Wn/shn/ၸွမ်ၽူႈၼမ်းၼႂ်း ယူႇဢႅၼ်ႇ တုၵ်းယွၼ်း ႁႂ်ႈဢိတ်ႇသရေး လႄႈ ႁႃးမၢတ်ႉသ် ၵိုတ်းတိုၵ်း
ဝၼ်းၸၼ်၊ မေႇ 13၊ 2024
ၽွင်းမိူဝ်ႈ တပ်ႉသိုၵ်းဢိတ်ႇသရေးၶဝ် လႆႈတိူဝ်းႁဵတ်းသၢင်ႈ လွင်ႈထူဝ်းသိုၵ်းမႃးၼၼ်ႉ ၸွမ်ၽူႈၼမ်းၼႂ်း ၸုမ်းၸၢတ်ႈၸိုင်ႈလုမ်ႈၾႃႉ ဢၼ်ႇတူဝ်ၼီယူဝ် ၵူတႄရႅသ်ႉ လႆႈတုၵ်းယွၼ်း မိူဝ်ႈလိူၼ်မေႇ 12 ၼၼ်ႉဝႃႈ ၵၢၼ်တိုၵ်း တီႈၼႂ်းၵႄႈ ဢိတ်ႇသရေး လႄႈ ႁမၢသ်ႉ ၶဝ် ႁႂ်ႈၵိုတ်းၵမ်းလဵဝ်၊ ၵူၼ်းၸိူဝ်းဢၼ်ထုၵ်ႇတိၺွပ်းဝႆႉၼၼ်ႉၵေႃႈ ႁႂ်ႈပွႆႇပၼ်သေ ႁႂ်ႈဢဝ် တၢင်းၸွႆႈထႅမ် တွၼ်ႈတႃႇၵူၼ်းထူပ်းၽေးသိုၵ်းၼၼ်ႉ ၸဵဝ်းသူင်ႇပၼ်ၸူး ထုင်ႉပႃးလႅတ်ႈသတၢႆး ဝႃႈၼႆယဝ်ႉ။
ၸွမ်ၽူႈၼမ်းၼႂ်း ၸုမ်းၸၢတ်ႈၸိုင်ႈလုမ်ႈၾႃႉ မွၵ်ႇလၢတ်ႈတီႈၼႂ်း ၶေႃႈပူင်မၼ်း ဢၼ်ဢဝ် ငဝ်းတူင်ႉသေ သူင်ႇၸူးတီႈ ပၢင်ႇၵုမ်လူင် ၵူႈမိူင်းမိူင်း တွၼ်ႈတႃႇ ၸွႆႈထႅမ်ပႃးလဵတ်ႈသတႃး ဢၼ်ႁဵတ်းယူႇတီႈ မိူင်းၶူႇဝဵတ်ႉၼၼ်ႉဝႃႈ “ၵူၼ်းၸိူဝ်းဢၼ်ၺႃးၺွပ်းဝႆႉၼၼ်ႉ ယႃႇႁႂ်ႈမီးလွင်ႈၶွင်ႉၶမ်သင်သေ ႁႂ်ႈပွႆႇပၼ်၊ လွင်ႈဢၼ်တင်းၵမ်ႇၽႃႇတုၵ်းယွၼ်းယူႇဝႃႈ တႃႇႁႂ်ႈတိူဝ်းသူင်ႇပၼ် တၢင်းၸွႆႈထႅမ် ဢၼ်ဝႃႈၼၼ်ႉၵေႃႈ ၶႃႈႁဝ်းယူႇတီႈၼႆႈသေ တုၵ်းယွၼ်းထႅင်ႈယူႇ“ ဝႃႈၼႆယဝ်ႉ။
ပၢင်ၵုမ်လူင်ၼႆႉ ဢၼ်ပဵၼ် ၸုမ်းပဵၼ်ၵုသူဝ်ႇ ဢိတ်ႇသလၢမ်းမိသ်ႉ ၵူႈမိူင်းမိူင်း (IICO) လႄႈ လုမ်းႁူမ်ႈသၢင်ႈ ပၼ်တၢင်းၸွႆႈထႅမ် ၵူၼ်းထူပ်းၽေး ၸုမ်းၸၢတ်ႈၸိုင်ႈလုမ်ႈၾႃႉ (OCHA) ၶဝ် လႆႈႁူမ်ႈႁွမ်းၵၼ် ၸတ်းႁဵတ်းယဝ်ႉ။
မိူဝ်ႈဝၼ်ႈသုၵ်းၼၼ်ႉ ၸုမ်းၸၢတ်ႈၸိုင်ႈလုမ်ႈၾႃႉ လႆႈမွၵ်ႇလၢတ်ႈမႃးတီႈ ဝဵင်းလူင်ၼၢႆႇရူဝ်းပီႇ၊ မိူင်းၶႅၼ်ႇၺႃႇၼၼ်ႉဝႃႈ ယွၼ်ႉပိူဝ်ႈ ဢိတ်ႇသရေးၶဝ် လႆႈႁၢင်ႈသိုၵ်းၼိူဝ်လိၼ်ယူႇတီႈ ဝဵင်းရႃႇၾႃႇလႄႈ ၵႃႇၸႃႇၼႆႉ လႆႈႁူပ်ႉထူပ်းၺႃးၽေးၵၢပ်ႇယႂ်ႇလူင်ယူႇယဝ်ႉ ဝႃႈၼႆ။
ငိူၼ်ႈငဝ်ႈတိုၼ်း
- United Nations. "In Nairobi, Guterres reiterates appeal for end to Gaza war" — United Nations, May 10, 2024
- AFP and TOI STAFF. "UN chief urges ‘humanitarian ceasefire’ in Gaza, release of hostages" — The Times of Israel, May 12, 2024
- AFP. "UN chief calls for 'immediate' Gaza ceasefire, hostage release" — The Times of India, May 12, 2024
- Al Jazeera. "UN chief urges ‘immediate ceasefire’ in Gaza as 35,000 Palestinians killed" — Al Jazeera, May 12, 2024
