Wn/shn/ၸွမ်ၽွင်းလူင် သိင်ႇၵႃႇပူဝ်ႇ လိုဝ်ႈၼႃႈၵၢၼ်ပုၼ်ႈၽွၼ်း

ဝၼ်းၸၼ်၊ ဢေႇပရႄႇ 15၊ 2024 

ၸွမ်ၽွင်းလူင် သိင်ႇၵႃႇပူဝ်ႇ Lee Hsien Loong (သၢႆႉ)၊ ၵႅမ်ၸွမ်ၽွင်းလူင် Lawrence Wong ဢၼ်တေ သိုပ်ႇႁပ်ႉဢဝ်ပုၼ်ႈၽွင်း ၸွမ်ၽွင်းလူင် (ၶႂႃ)

ၸွမ်ၽွင်းလူင် သိင်ႇၵႃႇပူဝ်ႇ Lee Hsien Loong ဢၼ်ဢႃႇယု မီး 72 ပီယဝ်ႉၼၼ်ႉ ပေႃး လိူၼ်မေႇ ဝၼ်းထိ 15 မႃး တေလိုဝ်ႈၼႃႈၵၢၼ်ပုၼ်ႈၽွၼ်းယဝ်ႉသေ တေဢဝ် တႃၶုၼ်လႅၵ်ႈလၢႆႈပၼ် ၵႅမ်ၸွမ်ၽွင်းလူင် Lawrence Wong ၵႂႃႇ ဝႃႈၼႆယဝ်ႉ။ ၸွမ်ၽွင်းလူင် Lee Hsien Loong လၢတ်ႈဝႃႈ တႃႇဢဝ် Lawrence Wong ဢၼ်ပဵၼ် ၽွင်းလူင်ၵၢၼ်ငိုၼ်းတွင်း လႄႈ ၵႅမ်ၽွင်းလူင် ပုတ်ႈတၢင်တီႈမၼ်းၵႂႃႇၼၼ်ႉ မၼ်းတေတၢင်ႇလၢတ်ႈၼႄ ၸဝ်ႈၸွမ်ၸိုင်ႈ ဝႃႈၼႆယဝ်ႉ။

လုမ်းၸွမ်ၽွင်းလူင် လႆႈပိုၼ်ၽၢဝ်ႇဝႃႈ ၵႅမ်ၸွမ်ၽွင်းလူင် Lawrence Wong ဢၼ်လႆႈလွင်ႈၵမ်ႉထႅမ် တႅၼ်းၽွင်းသၽႃး PAP ဢၼ်လႆႈဢၢမ်းၼၢတ်ႈမႃး ပီယၢဝ်းၶၢဝ်းႁိုင်ၼၼ်ႉ မၼ်းတေၶၢမ်ႇၵိၼ်ႇၵျၢမ်း တီႈ လိူၼ်မေႇ ဝၼ်းထိ 15 ဝႃႈၼႆယဝ်ႉ။ ၽူႈယႂ်ႇပႃႇတီႇ PAP ဢၼ်ပဵၼ် ၸွမ်ၽွင်းလူင် Lee Hsien Loong ၼႆႉ မၼ်းလႆႈလၢတ်ႈမႃး ၸဵမ်မိူဝ်ႈ လိူၼ်ၼူဝ်ႇဝႅမ်ႇပႃႇ ပီႈၵၢႆၼၼ်ႉဝႃႈ မၼ်းတေလိုဝ်ႈၼႃႈၵၢၼ်ပုၼ်ႈၽွၼ်းမၼ်း ၼႂ်းပီၼႆႉ ဝႃႈၼႆယဝ်ႉ။ ၸွမ်ၽွင်းလူင် Lee Hsien Loong ဢၼ်ပဵၼ် လုၵ်ႈၸၢႆးလူင် Lee Kuan Yew ဢၼ်ပဵၼ် ၸွမ်ၽွင်းလူင်သိင်ႇၵႃႇပူဝ်ႇ ၵေႃႉထိၼိုင်ႈၼႆႉ မၼ်းတႄႇႁၢပ်ႇၵၢၼ် ၸွမ်ၽွင်းလူ်ငမႃး မိူဝ်ႈ ပီ 2004 လိူၼ်ဢေႃးၵၢတ်ႉ မိူဝ်ႈဢႃႇယုမၼ်း လႆႈ 52 ပီၼၼ်ႉယဝ်ႉ။

Lawrence Wong ဢၼ်ဢႃႇယုမီႈ 51 ပီ ဢၼ်တေသိုပ်ႇပုတ်ႈတီႈတႃၶုၼ်မၼ်းၵႂႃႇၼႆႉ မၼ်းလႆႈႁပ်ႉၶူးမႃးတီႈ ၸၼ်ႉၸွမ် Wisconsin ဢမႄႇရိၵၢၼ်ႇ၊ ၸၼ်ႉၸွမ် Michigan လႄႈ ၸၼ်ႉၸွမ် Harvard ၸိူဝ်းၼႆႉသေ လႆႈႁၢပ်ႇၵၢၼ် ၽွင်းလူင်ပၢႆးပႆႇၺႃႇ သိင်ႇၵႃႇပူဝ်ႇမႃး ႁၢၼ်ႉတေႃႇထိုင် ပီ 2021 ယဝ်ႉ။ Wong ဢၼ်လႆႈႁပ်ႉဢဝ်ပႃး ပုၼ်ၽွၼ်း ၽွင်းလူင်ၵၢၼ်ငိုၼ်းတွင်းၼၼ်ႉ တႄႇ ပီ 2022 မႃး လႆႈသိုပ်ႇႁပ်ႉဢဝ်ပႃး ပုၼ်ၽွၼ်း ၵႅမ်ၸွမ်ၽွင်းလူင်ယဝ်ႉ။

ငိူၼ်ႈငဝ်ႈတိုၼ်း

• Xinghui Kok. "Singapore PM Lee to hand power to successor Wong on May 15" — Reuters, April 15, 2024
• Lee Ying Shan. "Singapore’s new prime minister, Lawrence Wong, will take office on May 15" — CNBC, April 15, 2024
• Cna. "Lawrence Wong to take over as Singapore Prime Minister from Lee Hsien Loong on May 15" — CNA, April 15, 2024