Wn/shn/တီႈရၶႅင် တႄႇပဵၼ်ပၢင်တိုၵ်း

ဝၼ်းၸၼ်၊ ၼူဝ်ႇဝႅမ်ႇပႃႇ 13၊ 2023 

တီႈရၶႅင်ႇပွတ်းႁွင်ႇ တီႈဢၼ် ၸုမ်းယိပ်းၵွင်ႈၵၢင်ႇ AA လႄႈ ၶွင်ႇၸီႇသိုၵ်းမၢၼ်ႈၶဝ် လႆႈၸႂ်ယင်ႉၵိုတ်းပၢင်တိုၵ်းၵၼ်ဝႆႉၼၼ်ႉ ပွတ်းၸဝ်ႉမိူဝ်ႈၼႆႉ လႆႈၶိုၼ်းပဵၼ် ပၢင်တိုၵ်းၵၼ်ယူႇယဝ်ႉ။

ၵူၼ်းပိုၼ်ႉတီႈရတေႉတွင်ႇ လၢတ်ႈဝႃႈတႄႉ ၼႂ်ၼႆႉ မွၵ်ႈ 5 မူင်းႁူဝ်ၼႆၼၼ်ႉ လႆႈငိၼ်းသဵင် ၸုမ်း AA လႄႈ ၶွင်ႇၸီႇသိုၵ်းမၢၼ်ႈၶဝ် ၶဵင်ႇယိုဝ်းၵၼ် တီႈႁိမ်း ဝၢၼ်ႈၶျဵင်ႇၶႃႇလီႇ လႄႈ ဝၢၼ်ႈတူင်းပၢႆႉ ဢၼ်ပဵၼ်တီႈတၢင်းၵႃး ရတေႉတွင်ႇ လႄႈ မွင်ႇတေႃး ဢငူႇ ၼၼ်ႉ ဝႃႈၼႆယဝ်ႉ။

“တီႈသဵၼ်ႈတၢင်းၵႃး ရတေႉတွင်ႇ လႄႈ မွင်ႇတေႃး ဢငူႇ ၼၼ်ႉ မီးဝႆႉ တူင်းပၢႆႉ ၶျဵင်ႇၶႃႇလီႇ ဢၼ်ဝႃႈၼၼ်ႉဢေႃႈ။ ယၢမ်းလဵဝ်တႄႉ လႆႈငိၼ်းသဵင်ယိုဝ်းၵၼ်ဝႆႉယူႇ။ လုၵ်ႉတီႈ ရတေႉတွင်ႇသေ ယိုဝ်းယူႇတိၵ်းတိၵ်းၼၼ်ႉယဝ်ႉ။ တႄႇယိုဝ်း ၸဵမ်မိူဝ်ႈ ႁူဝ်ၼႂ် 5 မူင်းၼၼ်ႉယဝ်ႉ၊ ႁဝ်းၶႃႈ တိုၵ်ႉဢၢင်ႈဢွၼ်ၵၼ်ပၢႆႈယူႇ၊ သၢႆငၢႆမၼ်းတႄႉ လႅပ်ႈတေလႆႈမႆႈၸႂ်ဝႆႉဢေႃႈ“

ယၢမ်းလဵဝ်တႄႉ လုၵ်ႉတီႈ ၽၢႆႇၸႄႈဝဵင်းရတေႉတွင်ႇသေ ဢဝ်ၶိူင်ႈလူင် ယိုဝ်းသႂ်ႇၽၢႆႇ တၢႆးပၢႆႉ ၶျဵင်ႇၶႃႇလီႇယူႇလႄႈ ၵူၼ်းပိုၼ်ႉတီႈၵမ်ႈၽွင်ႈ လႆႈဢွၼ်ၵၼ် ဢွၵ်ႇပၢႆႈယူႇၼႆ ၵူၼ်းပိုၼ်ႉတီႈရတေႉတွင်ႇၵေႃႉၼိုင်ႈ လႆႈမွၵ်ႇလၢတ်ႈဝႃႈၼႆ။

“သဵင်ႈၶိူင်ႈလူင်တႄႉ လႆႈငိၼ်းၸဵမ်မိူဝ်ႈ ႁူဝ်ၼႂ် 5 မူင်းၼၼ်ႉယဝ်ႉ။ မိူဝ်ႈၼၼ်ႉႉတႄ လႆႈငိၼ်း လုၵ်ႈ၊ သွင်လုၵ်ႈၵူၺ်း။ တေႃႈလဵဝ်တႄႉ တိူဝ်းႁႅင်းမႃႈယဝ်ႉ။ မွၵ်ႈ 6 မူင်းပၢႆၼၼ်ႉ ၶႅၼ်းႁႅင်းမႃးယဝ်ႉ။ လုၵ်ႉတီႈ ရတေႉတွင်ႇသေ ဢဝ်ၶိူင်ႈလူင် ယိုဝ်းလႄႈ ၵူၼ်းတီႈဝဵင်းၼၼ်ႉ ဢမ်ႇႁတ်းယူႇလႄႈ ဢွၼ်ၵၼ်ၵူဝ်သေ ဢွၵ်ႇပၢႆႈၼၼ်ႉယဝ်ႉ။“

ၵူၼ်းပိုၼ်ႉတီႈ မိၼ်းပျႃးလၢတ်ႈဝႃႈတႄႉ ယွၼ်ႉပိူဝ်ႈဝႃႈ ၸုမ်း AA ၶဝ် လႆႈလတ်းတိုၵ်း ၵႃးသိုၵ်းမၢၼ်ႈသွင်လမ်း တီႈႁိမ်းဝၢၼ်ႈၽႃးပျူဝ်ႇ တီႈၸႄႈဝဵင်းမိၼ်းပျႃးၼၼ်ႉလႄႈ လႆႈပဵၼ်ပၢင်တိုၵ်းၵၼ်ယူႇသေ လုၵ်ႉတီႈပၢင်သဝ်းသိုၵ်းမၢၼ်ႈ ပၢင်သဝ်းၶိူင်ႈလၢၵ်ႈၼၢၵ်ႈလူင် ဢၼ်မီးတီႈၼိူဝ် လွႆၵျဵင်း တီႈဝဵင်းမိၼ်းပျႃးၼၼ်ႉသေၵေႃႈ ယိုဝ်းယူႇတိၵ်းတိၵ်းၼႆယဝ်ႉ။ ယၢမ်းလဵဝ်တႄႉ ၶွင်ႇၸီႇသိုၵ်းမၢၼ်ႈၶဝ် လႆႈဢိုတ်းတၢင်းၶဝ်ႈဝဵင်း ဢွၵ်ႇဝဵင်းၵမ်ႈၽွင်ႈ ၸိူဝ်းမီးတီႈ ရၶႅင်ႇပွတ်းႁွင်ႇၼၼ်ႉ ဝႃႈၼႆယဝ်ႉ။

ယၢမ်းလဵဝ်တႄႉ ၵပ်းၵၢႆႇလူၺ်ႈ လွင်ႈပၢင်တိုၵ်းၼႆႉသေ ၽၢႆႇဝီႇဢူဝ်ႇဢေႇၶဝ် လႆႈၵပ်းသိုပ်ႇတိတ်းတေႃႇတင်း ၸုမ်းဢေႇဢေႇ လႄႈ ၶွင်ႇၸီႇသိုၵ်းမၢၵ်ႈ သေတႃႉ ပႆႇလႆႈၶေႃႈၼႄႉၼွၼ်းသင်ၼင်ႇၵဝ်ၵႇ။ ၵူၼ်းပိုၼ်ႉတီႈဝႃႈတႄႉ ၸဵမ်မိူဝ်ႈပူၼ်ႉမႃးလၢႆဝၼ်းၼၼ်ႉ ၽၢႆႇၸုမ်းဢေႇဢေႇၶဝ် လႆႈသင်ႇလၢတ်ႈၵူၼ်းပိုၼ်ႉတီႈ ၸိူဝ်းမီးတီႈ ရၶႅင်ႇပွတ်းႁွင်ႇၼၼ်ႉဝႃႈ ႁႂ်ႈႁၢင်ႈႁႅၼ်း ၶဝ်ႈၼမ်ႉတၢင်းၵိၼ်လႄႈ ပၢႆးႁူမ်ႇလူမ်ႈဝႆႉ ၼႆယဝ်ႉ။

ငဝ်ႈငႃႇ

• VOA News. "ရခိုင်မှာ တိုက်ပွဲစတင်" — VOA News, November 13, 2023