Wn/shn/လႆႈႁၼ် ၵူၼ်းထၢင်ႇထိူမ်တိတ်းၸပ်းၸိူဝ်ႉမႅင်း Mpox တီႈမိူင်းထႆး
ဝၼ်းသုၵ်း၊ ဢေႃးၵၢတ်ႉ 23၊ 2024
.svg)
ၽူႈမီးပုၼ်ႈၽွၼ်း ႁွင်ႈၵၢၼ်ပၢႆးယူႇလီ မိူင်းထႆး လၢတ်ႈဝႃႈ ၵူၼ်းဢၼ်ထၢင်ႇထိူမ်ဝႃႈ ၸပ်းတၢင်းပဵၼ် ၸိူဝ်ႉမႅင်း mpox ဢၼ်မီးၽေးၶဵၼ်ၼၼ်ႉ လႆႈႁၼ် ၼႂ်းမိူင်းထႆး ပွၵ်ႈဢွၼ်တၢင်းသုတ်း မၼ်းပဵၼ် ၵူၼ်းလႄႇလၢဝ်း မိူင်းယူးရူပ်ႉ ဢၼ်လုၵ်ႉတီႈ ဢႃႇၾရိၵ မႃးဢႅဝ်ႇလႄႇ မိူင်းထႆး မိူဝ်ႈဝူင်ႈပူၼ်ႉမႃးၼၼ်ႉ ၼႆယဝ်ႉ။
ၵူၼ်းလႄႇလၢဝ်း ဢၼ်ဢႃႇယု 66 ပီ ၼၼ်ႉ ႁွတ်ႈၽႅဝ်မိူင်းထႆး မိူဝ်ႈဢေႃးၵၢတ်ႉ 14 ဝၼ်းသေ ထိုင်မႃးထႅင်ႈဝၼ်း႞ လႆႈၶိုၼ်ႈႁူင်းယႃသေ လႆႈၵုမ်းတူဝ်ဝႆႉ ယွၼ်ႉၼႄၾၢင်ႁၢင်ႈ တၢင်းပဵၼ်မၢၼ်ႇတဵၼ်ႈလိင်း (Monkeypox) ၼႆ သုၼ်ၵၢင်ၵုမ်းထိင်း လႄႈ ႁႄႉၵင်ႈတၢင်းပဵၼ် မိူင်းထႆး ပိုၼ်ၽၢဝ်ႇ ၼိူဝ်ဝႅပ်ႉသၢႆႉ မိူဝ်ႈဝၼ်းၽတ်းၼၼ်ႉယဝ်ႉ။
ၽူႈမီးပုၼ်ႈၽွၼ်းၶဝ်လၢတ်ႈဝႃႈ ၾၢင်ႁၢင်ႈတၢင်းပဵၼ်မၼ်းၸၢႆးဢမ်ႇပေႃးႁၢဝ်ႈႁႅင်း။ လၢတ်ႈဝႃႈ မႅင်းဝၢႆးရၢတ်ႉသ် ဢၼ်ပဵၼ်တီႈမၼ်းၼၼ်ႉ လႆႈၵူတ်ႇထတ်းတူၺ်းဝႃႈ ပဵၼ်ၸိူဝ်ႉမႅင်း Clade 1b ဢၼ်မႂ်ႇ ဢၼ်မီးၽေးၶဵၼ်လိူဝ်သေ ၸိူဝ်ႉမႅင်း Clade 2 ဢၼ်ၵဝ်ႇၼၼ်ႉၼႆယဝ်ႉ။
ၽူႈၵွၼ်း သုၼ်ၵၢင် ၽၢႆႇၵုမ်းထိင်း တၢင်းပဵၼ်ၸပ်းၵၼ် မိူင်းထႆး DCC ထွင်ႇၶျၢႆး ၵိရႃႇတီႇႁႃႇတႃႇ ယႃႇၵူၼ်ႇ လၢတ်ႈတီႈပၢင်သပ်းၸႅင်ႈၶၢဝ်ႇ တီႈၵုင်းထဵပ်ႈဝႃႈ ၼႂ်းဝၼ်းသုၵ်းၼႆႉ တေပိုၼ်ၽၢဝ်ႇ ၶေႃႈတွပ်ႇၵူတ်ႇထတ်းမႂ်ႇထႅင်ႈ ၼႆယဝ်ႉ။
မိူဝ်ႈဝူင်ႈပူၼ်ႉမႃးၼၼ်ႉ ၸုမ်းပၢႆးယူႇလီလုမ်ႈၾႃႉ (WHO) ပိုၼ်ၽၢဝ်ႇ လွင်ႈၶိုၵ်ႉၶၵ်ႉ ပၢႆးယူႇလီၵူၼ်းမိူင်း တႃႇတၢင်းပဵၼ် ၶႆႈဝတ်းယႂ်ႇ မဵဝ်းမႂ်ႇ ဝၢႆးသေ တၢင်းပဵၼ်ၼႆႉ ၽႄႈလၢမ်း တီႈမိူင်းၶွၼ်ႇၵူဝ်ႇ ဢွၼ်တၢင်းသုတ်းၼၼ်ႉယဝ်ႉ။
ၼႂ်းမိူင်းထႆးၵေႃႈ လႆႈငိၼ်းၶၢဝ်ႇဝႆႉဝႃႈ တိုၵ်ႉပႂ်ႉတူၺ်း လဵပ်ႈႁဵၼ်း ၵူၼ်း 43 ၵေႃႉ ဢၼ်ထုၵ်ႇ ၵူၼ်းဢၼ်ထၢင်ႇထိူမ်ဝႃႈ တိတ်းၸပ်းၸိူဝ်ႉမႅင်းတၢင်းပဵၼ်ၼႆႉ လႆႈတိူဝ်ႉၼိူဝ်ႉၵၼ်မႃး မိူဝ်ႈပႆႇမႃးမိူင်းထႆးၼၼ်ႉ ဝႃႈၼႆယဝ်ႉ။ မၼ်းယင်းလၢတ်ႈဝႃႈ ၸိူဝ်ႉမႅင်းမႂ်ႇဢၼ်လႆႈႁၼ်ယၢမ်းလဵဝ်ၼႆႉ မၼ်းၽႄႈၸပ်းၵၼ်ဝႆးၼႆယဝ်ႉ။
ငိူၼ်ႈငဝ်ႈၶၢဝ်ႇ
- Bloomberg News. "Thailand confirms Asia’s first case of new mpox virus strain" — Bangkok Post, August 23, 2024
- Flora Drury. "Thailand confirms first Asian case of new Mpox strain" — BBC News, August 23, 2024
- Guardian staff and agencies. "Thailand confirms Asia’s first known case of new deadlier mpox variant" — The Guardian, August 23, 2024
- Nhk. "Thailand confirms first case involving more severe strain of mpox" — NHK, August 23, 2024
- Lee Ying Shan. "New, deadlier mpox found in Thailand: These Asian nations have ramped up precautions" — CNBC News, August 23, 2024
