Wn/cdo/福州三中戊戌團拜 新老校友濟濟一堂
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bēng-buōng.
系列報導
更新
【2018年2月18號福州訊】
今旦（18號）下晝2點，福州第三中學舉辦了新春團拜活動。三中新老校友都轉遘學校，共自家倛先生同學攀講，敆學校裏勢躒蜀躒。
採訪[edit | edit source]
團拜會時候，維基新聞記者採訪了福州三中倛林曉楓書記、1994屆倛畢業學生陳今、學生會社工部部長鄭小滿，問蜀問伊各儂轉遘伊母校倛想法。也採訪了去年暝夏天趁三中畢業倛陳同學。仱儂家聽蜀聽看蜀看伊各儂怎講吧。
以下是敆求知湖邊對林書記倛採訪。
先生，祝汝新年好啊！今旦汝轉學校有無發現三中有什乇變化哩？
- 林：茲講今旦伓是？
正是。
- 林：今旦校友都轉來了哇，雅鬧熱。見覺每蜀隻都有新倛變化……都大蜀歲了哇，先生都老去了哇，哈哈哈哈！但是，大家敆蜀堆，就是心情雅愉快嘛。講蜀講，坐下來去攀講儷，茲蜀款感覺雅好。
啊，雅好。（兩隻儂大笑）先生有無想對學校講倛話哩？
- 林：就是祝所有倛校友們身體健康，狗年旺旺旺！
謝謝先生，我祝汝身體健康，萬事如意。
- 林：謝謝！
之後敆新教學樓力行樓前兜倛大榕𣗬下底，採訪了1994屆倛三中畢業生陳今。
新年好啊！汝今旦轉學校有無發現三中有什乇變化哩？
- 陳：變化雅大啊。體育館什乇都變雅好去了。（看蜀看力行樓，罔看罔講）力行樓，嚽舊底都無。
正是。
- 陳：都無，都是新倛。今旦見覺雅高興。謝謝，謝謝。
汝有無什乇話想對學校講哩？
- 陳：祝儂家三中罔做罔好，先生雅霸，學生也雅霸，全國都出名，全世界都出名。
謝謝汝。
之後遘力行樓大樓梯懸頂，採訪三中學生會社工部部長鄭小滿。
同學新年好啊，汝今旦敆學校有什乇感受？
- 鄭：我見覺雅好，雅開心。
有什乇話想對三中講哩？
- 鄭：我希望三中罔來罔好，先生身體健康，同學成績罔來罔好。
謝謝汝啊！
下底是對去年暝趁三中畢業倛陳同學倛採訪。
同學汝好！汝去年暝畢業，今旦轉學校有無發現三中有什乇變化哩？
- 陳：總倛來講，三中變唻固好了吧。門口種滿倛植物，乍起倛石碑《三中賦》，耳邊噴泉水聲，固有歷屆大師校友倛傑出成績。樓梯間各科先生共伊學生所創造倛輝煌，走廊書屋讓樓梯多了許多書香氣，體育館正逐步變唻固好，操場也此刻投入使用了。總倛來講，三中的硬件共軟件正變唻固好。
有無什乇想對學校講倛話哩？
- 陳：敆嚽呢祝願母校三中不斷奮鬥，勇攀高峰，繼續創造新輝煌。