Wn/cdo/留守兒童「𣍐愛挃書僅挃手機」 院士籲設「無網遊日」

From Wikimedia Incubator
< Wn‎ | cdoWn > cdo > 留守兒童「𣍐愛挃書僅挃手機」 院士籲設「無網遊日」
Jump to navigation Jump to search
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bāng-buōng.

【2018年5月31號訊】

明旦就是六一國際兒童節。今旦(5月31號),中國工程院其17位院士聯名呼籲,兒童節著變成「無網遊日」。

前幾日,中國大陸其國家電網公司有蜀萆微信公眾號發了文章。文章講其事計發生敆去年暝熱天。遐辰候,國家電網江蘇省電力公司金湖縣供電公司慰問留守兒童。志願者帶了書共文具送仂囝哥,但是收遘了蜀張字條,寫𡅏:

叔叔我不喜歡你們帶來的東西

我想要一個可以打《王者榮耀》的手機

或者以後你們給我錢,我們自己買喜歡的東西,你們帶來的書和文具我們不喜歡。

謝謝。

翻譯成福州話意思是:

家家我𣍐中意汝各儂帶其乇。我愛挃會客佻《王者榮耀》其手機。或者以後汝各儂乞我錢,儂家自家買中意其乇。汝各儂帶其書共文具儂家𣍐中意。謝謝。

遘尾了,志願者也無送手機。文章發佈之後,乞掏七處傳。《中國科學報》其記者採訪金湖縣供電公司其儂,受訪其儂表示,自家也敆𡅏反思,乞仂囝哥其精神關懷無夠,以後著讓伊各儂稠做「健康其活動」,伓使工工都是遊戲。

有其做科研其儂也注意遘了茲蜀件事計。今旦,17位中國工程院院士敆《中國科學報》聯名發文章,呼籲讓明旦其兒童節變成「無網遊日」。呼籲其文章指出,敆茲蜀日,所有網遊運營服務商著敆某個時段暫停服務器,各大網絡平臺也著主動屏蔽遊戲內容共鏈接。總款好讓仂囝哥暫時離遊戲遠仂囝,享受「健康陽光、簡單快樂」其蜀萆節日。

參加呼籲其院士焦念志講:「爸嬭無共囝,仂囝哥囝就會缺乏外部其支持,來識別、判斷、控制網絡𣍐好其影響。」齊署名其院士王家騏講:「大儂客佻,仂囝哥囝就跟𡅏學。」伊認為成年其儂著做好表率。

消息來源[edit]