Wn/shn/ၵၢၼ်ႇ လႄႈ မိူင်း 17 မိူင်း တိုၵ်းသူၼ်း ႁႃးမၢတ်ႉသ် ႁႂ်ႈပွႆႇပၼ် ၵူၼ်းၸိူဝ်းထုၵ်ႇၺွပ်းဝႆႉ

ဝၼ်းသုၵ်း၊ ဢေႇပရႄႇ 26၊ 2024 

ၵူၼ်းဢိတ်ႇသရေး ၸိူဝ်းထုၵ်ႇ ႁႃးမၢတ်ႉသ်ၶဝ် တိၺွပ်းၵႂႃႇ

ၸဝ်ႈၸွမ်ၸိုင်ႈ ဢမႄႇရိၵၢၼ်ႇ ၵျူဝ်း ပၢႆႇတႅၼ်ႇ လႄႈ ၽူႈဢွၼ်ႁူဝ် မိူင်း သိပ်းၸဵတ်းမိူင်း ဢွၼ်ၵၼ်တုၵ်းယွၼ်းႁႃးမၢတ်ႉသ်ၶဝ် တႃႇပွႆႇပၼ် ၵူၼ်းၸိူဝ်းထုၵ်ႇတိၺွပ်းၵႂႃႇၼၼ်ႉ ၵမ်းလဵဝ်သေ ႁႂ်ႈယွမ်းႁပ်ႉ ၶေႃႈတၢင်ႇလၢတ်ႈ ၵိုတ်းတိုၵ်းၵၼ်တင်း ဢိတ်ႇသရေး ဝႃႈၼႆယဝ်ႉ။

တီႈၼႂ်းၶေႃးပိုၼ်ၽၢဝ်ႇ ႁိူဝ်းၵႅဝ်ၶၢဝ် ၸဝ်ႈၸွမ်ၸိုင်ႈ ဢၼ်ပိုၼ်ဢွၵ်ႇ မိူဝ်ႈဝၼ်းၽတ်းၼၼ်ႉဝႃႈဝႆႉဝႃႈ လွင်ႈႁဵတ်းၵမ်းလဵဝ် တႃႇၵိုတ်းတိုၵ်း ဢၼ်မၼ်ႈၵိုမ်းၶၢဝ်းယၢဝ်းၼႆႉ မၼ်းတေ ၸၢင်ႈတိူဝ်းႁဵတ်းသၢင်ႈလႆႈ လွင်ႈပၼ်တၢင်းၸွႆႈထႅမ် ၵူၼ်းထူပ်းၽေး တီႈပတ်ႉပိုၼ်ႉၵႃႇၸႃႇသေဢမ်ႇၵႃး မၼ်းတေ ႁႂ်ႈလွင်ႈပႅင်းၸင်းတင်းသွင်ပႃႈသွင်ၽၢႆႇ သုတ်းသဵင်ႈမႃးလႄႈ ၽၢႆႇႁႃးမၢတ်ႉသ်ၶဝ် ႁႂ်ႈႁပ်ႉ လွင်ႈၽွမ်ႉၸႂ်ၵိုတ်းတိုၵ်း ဝႃႈၼႆယဝ်ႉ။ ပေႃးၼၼ် ၸိူဝ်းပဵၼ် ၵူၼ်းပိုၼ်ႉတီႈၵႃႇၸႃႇၶဝ် ၸင်ႇတေ ၸၢင်ႈပွၵ်ႈတီႈယူႇၽႂ်မၼ်းသေ ၸင်ႇၸၢင်ႈႁၢင်ႈႁႅၼ်းလႆႈ တႃႇဢဝ်တၢင်းၸွႆႈထႅမ် လႄႈ လွင်ႈယူႇတၼ်းသဝ်းၸိူဝ်းၼႆႉ ဝႃႈၼႆယဝ်ႉ။

ဢမႄႇရိၵၢၼ်ႇလႄႈ ၸိူဝ်းပဵၼ် ဢႃႇၵျႅၼ်ႇတီႈၼႃး၊ ပရႃႇၸီး၊ ၶႅၼ်ႇၼေႇတႃႇ၊ ၵျႃႇမၼီႇ၊ ၾရၢင်ႇသဵတ်ႈ၊ သပဵၼ်ႇ၊ ပရိတ်ႈတဵၼ်ႇ လႄႈ ထႆး ၸိူဝ်းပဵၼ် ၽူႈဢွၼ်ႁူဝ် မိူင်း သိပ်းၸဵတ်းမိူင်း လႆႈဢွၼ်ၵၼ် တုၵ်းယွၼ်းမႃးၼင်ႇၼႆယဝ်ႉ။ တီႈၼႂ်းၶေႃႈတုၵ်းယွၼ်းၼၼ်ႉ ပႃးဝႆႉဝႃႈ ၼင်ႇႁိုဝ် တေၵိုတ်းတိုၵ်းလႆႈၵမ်းလဵဝ် တီႈၵႃႇၸႃႇၼၼ်ႉ ၸိူဝ်းပဵၼ် ၽူႈယိင်း၊ ၸိူဝ်းလႆႈတၢင်းၸဵပ်းမၢတ်ႇ၊ ၸိူဝ်းပဵၼ် ၵူၼ်းၵႄႇၵူၼ်းထဝ်ႈ လႄႈ ၸိူဝ်းဢမ်ႇယူႇလီၼၼ်ႉ လူဝ်ႇလႆႈပွႆႇပၼ်ၶိုၼ်းၼႆသေ ၽၢႆႇႁႃးမၢတ်ႉသ်ၶဝ် ဢမ်ႇယွမ်းႁပ်ႉ ၶေႃႈတုၵ်းယွၼ်းဢၼ်ၼႆႉၼႆ ဢၼ်ပဵၼ် ၽူႈမီးၸၼ်ႉ ထၢၼ်ႈသုင် ၸုမ်းလူင်ပွင်ၸိုင်ႈပၢႆႇတႅၼ်ႇ လႆႈမွၵ်ႇလၢတ်ႈတီႈ ပၢင်ၸႅင်ႈၶၢဝ်ႇ မိူဝ်ႈဝၼ်းၽတ်းၼၼ်ႉယူႇ။

ၵူၺ်းၵႃႈဝႃႈ လႆႈႁၼ်ၽၢင်ႁၢင် ၽၢႆႇႁႃးမၢတ်ႉသ်ၶဝ် တိုၵ်ႉဝူၼ်ႉလွင်ႈၵၢႆႇၵႂၢမ်းဢၼ်ၼႆႉယူႇ ဝႃႈၼႆ။ တီႈၼႂ်းၶၢဝ်ႇ လၢတ်ႈဝႃႈတႄႉ ႁႃးမၢတ်ႉသ်ၶဝ်တႄႉ ၶဝ်ၶႂ်ႈႁႂ်ႈၵိုတ်းတိုၵ်းၵမ်းလဵဝ် ၵႃႈတီႈၵႃႇၸႃႇသေ ဢမ်ႇၵႃး တပ်ႉဢိတ်ႇသရေး ၸိူဝ်းမီးတီႈ ၵႃႇၸႃႇၼၼ်ႉၵေႃႈ လူဝ်ႇလႆႈ ႁူၼ်ပၼ်ၶိုၼ်းသေ ႁႂ်ႈတိူဝ်းပၼ် တၢင်းၸွႆႈထႅမ် ၵူၼ်းထူပ်းၽေး လႄႈ ႁႂ်ႈၵူၼ်းပိုၼ်ႉတီႈၵႃႇၸႃႇၶဝ် ၸၢင်ႈၶိုၼ်းပွၵ်ႈၸူး တီႈယူႇ ဢၼ်မီိးတီႈ ပွတ်းႁွင်ႇၼၼ်ႉ ဝႃႈၼႆယဝ်ႉ။

ငိူၼ်ႈငဝ်ႈတိုၼ်း

• Dan De Luce. "U.S. and 17 other countries demand that Hamas release hostages held in Gaza" — NBC News, April 26, 2024
• Patsy Widakuswara. "Biden, 17 world leaders demand Hamas release hostages" — VOA News, April 25, 2024
• Hannah Sarisohn. "US, 17 other countries release joint statement demanding Hamas release the hostages" — The Jerusalem Post, April 25, 2024
• The New York Times. "U.S. and 17 Other Nations Call on Hamas to Release Hostages" — The New York Times, April 25, 2024
• Steve Holland လႄႈ Doina Chiacu. "US, 17 other countries urge Hamas to release hostages, end Gaza crisis" — Reuters, April 25, 2024