Wn/cdo/第四屆福建高校沖繩太鼓冠軍賽開賽

【2018年11月18號福州訊】

今旦（11月18號），第四屆福建高校沖繩太鼓冠軍賽敆福州三坊七巷光祿吟臺舉行。參賽學校有福州大學、福建師範大學、福建師範大學協和學院、閩江學院、華僑大學。

早頭彩排其樣式，這辰候已經有野価儂來覷
沖繩歌手平田大一指導閩江學院其學生

早頭，各隻隊伍彩排。每蜀隻隊伍排練完，都有日本儂講評。

下晝兩點開賽。起頭主辦方先講話，簡單介紹了沖繩太鼓。之後所有拍鼓其儂行遘南後街北勢，開始拍鼓迎乇，總款介行裏光祿吟臺。

閩江學院太鼓隊其儂，表演結束之後徛蜀排聽點評
華僑大學中琉太鼓隊其表演
華僑大學隊表演結束，組成造型

閩江學院隊頭蜀隻表演，使其歌是《三千世界》、《打上花火》（意思是飛上天其煙花）。下首許蜀條歌，是《煙花》其主題曲。《煙花》是蜀部日本其動畫電影，去年熱天其辰候公映。早頭排練其時候，點評其儂就表揚伊各儂使其歌「野新野行時」。接落來是華僑大學中琉太鼓隊。表演完，福建省政府外事辦其儂指出：「華僑大學敆泉州，但是每蜀回大賽，華大都有來。」復請所有儂介鼓掌蜀回。

福州大學隊第三隻演出。伊各儂其配樂是《琉球愛歌》、《鬍鬚伯自耀其獵戶座啤酒》（オジー自慢のオリオンビール）。鼓隊其同學固特神意共音樂胼後其故事講觀衆聽。拍遘第二條歌，雲含不蜀時散去，天藍藍其。表演完，外事辦其儂笑講：「聽見歡樂其歌，天公都作美了。」日本其評委講伊儂伓啻使其歌野歡樂，各儂也有微微笑，會使感染觀衆。之後固講福大其笑是頭蜀名。

福建師範大學協和學院太鼓隊表演。着拍太鼓其儂登場之前，是油紙傘舞蹈
拍鼓其登場
隊員舉起嫩嫩其鼓

福大之後，是福建師範大學協和學院太鼓隊。伊儂使其音樂，頭蜀條是日本其，第二條是中國風格其《水龍吟》。第二條歌開始，四隻儂撐起福州其油紙傘行裏跳舞，之後拍鼓其共𢪱旗其齊上場。評委講伊各儂衣裳野好看，固加裏福州元素、中國元素，讓伊野感動。伊指出，嚽是協和隊頭蜀回試𡅏加裏中國元素，伊由嚽所「會看出協和隊各儂對自家其突破」。

福建師範大學閩琉太鼓隊表演。拍嫩鼓其儂排成蜀隊，做千手觀音其樣式
大鼓隊員登場
除去拍鼓，固有舞扇舞劍

尾尾蜀隻是福建師範大學閩琉太鼓隊。表演前，隊長向觀衆介紹，之後其配樂是《島歌》（島唄）共《仙劍奇俠傳》其歌曲，希望大家感受遘鼓隊各儂卜想表達其感情。頭蜀條歌，拍鼓其儂有時徛成四角，有時圍成環。伓啻有拍鼓，前奏共間奏也有儂手掏𡅏旗行上前首，跳𡅏𢪱來𢪱去。最後展開篆書對聯。第二條歌，嫩太鼓、締太鼓、大太鼓連番登場，蜀隻諸娘囝頌𡅏漢服掏𡅏舞蹈扇跳舞，固有兩隻「劍客」表演滄劍。評委講，師大只回表演，伊看見了自信，各種太鼓都有登場，演技也野霸。固有只価中國元素加裏，比論講旗、漢服、舞蹈扇、劍、橫哨等等。伊感嘆「不愧是連𡅏掏下三回頭蜀名其隊伍」。去年比賽，閩琉太鼓隊是頭蜀隻將本地元素加裏沖繩太鼓其隊伍。遐辰候日本其評委看完閩琉隊其表演，講：「看見沖繩其太鼓敆福建生根發芽，加裏當地元素，我野歡喜。」今年9月其福建省內大學沖繩太鼓社團交流會，外事辦其儂也強調「中華文化茲蠻博大精深」，「著加裏這太鼓裏勢」。遐辰候華僑大學中琉太鼓隊有安排儂掏蜀把合扇𢪱，得遘伊表揚。