Wn/nan/白俄羅斯反對派總統候選人佇明斯克舉行大型集會

【2020年8月6日訊】

白俄羅斯得欲佇8月9日舉行總統選舉。7月30日拜四，反對派候選人 Sviatlana Tsikhanouskaya（Святлана Ціханоўская）佇白俄羅斯首都明斯克（Мінск）舉行集會。根據報導，這擺的集會有數萬人參加，是白俄羅斯十年來上大的政治活動之一。

根據白俄羅斯內務部拜五的報告佮白俄羅斯獨立人權中心「Vyasna」拜四的報告，草其略仔有 18,250 至 63,000 人參加這場集會。集會咧討論的一个主要問題是欲共以前因為政治運動予人掠去關的政治犯放出來。

集會大約佇當地時間下晡6點開始。頭兩點鐘，政治犯的朋友和親屬作出發言，嘛有白俄羅斯音樂家、劇作家佇發言之間進行表演。

Tsikhanouskaya 佇暗時8點左右到位。伊提及5月予人捎去的翁婿 Siarhei（Сяргей），並且承諾會舉行新的、完全公正的選舉，舉行憲法公投，取消現任總統盧卡申科（Алякса́ндар Рыго́равіч Лукашэ́нка）自1995年以來發布的所有修正案。伊拜託逐家共伊支持，閣特別請選民踮投票日愛出來投票。Maria Kalesnikava（Мария Калесникава）佮 Veranika Tsapkala 嘛有發言，前者是予人逮捕並且予人禁止參加選舉的 Viktar Babaryka（Віктар Бабарыка）的競選活動負責人；後者是白俄羅斯潛在的總統候選人 Valery Tsepkalo（Валерый Цапкала）的某，不而過𪜶翁已經對該國脫走離矣。

佇活動進前大約一工內，白俄羅斯共和國國家安全委員會掠著33位俄羅斯人，講𪜶是俄羅斯委任的僱傭兵，據稱𪜶準備欲組織佮選舉有關的「恐怖主義」。政府嘛佇集會期間加添保安措施。