Wn/cdo/香港記協復蜀回發聲明譴責警察阻止記者採訪

From Wikimedia Incubator
< Wn‎ | cdoWn > cdo > 香港記協復蜀回發聲明譴責警察阻止記者採訪
Jump to navigation Jump to search
Hong Kong 20190825 Tsuen Wan March 荃葵青遊行反送中遊行 (48635664402) (cropped).jpg
系列報導
更新

【2019年10月24號訊】

香港記者協會10月21號駃遘十二點其時候發了聲明,譴責警方儥讓記者採訪,對記者發射水砲、拋催淚彈,要求所有警員立即停止干擾、傷害記者其行為,故著向傳媒鄭重道歉。

香港記協其聲明講,只幾月日野価示威活動臺中,警方一直採取妨礙記者採訪其策略,甚至使了過度其、無必要其武力。記協已經野価回表達了不滿,警方無改善,故做故狠。

禮拜日敆尖沙咀,有儂做展覽,講警察「濫用暴力」(資料圖)

香港記協表示,野価隻媒體都有報導,講警方禮拜日暝晡著深水埗處理大型警民衝突事件其時後,開了「水砲車」,開遘蜀條墿,兩回對𡅏墿邊𡅏採訪、䀹相其幾隻記者,直接噴射水柱。

聲明故講,有野価隻記者著旺角採訪其時候,受遘防暴警儥禮貌其對待,講伓好聽其話、拖儂趕儂,銃都掏出來比儂。遘暝晡,蜀批防暴警員𡅏搦示威其儂,趕儥上,卜轉警車,故故神意共催淚彈拋向記者各儂,著野価隻記者頭部上空爆炸,介好許所其儂都有戴裝備。

記協聲明嚴厲譴責警方漠視新聞、採訪自由,野価回針對記者使用伓必要其武力。記協復蜀回強調,言論自由共新聞自由是香港重要其基石,發掘真相是記者其天職,他們無辦法習慣警員濫用武力,講警方著盡駃改正。

警方遘現在故無回應記協只蜀回聲明。

消息來源[edit]

Wikipedia-logo.png
汝可以敆維基百科𡅏看蜀看共這新聞有關係其條目: