Wn/nan/香港政府：「光復香港，時代革命」有港獨含意

【2020年7月4日訊】

「光復香港 時代革命」的旗仔。

示威者展示「光復香港 時代革命」的旗仔。

香港特別行政區政府表示，這個月新曆初一一寡參加非法、暴力活動的人捌共「光復香港 時代革命」的口號展示出來抑是捎來藏。香港政府發言人佇新曆初二就發表聲明，「光復香港 時代革命」的口號表示「香港獨立」，嘛有主張分離、改變香港特別行政區的法律地位、予國家政權倒台的意思。

港府發言人講，特區政府對任何欲挑戰中華人民共和國的主權、統一佮疆域完整的作為表示嚴厲譴責。發言人講，《中華人民共和國香港特別行政區維護國家安全法》（簡稱《港區國安法》）袂允准分裂抑是推翻國家政權、危害國家安全的其他作為佮活動。特區政府呼請市民毋好違法。

鄭若驊：「光復香港 時代革命」佮港區國安法無關係

香港特別行政區律政司司長鄭若驊講，「光復香港 時代革命」這八字的意思也毋捌改變過，絕對袂因為《港區國安法》通過了後，就雄雄有無仝的意思。曷若佇舊年（2019年）的區議會選舉的時陣，這句話是按怎煞無問題咧？伊講彼是彼久的選舉主任所主意的。

郭榮鏗：「文字獄」

香港公民黨立法會議員郭榮鏗共批評做「文字獄」。一寡民主派議員佇坐位展出白紙佮規張空白的牌仔，呼應社交媒體反對「白色恐怖」的「派白紙運動」。

毋過，佇反修例運動期間當選的區議員，煞有無𫝛意見。

屯門區議員李家威佇社交網站頂面堅持喝出伊的口號，閣講其他口號攏袂較好這八字字會用得代表反修例運動的聲音；毋過嘛有捌參加初選的本土派成員就明呼，口號會用得改變、無需要傷過踏硬，未來盡量袂佇公共場合來使用。

也有民主派議員認為，網民主動發起的二次創作、使用八个空格來暗示「光復香港 時代革命」的口號，嘛是一款好方法。

面冊：盡辦法拒絕政府違反人權法移除內容的請求

「光復香港 時代革命」這个口號佇社交平台面頂，敢閣會用得繼續展出來？面冊（Facebook）答覆講，𪜶若咧處理政府刣文要求的時陣，嘛會盡辦法拒絕違反國際人權法的行為。

面冊發言人講，𪜶認為言論自由是基本人權，嘛支持逐个人攏會用得表達家己的想法，無需要替家己的安全來掛心。面冊閣表示，「政府請求刣文」有全世界統一的做法，所有方法攏是徛踮𪜶的政策、彼跡的法律佮國際人權標準，而且會將違反國際人權法的要求共拒絕覓咧。

圖集

• 
  示威者展示「香港獨立」的旗仔。
  

  圖片來自：維基百科用戶－Wpcpey
• 
  示威者展示「光復香港 時代革命」的旗仔。
• 
  示威者展示「光復香港 時代革命」的旗仔。

消息來源

• 【政情】國安法禁「光時」口號　民主派「白紙」抗議　本土派反應兩極，《Now新聞台》，2020月07月03日．
• 陳曉慶，鄭若驊：「光復香港時代革命」解釋絕非因國安法改變，《香港電台》，2020月07月04日．
• 梁美芬指提「光復香港時代革命」口號的人不符參選資格，《香港電台》，2020月07月03日．
• 郭榮鏗：政府對「光復香港」口號聲明是文字獄，《香港電台》，2020月07月03日．
• 政府稱「光復香港 時代革命」涉港獨　facebook：盡量拒絕政府違人權法移除內容請求，《明報》，2020月07月03日．
• 香港特別行政區政府，特區政府聲明，《香港特別行政區政府新聞公報》，2020月07月02日．