Wn/cdo/CP22頭蜀日 逿雨無降熱度

From Wikimedia Incubator
< Wn‎ | cdoWn > cdo > CP22頭蜀日 逿雨無降熱度
Jump to navigation Jump to search
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.

【2018年5月19號上海訊】

今旦(19號),同人即賣會Comicup敆上海其國家會展中心舉辦。茲蜀回Comicup是第22回,共總做兩工,今旦是頭蜀日。茲蜀回展會,同人館有專區31萆,比去年暝価10萆。同人攤位邊兜固有Lolita洋裝商區。展會也開設了企業館,敆同人館對面。

Comicup開門前幾點鐘,已經有野価儂趕去排隊了。伊各儂都卜愛做頭陣,搶掏第一中意其乇。今旦七點左右,微博用戶「CoCo是大魔王」發了蜀批相片,分別反映四點、五點、五點半、六點會展中心外兜儂排隊其樣式。有其儂起五更早就拖𡅏行李箱躄來,坐塑料凳,或者直接坐地兜。現場儂鬆鬆喏。遘五點鐘,儂變価去。有其徛,有其坐。有其敆蜀堆攀講,有其自家客佻手機。過了半點鐘,隊列大體形成。之後儂就罔變罔価了。雖然早頭逿雨,也𣍐攔來客。

維基記者下晝一點十分排上隊,乍過五分鐘,後兜隊列就看𣍐著尾了。排了半點鐘,最後驗票行裏。

下晝,企業館活動野価,吸引儂圍了蜀環復蜀環。

《我其英雄學院》其coser來遘同人館「迎乇」。旗懸頂寫𡅏「雄英高等學校新入生募集,歡迎棄暗投明」

敆同人攤位,部分商品野受關注。早頭無偌𣆯,馬上就賣澈。讓下晝遲到其儂盡去野退悔,但是復無奈何。同人專區臺中,FATE-迦勒底、凹凸世界、蝴蝶蘭其世界等等,攤位數量相對會価。

東方幻想鄉專區聚集了蜀批東方計劃其同人社團,賣自家其歌共畫。參與了日本同人社團「魂音泉」歌曲製作其音樂人「抹」也來遘現場,乞顧客簽名,敆蜀堆䀹相。社團「二維鏡像」其攤位前兜,顧客也買了書去排長隊,等待社團其儂敆頭頁簽名、畫畫。現場有儂做蠻笑講:「來遘租塊,有蜀種錯覺,就是東方固敆𡅏流行,固未過氣。」

四點左右,蜀隻管攤其寫完「收攤,去客佻啦」,也離開了攤位

茲蜀回展會現場,通訊信號𣍐好。維基記者使中國電信共中國移動,試𡅏拍電話、發短信,都野困難。電子支付也無能耐使,現金乍固好使仂囝。嚽讓蜀部分來客大告:「盡像轉遘原始時代!」有其形容自家行裏了「結界」。會展主辦方講,現場儂實在恰価,開了信號車,固是無乇使。復講4G通道塞去了,建議大家使3G或者2G網絡。

消息來源[edit]

原創報導
這報導有維基記者第一手新聞。可以看討論頁了解詳情。