Wn/cdo/高考尾科考完了 有儂輕鬆有儂啼

From Wikimedia Incubator
< Wn‎ | cdoWn > cdo > 高考尾科考完了 有儂輕鬆有儂啼
Jump to navigation Jump to search
The entrance examination to college of Fujian in 2018(HUA QIAO MIDDLE SCHOOL OF CHANGLE).jpg
系列報導
更新

【2018年6月8號福州訊】

今旦(8號)是中國大陸高考其尾日。外語是高考尾尾蜀科,下晝三點開始考。

今年外語考試,福建考其是全國一卷。英語閱讀題有蜀篇文章,講遘以前人類盡少交流,互相獨立,全世界有大概12000種語言。之後人類發展,稠稠交流。同時,世界語言數量也敆𡅏變少,現在僅長6400種,其中有3200種語言使用者無超過6000隻儂。固講非洲語言第一豐富,有其國家語言伓啻蜀種。

五點收卷。

福州第三中學考點,外語固未考完,校門外兜就有野価儂,大部分都是考生其厝裏儂。有爸嬭,也有老儂,有其蜀厝都出來了。考完固未開門其時候,門兩爿考生共厝裏儂都敆𡅏等,有其攀講,有其無講話。大門乍開,就有考生當𣍐殆躄遘外兜。也有考生慢慢行,面𡅏無表情。固価考生盡像擔做蜀下卸去,微微笑𡅏離開考場。有考生看見自家爸嬭,盡去野激動,躄過去抱敆蜀堆,目滓流落拭𣍐澈。圍𡅏看其儂此刻鼓掌。有其固未看見自家其囝伲,就徛𡅏覷考生行出。有其招手討依命。

敆長樂第一中學考點,也有野価家長敆門兜等考生。等伊各儂走出其辰侯,大家都野歡喜。

採訪[edit]

今旦長樂其維基記者去長樂一中考點,採訪了幾隻敆一中考試其考生。講遘外語考試,伊各儂意見都差不多,下底是對其中蜀隻儂其採訪記錄。

維基新聞

同學汝好!

  • 同學:汝好。
維基新聞

高考考完,有無什乇感受?

  • 同學:三年其努力,敆今旦都值了。
維基新聞

噲今旦其考試,見覺蔣其?

  • 同學:日中其文綜共理綜好考,但是下晝其英語野難。
  • 邊兜其同學:差不多每蜀年都有伓好做其科目,譬如講去年暝就是理綜。

鼓樓其維基記者也採訪了福州三中其學生。下底是對三中考生王佳佳(化名)其採訪。

維基新聞

汝好呀,汝考完試心情何如?

  • :已經𣍐捨了,茲邊其先生、同學、幾年其時間。
維基新聞

噲汝應該卜想對俤儂講謝謝吧。

  • :嗯,感謝其儂野価啊,厝裏儂呀,客佻幫呀。我第一感謝我外嬤。平常爸媽工作野無閑,外嬤就會煮好飯,讓媽媽帶乞我食。外嬤野老了,固著總款麻煩伊。
維基新聞

接下來放假三個月日,拍算做什乇哩?

  • :敆厝看閒書,出門就䀹相。

福州三中畢業學生依楊今旦也轉遘了母校,伊接受了維基記者其採訪。

維基新聞

同學汝好,汝也敆𡅏等儂伓是?

  • :啊無無無。我去年暝也敆租塊考書,仱𡅏蜀週年嘛,就卜想來覷蜀覷,感受囇。
維基新聞

總款呀。噲汝有什乇感受?

  • :我野感動,野感動。今旦大門蜀開,學生行出討厝裏儂。厝裏儂卜裏𣍐裏,就使勁招手,大聲告依命其名字。茲蜀種感覺,就,汝會仈吧。有其學生看見爸媽,做蜀下經𣍐得大啼,躄上去抱,現場掌聲雷動啊。固加學生行出來,有其野安靜,有其微微笑,有其敆攀講,遐辰候正正好日頭落山,照𡅏伊各儂肩頭,嚽就是蜀堆意氣風發其青年行上人生其征途了哇。

消息來源[edit]

原創報導
這報導有維基記者第一手新聞。可以看討論頁了解詳情。