Wn/cdo/福建省內大學沖繩太鼓社團交流會舉辦
【2018年9月15號福州訊】
今旦（9月15號），福建省內大學沖繩太鼓社團交流會著福州西湖舉辦。福建師範大學閩琉太鼓隊、福州大學太鼓隊、福建師範大學協和學院太鼓隊、華僑大學中琉太鼓隊、閩江學院太鼓隊參加去交流會。
-
福州大學太鼓隊表演 -
福建師範大學協和學院太鼓隊表演
交流會下晝兩點開始。表演蜀開始，現場就圍去蜀環觀眾。閩琉太鼓隊拍《十二幻夢》《一笑懸命》，福州大學拍《三線之花》《海之聲》，協和學院拍《一笑懸命》《ニアイカナイ》，中琉太鼓隊拍《一笑懸命》《海之聲》《千本櫻》，閩江學院拍《三線之花》。中琉太鼓隊伓啻有拍鼓，固安排儂掏蜀把合扇𢪱。每蜀隻隊表演完，就是問問題其時間。各隊同學共沖繩來其儂就總款互相交流太鼓音樂、動作，日本話共漢語普通話都有使用。
福建省外事辦也派儂參觀交流會。外事辦其儂提出了自家其見解，伊認為各儂拍太鼓，伓啻學習日本其文化，「中華文化茲蠻博大精深，也著加裏這太鼓裏勢。」伊特神意表揚了中琉太鼓隊，表示下蜀回正式比賽其時候，中國元素會是乞分數其重點，譬如講動作、衣裳、音樂，等等。伊固講，現場都是福建儂，表演完𣍐使日本話講謝謝，「嚽都是著注意其地方」。
三點左右，囫圇隻交流會結束。之後，各校隊員䀹相、攀講、拍鼓，復邀請彼此以後來自家大學拍鼓。有其同學拍完鼓笑講：「寢寢表演恰緊張，現在結束去介罔拍，倒固好仂囝。」這辰候固有兒囝哥𠴇𠴇𠳐𠳐跁跚過去摸太鼓，見覺野新奇。鼓隊隊員也教伊儂試𡅏拍蜀拍，固邀請伊儂：「以後裏大學拍鼓呵！」
交流會懸頂，主持其儂宣佈，下蜀屆福建省沖繩太鼓比賽著今年十一月舉辦，所在是三坊七巷。