Wn/cdo/福州東街口嘉年華 固有達明美食街揭牌

From Wikimedia Incubator
< Wn‎ | cdoWn > cdo > 福州東街口嘉年華 固有達明美食街揭牌
Jump to navigation Jump to search
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bāng-buōng.

【2018年2月10號福州訊】

今旦暝晡倛南街

今旦(10號)暝晡,福州八一七路東街口遘津泰路口蜀段墿乞封起去,車都無辦法行裏。奚勢哩?因為租塊舉辦了「東街口嘉年華·狂歡夜」活動。維基記者7點躄遘現場,已經無辦法接近中心區域,離開也野困難。7點半嘉年華開始,墿邊開彩燈,蜀條街都野光,大家紛紛掏出手機䀹像。嘉年華有駃閃、樂隊、武術、模特、街舞、擊鼓舞龍、極限特技、熒光花繩、年代大秀等等節目。現場儂真価,有倛自家覷𣍐著,就肩頭𡅏脢囝,想讓伲囝哥歡喜。同時,墿邊固有野価攤位,有倛剪紙,有倛捏儂囝,有倛做糖畫,有倛做油紙傘,固有儂寫春聯。根據去覷倛儂講,遘今旦10點,鼓樓(鼓屏路共鼓西路附近)固是塞車。

達明美食街

也是今旦暝晡,6點,位於達明路倛達明美食街揭牌開街了。美食街倛特色是閩臺風味,臺灣士林夜市小喫協會、臺南美食協會等等商家都有參與。墿邊倛館店都敆門邊放了電子屏,寫出招牌菜。墿邊有館店,墿中也有餐車。今旦暝晡,墿臺中排了68架餐車。頭蜀日開街儂恰価,也有市民敆網絡懸頂講自家乇都食𣍐著。達明路附近學校𣍐少,之前𡅏美食街倛消息乍出,有倛學生也做蠻笑講:「以後暝晡就無心學了。」

南街倛交通管制趁7點開始,遘明旦(11號)半暝晡2點乍會結束。達明路趁今旦開始,每蜀日暝晡6點遘第二日半暝晡2點,車都伓使行裏。

今旦暝晡,趁達明路遘南街,都只蠻鬧熱。蜀隻市民共記者講:「以前𡅏東街口儂就只蠻価,著起地鐵,儂乍變少去。但是講福州儂固是鐘意東街口,儷有機會,就會去東街口客佻。」

消息來源[edit]

原創報導
這報導有維基記者第一手新聞。可以看討論頁了解詳情。