတၢင် ႁဵတ်းၸင်ႇတေ ၸၢင်ႈလႆႈလႄႈ ယႃႇပေ ၸၼ်ၶၢဝ်းယၢမ်းသ ႁႂ်ႈတင်းသွင်ပႃႈသွင်ၽၢႆႇ ၼင်ႈၸွမ်းၵၼ်သေ ဢုပ်ႉဢူဝ်းၵၼ်ၵႂႃႇ ဝႃႈၼႆယဝ်ႉ။

ဝၢႆးသေ သွင်ၸိုင်ႈမိူင်း ႁူပ်ႉဢုပ်ႇဢူဝ်းၵၼ်ယဝ်ႉ လႆႈလူင်လၢႆးမိုဝ်း ၶေႃႈၽွမ်ႉၸႂ်ၸွမ်းၵၼ် ဢၼ်ၵဵဝ်ႇၵပ်းလူၺ်ႈ လွင်ႈၵၢၼ်ၽုၵ်ႇသွမ်ႈ၊ ၵၢၼ်ႁဵတ်းဢွၵ်ႇတၢင်းၵိၼ်၊ ယႃႈယႃ၊ ၾိင်ႈငႄႈၾိင်ႈထုင်း လႄႈ တႃႇပၼ် လွင်ႈၸွႆႈထႅမ် ၸိူဝ်းၼႆႉယဝ်ႉ။


ငိူၼ်ႈငဝ်ႈၶၢဝ်ႇ

Retrieved from "https://incubator.wikimedia.org/w/index.php?title=Wn/shn/ၸွမ်ၽွင်းလူင်_ဢိၼ်းတီးယႃး_ႁွတ်ႈထိုင်_ဝဵင်းၶိပ်ႉၾ်_တႃႇဢုပ်ႇဢူဝ်း_ၸွမ်ၸိုင်ႈ_ယူႇၶရဵၼ်း&oldid=6360306"