Wn/cdo/「瑪利亞」登陸福州連江 風颱回南盪雨野大

From Wikimedia Incubator
< Wn‎ | cdoWn > cdo > 「瑪利亞」登陸福州連江 風颱回南盪雨野大
Jump to navigation Jump to search
參考閩東語平話字其版本。/ Chăng-kō̤ Mìng-dĕ̤ng-ngṳ̄ Bàng-uâ-cê gì bāng-buōng.

【2018年7月11號訊】

早頭9點15分,第8號風颱「瑪利亞」敆福州連江縣黃岐半島沿海登陸,登陸其時候中心附近最大風力有14級(42米/秒)。

風颱登陸之前,連江縣已經敆𡅏拍風盪雨。風颱罔近,風雨罔大。大風掀起浪,幾米懸。雨密密麻麻,拍遘陸地。海水倒灌裏霞浦,主幹道懸頂其積水會積遘骹腹頭。近海其村裏,雨水趁檻門囝其玻璃隙隙漏裏厝,毛巾都無乇使了。

福州市區情況也儥好:三坊七巷幾橷老𣗬乞風吹,砸車懸頂,倒敆墿中;福州大學建築玻璃乞風拍碎;金山高層住宅其玻璃大部分被吹飛,房間裏勢野亂;墿邊芒果固未宿,乞風吹,盪了「芒果雨」……戶外能見度盡低,五米之外看儥清楚乇。風颱是逆時針氣旋,茲回登陸點敆福州北勢,前鋒過境拍西北風,中心過後拍南風夾暴雨。福州人告伊「回南」,有諺語講「風颱儥大,回南倒大」,講其就是回南辰候暴雨成災,比風颱登陸固危險。維基記者敆厝裏看天,雨儥像是蜀粒蜀粒盪,倒像趁天上蜀盆蜀盆潑下來。

「瑪利亞」趁連江黃岐登陸後,一度向福州方向移動,但敆10點左右其辰候,含不蜀時向北勢去,減弱為風颱。有福州儂野驚,講是福州屏山懸頂其「鎮海樓」顯靈。之後風颱會向西北偏西繼續移動,強度也慢慢沰下來,發稿其時候已經變成熱帶風暴,明旦裏江西。

消息來源[edit]

原創報導
這報導有維基記者第一手新聞。可以看討論頁了解詳情。