Wn/nan/尼加拉瓜十一月做「鐵颱」上無有二十八人死亡

【2020年11月20日訊】

「約塔」登陸尼加拉瓜。

今年大西洋頭一粒五級熱帶氣旋「約塔」（Iota），伊的中心附近上大風速已經到逐點鐘兩百六十公里，毋但今年通大西洋上強，閣是大西洋有史以來上晏出現的五級熱帶氣旋。尾仔伊佇當地時間十六號暗暝登陸尼加拉瓜（Nicaragua）好勒佛（Haulover）附近的沿海地區，造成部分所在咧做大水佮水崩山。國家防災機關的報告內底就講，目前上無有二十八人不幸死亡，另外猶有二十九人失蹤。

尼加拉瓜佇兩禮拜前才捌做一滿風颱，號做「伊塔」（Ita），逐跡的避難資源猶未恢復完全，袂赴來應變這滿的風災，所以政府無法度通保證完全控制災害。

較要緊的就是講，今年大西洋彼跡的熱帶風暴（也就是咱咧講的「風颱」）到這久為止已經生了三十粒，嘛創造了有史以來風颱做上厚的紀錄。

美國共熱帶風暴號名是對一九五〇年才開始的。當初時是號無線電字母的呼號來做風颱名，過無偌久就使用人名，逐年對Ａ字頭一直排到Ｗ字頭（排除Ｑ、Ｕ、Ｘ、Ｙ、Ｚ這五个字母）攏總二十一个名，一般來講因為大西洋的風颱較無做甲親像西北太平洋遐爾厚，所以誠罕得用Ｗ字頭的名稱；毋過一直到二〇〇五年，彼年熱帶風暴實在生了傷濟粒，名號表嘛咧欲用了，美國的國家颶風中心（National Hurricane Center）嘛毋捌拄著這款代誌，就決定講以後風颱名若用了，紲落去就開始號希臘字的名稱，對「阿利法」（Alpha）排到「奧美加」（Omega）。彼年才號到「而塔」（Zeta）就創紀錄，想袂到今年就號到「約塔」（Iota），比十五年前猶閣較𠢕生風颱。

美國國家颶風中心表示，凡勢是反聖嬰現象（La Niña）、海面溫度當咧熱烙所致，今年大西洋的熱帶氣旋較厚往年。

消息來源

• Hurricane Iota: Category four storm hits Nicaragua，《英國廣播公司》，2020年11月17日．
• Amir Vera 及 Hollie Silverman，Hurricane Iota makes landfall as a Category 4 storm，《美國有線新聞網》，2020年11月17日．
• Max Golembo，At least 26 dead in Central America from powerful Hurricane Iota，《ABC7 News》，2020年11月20日．