Wn/cdo/CP22頭蜀日 逿雨無降熱度
【2018年5月19號上海訊】
今旦（19號），同人即賣會Comicup敆上海其國家會展中心舉辦。茲蜀回Comicup是第22回，共總做兩工，今旦是頭蜀日。茲蜀回展會，同人館有專區31萆，比去年暝価10萆。同人攤位邊兜固有Lolita洋裝商區。展會也開設了企業館，敆同人館對面。
Comicup開門前幾點鐘，已經有野価儂趕去排隊了。伊各儂都卜愛做頭陣，搶掏第一中意其乇。今旦七點左右，微博用戶「CoCo是大魔王」發了蜀批相片，分別反映四點、五點、五點半、六點會展中心外兜儂排隊其樣式。有其儂起五更早就拖𡅏行李箱躄來，坐塑料凳，或者直接坐地兜。現場儂稀涼涼。遘五點鐘，儂變価去。有其徛，有其坐。有其敆蜀堆攀講，有其自家客佻手機。過了半點鐘，隊列大體形成。之後儂就罔變罔価了。雖然早頭逿雨，也𣍐攔來客。
-
下晝一點兩字，維基記者排上隊 -
乍過五分鐘，記者後兜，覷𣍐遘尾 -
行裏會展中心大門，等驗票其隊長長陣
維基記者下晝一點十分排上隊，乍過五分鐘，後兜隊列就看𣍐著尾了。排了半點鐘，最後驗票行裏。
-
霹靂布袋戲現場展示 -
嗶哩嗶哩展區，舞臺懸頂儂對𡅏屏幕表演 -
手機遊戲《命運：冠位指定》
下晝，企業館活動野価，吸引儂圍了蜀環復蜀環。
.jpg)
敆同人攤位，部分商品野受關注。早頭無偌𣆯，馬上就賣澈。讓下晝遲到其儂盡去野退悔，但是復無奈何。同人專區臺中，FATE-迦勒底、凹凸世界、蝴蝶蘭其世界等等，攤位數量相對會価。
-
東方幻想鄉專區 -
蜀萆號𡅏「新風幻想」其社團其攤位
東方幻想鄉專區聚集了蜀批東方計劃其同人社團，賣自家其歌共畫。參與了日本同人社團「魂音泉」歌曲製作其音樂人「抹」也來遘現場，乞顧客簽名，敆蜀堆䀹相。社團「二維鏡像」其攤位前兜，顧客也買了書去排長隊，等待社團其儂敆頭頁簽名、畫畫。現場有儂做蠻笑講：「來遘租塊，有蜀種錯覺，就是東方固敆𡅏流行，固未過氣。」
茲蜀回展會現場，通訊信號𣍐好。維基記者使中國電信共中國移動，試𡅏拍電話、發短信，都野困難。電子支付也無能耐使，現金乍固好使仂囝。嚽讓蜀部分來客大告：「盡像轉遘原始時代！」有其形容自家行裏了「結界」。會展主辦方講，現場儂實在恰価，開了信號車，固是無乇使。復講4G通道塞去了，建議大家使3G或者2G網絡。