Wn/az/Böyük futbol Zirədə: “Məqsəd - peşəkar komanda formalaşdırmaqdır”

From Wikimedia Incubator
< Wn‎ | azWn > az > Böyük futbol Zirədə: “Məqsəd - peşəkar komanda formalaşdırmaqdır”
Jump to navigation Jump to search


Bookmark-new.svg
Azərbaycan xəbərləri
Azərbaycanın yerləşdiyi ərazi

Azərbaycanın yerini göstərən xəritə

Azərbaycandakı digər xəbərləri görmək, dəyişdirmək və ya başlatmaq üçün, Azərbaycan Portalına baxın.
Flag of Azerbaijan.svg

8 sentyabr 2014, Bazar ertəsi

Yeni yaradılmış “Zirə” klubu I Divizionda ilk oyununu keçirdi. Zirə Olimpiya Kompleksinin stadionunda MOİK-ə qarşı keçirilən oyunda meydan sahibləri 1:0 hesablı qələbə qazandılar.

Ajiotaj fərqli idi

“Zirə”nin ilk oyunu olduğu üçün bu qarşılaşmaya maraq və yanaşma fərqli idi. Təsadüfi deyil ki, oyunu izləyənlər arasında Peşəkar Futbol Liqasının prezidenti Ramin Musayev də vardı. R.Musayev “Zirə” klubunu təsis edənlərə hörmət əlaməti olaraq, bu qarşılaşmanı izlədiyini bildirdi. Zirə Olimpiya Kompleksinin bir tribunalı stadionunda azarkeşlər də vardı. Fan-klubla yanaşı, komandanı yaşlı nəslin nümayəndələri də dəstəkləyirdi. Heyətində elita təcrübəsinə malik olan futbolçular yer alan “Zirə” məhz azarkeşlərin dəstəyi nəticəsində MOİK klubunu 1:0 hesabı ilə məğlub etməyi bacardı.

Ramin Musayev: “Gələcəyə hesablanmış addımlar atılıb”

Qarşılaşmanı izləyən PFL prezidenti Ramin Musayev oyun haqqında, eləcə də “Zirə” komandası ilə bağlı düşüncələrini jurnalistlərlə bölüşüb: “Hər iki komandanın ifasında gözəl oyun izlədik. Oyun çox xoşuma gəldi. “Zirə” komandası iki ay ərzində formalaşdı. Sevindirici haldır ki, heyətdə yerli oyunçularımız üstünlük təşkil edir. Azərbaycan futbolu adına nə gözləyiriksə, elə bu futbolçulardan gözləyirik. “Zirə” komandasını yaradan, onlara dəstək olanlara hörmət kimi bu gün oyuna baxmağa gəldim”.

Ramin Musayev I Divizionda tətbiq olunan limitlə bağlı da mövqeyini ortaya qoyub: “Bu gün klublar üçün çətin ola bilər, lakin bunların bəhrəsini gələcəkdə görəcəyik. Unutmayaq ki, qarşıda bizi 2016-2020-ci illər gözləyir. İndi bu limit olmasa bəs gələcək yarışlarda biz kimləri görəcəyik? Futbolumuzda gələcəyə hesablanmış addımlar atılıb”.

“Zirə”nin prezidenti: “Biz peşəkar bir komanda formalaşdırmaq istəyirik”

Peşəkar Futbol Liqasının rəsmi saytına açıqlama verən “Zirə” klubunun prezidenti Vüqar Astanov gələcək planlarla bağlı danışıb:

“Planlarımız böyükdür, ona görə də böyük işlər görməliyik. Əsas məqsədimizpeşəkar klub yaratmaqdır. Bunun üçün biz komandanı yüksək şəraitlə təmin etməliyik. Lazım gəlsə, birinci divizionda bir yox, bir neçə mövsüm oynayarıq. Heyətə icarə əsasında oyunçular cəlb etmişik. Amma çox sayda oyunçu ilə müqavilə imzalamışıq. Hazırda bizim aşağı yaş qrupları üzrə komandalarımız yoxdur. Çünki, ilk məqsədimiz I Diviziondakı komandamızı yaxşı vəziyyətə gətirməkdir. Bundan sonra aşağı yaş qrupları üzrə komandalar da təsis edəcəyik. Bütün yaş qrupları üzrə kollektivlər qurmağı düşünürük”.

V. Astanov Zirə camaatının stadiona cəlb olunması üçün müəyyən işlər həyata keçirdiklərini də deyib:

“Bütün işləri 2 ay ərzində həyata keçirmişik. Azarkeşlər stadiona öz istəkləri ilə gəliblər. 1300 nəfərlik tribunamız var, bu gün təxminən 700-800 azarkeşimiz oyuna gəlib. Bunu bir ənənə halına gətirəcəyik. Komandanın 5 sponsoru var, büdcəmiz daimi işləməyə, I Divizionda normal komanda saxlamağa imkan verir. Gələcək planlar isə nəticəyə görə dəyişə bilər. Əgər biz yarışı birinci pillədə tamamlasaq, o zaman sponsorlarla qərar verib, Premyer Liqada fərqli məqsədlər uğrunda yarışacağıq. Əks halda, Divizionda mübarizəmizi davam etdirib, peşəkarlaşmağa çalışacağıq”.

Bəhram Şahquliyev: “Zirəliləri təbrik edirəm”

“Zirə” klubunun baş məşqçisi Bəhram Şahquliyev Peşəkar Futbol Liqasının rəsmi saytına açıqlamasında ilk oyunu və qazanılan qələbəni belə şərh edib:

“İlk oyun olmasına baxmayaraq, komandamız yaxşı futbol göstərdi. Oyuna çoxlu azarkeş təşrif buyurmuşdu. Ümid edirəm ki, bundan sonra oyunlara daha çox azarkeş gələcək. İlk hissədə komandada həyəcan var idi. Oyunumuzda müəyyən problemlər mövcuddur, hələ ki, yeni yığılmış komandayıq. Amma irəlidəki oyunlarda bu problemləri də həll etməyə çalışacağıq”.

Aslan Hüseynov: “Biz hər bir komandaya qarşı mübarizə aparacağıq”

“Zirə”yə ilk oyunda qələbə gətirən qolun müəllifi olan Aslan Hüseynov isə əməkdaşımızla söhbətində belə danışıb:

“İlk oyunda qələbə qazandıq. Qələbə qolunu mən vursam da, bu elə də vacib deyil. Daha çox qol vura bilərdik. Amma ilk oyunun həyəcanı fərqli olur. Bəlkə buna görə şanslardan tam yararlana bilmədik. Buna baxmayaraq, ilk oyunda qələbə qazanmaq xoşdur”.

Mənbə[edit]