Wn/shn/ၸွမ်ၽွင်းလူင်ဢိတ်ႇသရေး လွၵ်ႇငိူတ်ႈဝႃႈ တေတိူဝ်းတိုၵ်းတေႃး ၵႃႇၸႃႇ
ဝၼ်းဢင်းၵၢၼ်း၊ ဢေႇပရႄႇ 23၊ 2024
မိူဝ်ႈဝၼ်းဢႃးတိတ်ႉၼၼ်ႉ ၸွမ်ၽွင်းလူင် ဢိတ်ႇသရေး ပႅၼ်ႇၸမိၼ်ႇ ၼႄႇတၼ်ႇယႃႇႁု လႆႈမွၵ်ႇလၢတ်ႈလွၵ်ႇငိူတ်ႈဝႃႈ ၼင်ႇႁိုဝ် ၵူၼ်းဢိတ်ႇသရေး ၸိူဝ်းထုၵ်ႇႁႃးမၢတ်ႉသ်ၶဝ် တိၺွပ်းဝႆႉၼၼ်ႉ ပေႃးတေလွတ်ႈဢွၵ်ႇမႃး တေသိုပ်ႇတိုၵ်းတေႃးၵႂႃႇထႅင်ႈ ဝႃႈၼႆယဝ်ႉ။ ၼႄႇတၼ်ႇယႃႇႁ မွၵ်ႇလၢတ်ႈတီႈ ပၢင်ပွႆး ဝၼ်းတၼ်းၸၢဝ်းၵျူး Passover ပၢင်ၼိုင်ႈဝႃႈ ၼႂ်းၵႃႈထႅင်ႈလၢႆဝၼ်း တေဢဝ် ၵၢၼ်မိူင်း၊ ၵၢၼ်သိုၵ်း သေ ပၼ်ႁႅင်းတဵၵ်းၼိူဝ် ႁႃးမၢတ်ႉသ်ၵႂႃႇ ဝႃႈၼႆယဝ်ႉ။
ၸွမ်ၽွင်းလူင် ဢိတ်ႇသရေး မွၵ်ႇလၢတ်ႈမႃးဝႃႈ တွၼ်ႈတႃႇ ၵူၼ်းၸိူဝ်းထုၵ်ႇၺွပ်းၵႂႃႇ ပေႃးတေလွတ်ႈမႃးၼၼ်ႉ ၼႆႉမၼ်းပဵၼ် လွၵ်းလၢႆးဢၼ်လဵဝ် ဝႃႈၼႆသေတႃႉ လွင်ႈတၢင်းႁူဝ်ယွႆႈမၼ်းတႄႉ ဢမ်ႇလႆႈမွၵ်ႇလၢတ်ႈဝႆႉသင်ၼင်ႇၵဝ်ႇ။ တီႈၼႂ်းလွင်ႈတိုၵ်းတေႃး ဢၼ်ႁႃးမၢတ်ႉသ်ၶဝ် ၶဝ်ႈတိုၵ်း ပွတ်းၸၢၼ်း ဢိတ်ႇသရေး မိူဝ်ႈ ဢွၵ်ႇထူဝ်ႇပႃႇ 7 ၼၼ်ႉ လႆႈတိၺွပ်းၵူၼ်းၵႂႃႇသေ ၵမ်ႈၽွင်ႈၼႆႉ လႆႈၺွပ်းဝႆႉတီႈ ဝဵင်းရႃႇၾႃႇ တီႈ ၵႃႇၸႃႇပွတ်းၸၢၼ်းၼၼ်ႉယဝ်ႉ။
ၸဝ်ႈသိုၵ်းလူင် တပ်ႉၵၢင်ႁၢဝ် Daniel Hagari ဢၼ်ပဵၼ် ၽူႈမီးသုၼ်ႇလၢတ်ႈ တပ်ႉသိုၵ်းဢိတ်ႇသရေး လၢတ်ႈမိူဝ်ႈ ဝၢႆးဝၼ်း ဝၼ်းဢႃးတိတ်ႉၼၼ်ႉဝႃႈ ၽူႈပွင်ၵၢၼ်သိုၵ်း လႆႈယိုၼ်ယၼ်ယၢင်ႈတိၼ် တႃႇသိုပ်ႇယၢင်ႈပၢင်တိုၵ်း ဢၼ်တေႁဵတ်းထႅင်ႈယဝ်ႉယဝ်ႈ ဝႃႈၼႆသေတႃႉ လွင်ႈတၢင်းႁူဝ်ယွႆႈမၼ်းတႄႉ ဢမ်ႇလႆႈမွၵ်ႇလၢတ်ႈၵႂႃႇသင်ၼင်ႇၵဝ်ႇ။ ပေႃးထိုင် ဝၼ်း Passover ၼႆ ၵူၼ်းၸိူဝ်းဢၼ်ထုၵ်ႇတိၺွပ်းၵႂႃႇၼႆႉ တဵမ် သွင်ပၢၵ်ႇဝၼ်းယဝ်ႉ။ မၼ်းသိုပ်ႇလၢတ်ႈဝႃႈ တေၶဝ်ႈပွႆးတိုၵ်းၵႂႃႇ ႁၢၼ်ႉတေႃႇၶဝ်တင်းသဵင်ႈ ၶိုၼ်းပွၵ်ႈႁွတ်ႈထိုင်ႁိူၼ်း ဝႃႈၼႆယဝ်ႉ။
ၸွမ်ၽွင်းလူင် ဢိတ်ႇသရေး ပႅၼ်ႇၸမိၼ်ႇ ၼႄႇတၼ်ႇယႃႇႁု လွၵ်ႈငိူတ်ႈဝႆႉ လၢႆလၢႆပွၵ်ႈဝႃႈ တေႁၢင်ႈသိုၵ်းတိုၵ်းတေႃး ဝဵင်းရႃႇၾႃႇ တီႈဢၼ် ႁႃးမၢတ်ႉသ်ၶဝ် ယူႇသဝ်းဝႆႉယူႇၼၼ်ႉ ဝႃႈၼႆႉယဝ်ႉ။ ၶေႃႈမွၵ်ႇလၢတ်ႈ ၼႄႇတၼ်ႇယႃႇႁုၼႆႉ လႆႈဢွၵ်ႇမႃး ၽွင်းမိူဝ်ႈ မိူင်းဢမႄႇရိၵၢၼ်ႇ ဢၼ်ပဵၼ်ဢူၺ်းလီပိူင်လူင် ဢိတ်ႇသရေးလႄႈ တူင်ႇဝိူင်းၵူႈမိူင်းမိူင်း ဢွၼ်ၵၼ် တိုၵ်းသူၼ်းတုၵ်းယွၼ်း ႁႂ်ႈထိင်းသေ ႁဵတ်းသၢင်ႈၵႂႃႇ ဢၼ်ဝႃႈၼၼ်ႉယဝ်ႉ။
ငိူၼ်ႈငဝ်ႈတိုၼ်း[edit | edit source]
- VOA. "Israeli strikes kill 22 in Rafah; Netanyahu vows 'painful blows' on Hamas to free hostages" — VOA, April 21, 2024
- VOA. "ဂါဇာကို ထပ်တိုးတိုက်ခိုက်မယ်လို့ အစ္စရေးဝန်ကြီးချုပ် ခြိမ်းခြောက်" — VOA, April 22, 2024