Wn/shn/ၶွင်ႇၸီႇသိုၵ်းမၢၼ်ႈ သၢၼ်ၶတ်း လွင်ႈဢုပ်ႇဢူဝ်းလိူင်ႈမျၢၼ်ႇမႃႇ တီႈၼႂ်းသၽႃးထႆး

ဝၼ်းဢႃးတိတ်ႉ၊ မၢတ်ႉၶျ် 3၊ 2024 

သၽႃးထႆး၊ ၵုင်းထဵပ်ႈ

ၶွင်ႇၸီႇသိုၵ်းမၢၼ်ႈ လႆႈသၢၼ်ၶတ်း လွင်ႈဢၼ် ဢုပ်ႇဢူဝ်းလိူင်ႈမျၢၼ်ႇမႃႇ တီႈၼႂ်းသၽႃးထႆး ၼၼ်ႉလႄႈသင်၊ လွင်ႈဢၼ် ၽူႈၼမ်းၵေႃႇမသျိၼ်ႇ သုၼ်ႇလႆႈသုၼ်ႇပဵၼ်ၵူၼ်း ၸုမ်းၸၢတ်ႈၸိုင်ႈလုမ်ႈၾႃႉ တုၵ်းယွၼ်း ႁႂ်ႈၵူႈမိူင်းမိူင်း ႁဵတ်းသၢင်ႈ တႃႇႁႂ်ႈ သိုၵ်းမၢၼ်ႈၵိုတ်းလွင်ႈႁဵတ်း ၵၢၼ်ႁုၵ်းႁၢႆႉတေႃႇ ၵူၼ်းမိူင်းမျၢၼ်ႇမႃႇ ၼၼ်ႉ ၼႆယဝ်ႉ။

ဝၢႆးသေ ယိုတ်းဢႃႇၼႃႇယဝ်ႉ ႁိုင်မႃး 3 ပီၼၼ်ႉ မီးလွင်ႈယွၼ်ႈထိုင် ပၢႆးႁူမ်ႇလူမ်ႈလႅၼ်လိၼ် ထႆး-မျၢၼ်ႇမႃႇမႃးလႄႈ၊ တွၼ်ႈတႃႇ မိူင်းမျၢၼ်ႇမႃႇ ပေႃးတေလႆႈၶိုၼ်း တီႇမူဝ်ႇၶရေႇၸီႇၼႆသေ လႆႈၽိတ်ႈမွၵ်ႇ ၽွင်းလူင်ၵၢၼ်ၼွၵ်ႈမိူင်းထႆး ဢိၵ်ႇတင်း တႅၼ်းၽွင်းသၽႃးၸိုဝ်ႈသဵင်ယႂ်ႇ လႄႈ ၽွင်းမိူင်းမျၢၼ်ႇမႃႇ တီႈ ၸုမ်းၸၢတ်ႈၸိုင်ႈလုမ်ႈၾႃႉ ဢူးၵျေႃႇမူဝ်းထုၼ်း၊ ၽွင်းလူင်ၵၢၼ်ၼွၵ်ႈမိူင်း NUG တေႃႇၸိၼ်ႇမႃႇဢွင်ႇ လႄႈ ၸိူဝ်းပဵၼ် ၵူၼ်းႁဵတ်းသၢင်ႈ တွၼ်ႈတႃႇ လိူင်ႈမျၢၼ်ႇမႃႇ ၸိူဝ်းၼၼ်ႉသေ လႆႈဢုပ်ႇဢူဝ်းၵၼ် ၼႂ်း သၽႃးထႆး မိူဝ်ႈ လိူၼ်မၢတ်ႉၶျ် ဝၼ်းထိ 2 လႄႈ 3 ၼၼ်ႉလႄႈ ၶွင်ႇၸီႇသိုၵ်းမၢၼ်ႈ ၸင်ႇလႆႈသၢၼ်ၶတ်းႁၢဝ်ႈႁၢဝ်ႈႁႅင်းႁႅင်း မႃးၼင်ႇၼႆယဝ်ႉ။

ၶွင်ႇၸီႇသိုၵ်းမၢၼ်ႈ လႆႈသူင်ႇလိၵ်ႈၸူး ထၢၼ်ၽွင်းလူင်ၵၢၼ်ၼွၵ်ႈမိူင်းထႆးဝႃႈ လွင်ႈဢၼ်ႁဵတ်း ပၢင်ဢုပ်ႇဢူဝ်း တီႈၼႂ်းသၽႃးထႆးၼႆႉ မၼ်းႁဵတ်းႁႂ်ႈတိူဝ်ႉၶိူၵ်ႈ လွင်ႈသိူၵ်ႈသမ်ႇ မိူင်းသွင်မိူင်း ဝႃႈၼႆယဝ်ႉ။

တီႈပၢင်ဢုပ်ႇဢူဝ်း ဢၼ်ႁဵတ်းတီႈ ၵျီႇၼီႇဝႃႇ တီႈ မိူင်းသဝိတ်ႈၸႃႇလႅၼ်ႇ မိူဝ်ႈ လိူၼ်မၢတ်ႉၶ်ျ ဝၼ်းထိ 1 ၼၼ်ႉၵေႃႈ ၽူႈၼမ်းၵေႃႇမသျိၼ်ႇ သုၼ်ႇလႆႈသုၼ်ႇပဵၼ်ၵူၼ်း Volker Türk တုၵ်းယွၼ်း တူင်ႇဝူင်းၵူႈမိူင်းမိူင်း ႁႂ်ႈဢွၼ်ၵၼ် ႁဵတ်းသၢင်ႈ တႃႇႁႂ်ႈသိုၵ်းမၢတ်ႈ ၵိုတ်းယိုတ်း လွင်ႈႁဵတ်းၵၢၼ်ႁုၵ်းႁၢႆႉတေႃႇ ၵူၼ်းမိူင်းမျၢၼ်ႇမႃႇၼႆလႄႈ ၽၢႆႇၶွင်ႇၸီႇသိုၵ်းမၢၼ်ႈ လႆႈသၢၼ်ၶတ်းတွပ်ႇၶိုၼ်း မိူဝ်ႈဝၼ်းသုၵ်းၼၼ်ႉယဝ်ႉ။

ၽူႈၼမ်းၵေႃႇမသျိၼ်ႇ သုၼ်ႇလႆႈသုၼ်ႇပဵၼ်ၵူၼ်း တုၵ်းယွၼ်းဝႃႈ လွင်ႈဢၼ် သိုၵ်းမၢၼ်ႈ ဢဝ်ႁိူဝ်းမိၼ်သေတိုၵ်း၊ ဢဝ်ၶိူင်ႈလူင်သေ ပိုတ်းယိုဝ်း၊ လွင်ႈၶႃႈ ၸိူဝ်းဢၼ်တိၺွပ်းဝႆႉ လူၺ်ႈၵၢၼ်မိူင်း၊ လွင်ႈၶႃႈထိုင်တၢႆ ၸိူဝ်းၼႆႉ ႁႂ်ႈၵိုတ်းယိုတ်းၵမ်းလဵဝ်သေ ႁႂ်ႈၵႅတ်ႇၵင်ႈပၼ် ၵူၼ်းမိူင်း ဝႃႈၼႆယဝ်ႉ။

ၽၢႆႇၶွင်ႇၸီႇသိုၵ်းမၢၼ်ႈတွပ်ႇၶိုၼ်းတႄႉ လွင်ႈမွၵ်ႇလၢတ်ႈ ၽူႈၼမ်းလူင်ၼၼ်ႉ မၼ်းဢွၵ်ႇႁၢင်ႈ လွင်ႈၸိူဝ်းဢၼ်ပဵၼ် ၸုမ်းၵေႃႇၵၢၼ်ႁၢႆႉၼႂ်းမိူင်းၶဝ် မၢမ်ႇၼေးဝႆႉယူႇလႄႈ ၽၢႆႇသိုၵ်းမၢၼ်ႈၼႆႉ ဢမ်ႇလႆႈမီး လွင်ႈပူၼ်ႉပႅၼ်သင်ဝႆႉ ဝႃႈၼႆယဝ်ႉ။

ငိူၼ်ႈငဝ်ႈတိုၼ်း

• VOA News. "မြန်မာ့အရေး ဆွေးနွေးပြောဆိုမှု စစ်ကောင်စီ ကန့်ကွက်" — VOA News, March 3, 2024
• Panu Wongcha-um. "Thai parliament holds Myanmar seminar over junta's objection" — Reuters, March 2, 2024