Wn/cdo/2018年福建省中考今旦開考

From Wikimedia Incubator
< Wn‎ | cdoWn > cdo > 2018年福建省中考今旦開考
Jump to navigation Jump to search
系列報導
更新

【2018年6月22號福州訊】

今旦(22號)早頭八點半,福州市82個考點其鈴聲同時響起,標誌2018年中考正式開始。全省二十幾萬初中畢業生,敆𡅏面臨伊各儂人生臺中其頭蜀回重大考試。

日中十一點,語文科考書結束已有半點鐘。維基記者經過八一七路,孔廟附近是延安中學考點,遠遠看見學院前巷拉起了警戒線,有警察維持秩序。向學校方向行,儂罔變罔価,墿邊聚集了考生家長,每個儂都伸長脖子等𡅏考場開門。日中日頭野熱,大家都使手裏勢其蒲扇、紙搧,但是目睭都無離開校門。媒體舉起䀹相機,敆野懸其地方等待。

十一時左右,考場開門,行敆前兜其考生大多抬頭挺胸、面含微笑,家長迎上前講:「辛苦了!」無家長接其考生,有其蜀隻儂離去,有其共同學齊行,聽遘蜀聲答案,會有同行者斥責:「𣍐使對答案!」

無過偌𣆯,就有儂講作文題是《充電》,意思是人儂著多次充放電。某某微信臺發起其投票,過半儂認為該題目「难度一般般,高分𣍐簡單」。

下晝考數學,暝晡野価考生敆社交平臺懸頂發表言論,講數學野難,「作文寫充電,見覺數學乍是真其需要充電」。

據悉,今年福州市共總有六萬左右考生,未來蜀日半,固著完成物理、化學、英語、歷史、政治其考書。固有六萬六千名初二學生參加24號下晝其生物、地理考書。

消息來源[edit]

原創報導
這報導有維基記者第一手新聞。可以看討論頁了解詳情。