Wb/nia/Umanö Nono Niha

Nitöngöni:

• No mufagölösi gila-ila zura (li Indonesia: ejaan) molo'ö Ejaan Yang Disempurnakan Republik Indonesia nifahaö iraono ba zekola ma'ökhö. Börö da'ö fehede nifomendrua no göi mufabali faoma tandra wamabali (-).
• Numero nisura simane "[3]" no nga'örö heza tesöndra ia ba mbuku asli moroi khö Sundermann.

1. Umanö ba we'amöi tome

a. Börö

Ha zi ugu-ugu
Khöu, Salaŵa Helanö?
Ha zi höngö-höngö,
Gözö, satua ba Mazingö?

Ifaoso, ihare'ö
Zumange zi tenga bö'ö,
Ze'ite hili Zeriwao,
Zezai hili Mbotombawö,
Zi teturia zi tehöngö
Nirongo zi sambua tanö.

Oya dome föna.
Tomeu, Salaŵa Helanö,
Awena dome andre,
Öbe'e ba gadi zumauge,
Ze'ite hili Mandrehe,
Zezai hili Ndrawa Ase.

Hulö mbulu geu sadudu,
Domeu, Salaŵa Helanö,
Ba noa sa so furi
Mbuluma sogömi-gömi.

b. Gema

Databua'ö ho'ae, tafalalini, [2]
Databua'ö ho'ae, tafagilo,
Ya'ita tome wotalinga mbatö,
Ya'ita tome wotalu zalo.

Datafazawili hörö zombö,
Datafasalio hiro-hiro.
Datafaedo gaya-gaya waha,
Datafaedo mbisi sesolo.

Yomo ba nomo Zalaŵa Helanö,
Yomo ba nomo Duha Terongo.
Owua khöda dödö, ma'igi-igi,
Owua khöda dödö, omuso.

Me no tatema mbua lahina,
Me no tatema mbua nafo,
Mbuala danga masi-masi,
Mbuala danga idoro
Khö ninada Tuho Barasi,
Khö ninada Tuho Nomo.

Ho ifidi isakai lahina,
Ho ifidi, isakai nafo,
Barö zangehowu öri,
Barö helatö sinundro.
Wa ikholi wino, ifosöri,
Wa ikholi dawuo, ifobeto.

Ho ilau gurakhi ba zi föfö,
No ilau gafoa, hunö wino.
Hulö nilömbu ahe gela-gela,
Hulö nilömbu ahe ngaroto.

Ba he wöi, me no langanga mbua lahina,
Ba he wöi, me no langanga mbua nafo.
Andrö wa sara waŵa lö damanga,
Andrö döfi fasui lö olofo.

A'oi esolo ndraono side-ide,
A'oi esolo ndraono safuo,
A'oi abölö zi tebai mofanö,
A'oi abölö zi tebai milo.

Me no tanganga mbua lahina,
Me no tanganga mbua nafo,
Ösi mbolara ni'otaraŵa,
Ösi mbola ni'ohulayo.

Ösi nuwu zaranö ana'a,
Ösi nuwu zaranö hamo.
Ya'ia dawuo lasaramboi alitö,
Ya'ia dawuo lasaramboi simbo.

Ya'ia sa wino so'uli gana'a,
Ya'ia sa wino so'uli hamo.
Ya'ia mbago mömö sire ana'a,
Ya'ia mbago mömö sire hamo.

Ösi da'ö mbola ni'otaraŵa, [3]
Ösi mbola ni'ohulayo.
Töi nafo si öfa no fatete,
Töi nafo si öfa no faedo.

Afo khöra dome dalinga mbatö,
Afo khöra dome dalu zalo.
Afo domera sanali-nalikhi,
Afo domera sanaho-naho.

Khö ndra inada Si Buruti Bunga,
Khö ndra inada Si Mohua Gafo.
Andrö molaya, tafalili mbatö,
Andrö molaya, tafasui zalo,

Yomo ba nomo Zalaŵa Helanö,
Yomo ba nomo Duha Terongo.
Ba nomo nifadadao ba hösi,
Ba nomo nifadadao ba ndrao.

Ba nomo sobelu bagi ndriŵa,
Ba zolaosi toyo gehomo.
Ba nomo anöita gana'a,
Ba nomo anöita hamo.

Omou, si'ulu Salaŵa Helanö,
Omou, si'ulu Tuha Terongo.
Ba databe'e börö duma-duma,
Databe börö maedo-maedo.

Ya'e raya nirongogu duria,
Ya'e raya, nirongogu embo.
Banua raya Mazingö hönö rozi,
Banua raya Mazingö hönö fao.

Högö raya danö ba wamöbözi,
Högö raya danö ba wamago,
Banua raya sawai balö warökha, [4]
Banua raya sawai bago-bago.

Raya Mazingö sobagi lasara,
Raya Mazingö sobagi nowo.
Ba ha zi taro, hörö golayama,
Ba ha zi taro hörö zebolo.

Siŵa tetaro Salaŵa Helanö,
Siŵa tetaro Tuha Terongo,
Sambua sa Gözö taroma wangetu,
Sambua sa Gözö taroma wukho.

Sambua nata Samagö waulu raya,
Sambua nata Samagö waulu luo.
Sambua raya namada Lauru Mböna,
Sambua Lölömatua Henga afo.

Sambua Lafao adu ba niha raya,
Sambua Lafao adu ba defaoso.
Sambua sa mbalugu Sadumba yaŵa,
Sambua sa mbalugu Samba luo.

Sambua sa Ŵöli soŵaha gana'a,
Sambua sa Ŵöli soŵaha hamo.
Sambua sa duha Mangawöla baŵa,
Sambua sa duha Mangawöla luo.

Ba a'oi raya salaŵa samahösi,
Ba a'oi raya salaŵa sangaro.
A'oi tuha si fahöna ana'a,
A'oi tuha si fahöna hamo.

A'oi raya si teduri-duria,
A'oi raya si tegoso-goso.
Mbanua raya, Mazingö hönö rozi,
Mbanua raya, Mazingö hönö fao.

Ba da'ö zi sökhi börö duma-duma,
Ba da'ö zi sökhi börö wamaedo.
Famaedo Zalaŵa Helanö,
Famaedo Duha Terongo.

Ha nata Samagö waulu raya,
Ha nata, Samagö waulu luo.
Donga ninada Hezara gana'a,
Donga ninada Hezara hamo.

Ba ha khönia döi nono si matua,
Ba ha khönia döi nono latano.
Sambua Waedua mangaraza zi hönö, [5]
Sambua Waedua mangaraza zato.

Sambua Zökhia, si famatua ba langi,
Sambua Zökhia, si famatua ba luo.
Sambua Mbawa manu, sondrou si hönö,
Sambua Mbawa manu, sondrou sato.

Sambua Hörö manu, leke zi hönö,
Sambua Hörö manu leke zato.
Ba sambua Gi'o manu lalai zi hönö,
Ba sambua, Gi'o manu lalai zato.

Ba Tabalonga liu ba niha raya,
Ba Tabalonga liu ba defaoso.
Ono si akhi we'atumbu,
Ono si akhi we'aso.

Khö nata Samagö waulu raya,
Khö nata Samagö waulu luo.
Ba hadia khönia ginua halöŵö dödö,
Ba, hadia. khönia ginua halöŵö mbo.

Khö nata Samagö waulu raya,
Khö nata Samagö waulu luo.
Ilabu mangehao arö gosali,
Ilabu mangehao arö nomo.

Ihaogö khönia mbulu golayama,
Ihaogö khönia mbulu zebolo.
Ihaogö lala gotalua mbanua,
Ihaogö lala gotalua nomo.

Lala khönia dome sahulö möi,
Lala khönia dome sahulö so.
Lala khönia gatia tahö zibaya,
Lala khönia gatia huge noso.

Ba ilau mananö töla heziwala,
Ba ilau mananö töla hezoyo.
Fandru khönia wotalinga mbatö,
Fandru khönia wotalu zalo.

Ba ilau mananö töla wino belu,
Ba ilau mananö töla wino bowo;
Ba ilau mananö töla dawuo sini,
Ba ilau mananö töla dawuo eo.

Ba a'oi fahöna-höna zagahurö,
Ba a'oi fahöna-höna zasoso.
Afo khönia dome dalinga mbatö, [6]
Afo khönia dome dalu zalo.

Ba ilau manguri bawi si matua,
Ba ilau manguri lahumogo.
Ba andrö fahöna mbawinia ba haya,
Ba andrö fahöna mbawi ba mba'o.

Andrö otu a tölu mbawi saitö,
Andrö otu a rua mbawi soyo.
Me ilabu mama'ö-ma'öna,
Me ilabu mangaso-ngaso.

Ba ilabu mangahalö tanö,
Ba ilabu molahoi daso.
Ba andrö fahöna wakhe ba halasa,
fakhenia lö itaha omo.

Khö nata Samagö waulu raya,
Khö nata Samagö waulu luo.
Ba ilabu mo'aya uwu zörömi,
Ba ilabu mo'aya uwu zarao.

Siŵa nuwu zörömi ifatete,
Siŵa nuwu zörömi ifaedo.
A'oi ifonahia wo'ölö-ölö,
A'oi ifonahia wanaro'ö.

Sambua zörömi ba mbumbu gosali,
Sambua zörömi ba mbumbu nomo.
Sangila ö, na aekhu zi tete'e,
Sangila ö, na aekhu zafaito.

Fa lö göna ba nomora ledaŵa,
Fa lö göna ba nomora tuho.
Sambua zörömi ba mbawa duwu-tuwu,
Sambua zörömi duasa nomo.

Sangila ö tome sahulö möi,
Sangila ö tome sahulö so.
Na so dome sanörö olayama,
Na so dome sanörö eno'o.

Sambua zörömi hörö lawa-lawa,
Sambua zörömi wotalu zalo.
Sangila ö tome wotalinga mbatö,
Sangila ö tome si möi yomo.

Sambua zörömi narö zangehowu,
Sambua zörömi narö zinundro,
Sangila da'ö sanaka lahina, [7]
Sangila da'ö sanaka afo.

Na mamidi Zi Buruti Bunga,
Na mamidi Zimohua Gafo.
Sambua zörömi dawöla gana'a,
Sambua zörömi dawöla tuho.

Sangila da'ö ana'a barasi,
Sangila da'ö ana'a hamo.
Fa lö atoto lömbu gela-gela,
Fa lö atoto lömbu ngaroto.

Sambua zörömi dalu golayama,
Sambua zörömi dalu zebolo.

Sangila da'ö ono wobanua,
Sangila da'ö ono woŵalo.
Fa lö elungu niwa talifusö,
Fa lö elungu niwa makhelo.

Sambua zörömi lala ba nidanö,
Sambua zörömi lala ba namo.
Fa lö alau zana'u zinaraeŵa,
Fa lö alau zana'u sinado.

Na so zi mondri solömbu nga'eu,
Na so zi mondri solömbu boto.
Sambua zörömi gotalua mbanua,
Sambua zörömi gotalua ŵalo.

Sangila ö katia tahö mbambatö,
Sangila ö katia tahö la'o.
Na möi khönia gatia tahö zibaya,
Na möi khönia gatia huge noso.

Khö nata Samagö waulu raya,
Khö nata Samagö waulu luo.
Ayania zörömi si fatete,
Ayania zörömi si faedo.

Ayania si lö aya zi hönö,
Ayania si lö aya zato.
Aya khönia wamahö-mahösi,
Aya khönia wangaro-ngaro.

Ba he wöi nata Samagö waulu raya,
Ba he wöi nata Samagö waulu luo.
Da'ö halöŵönia ba we'atumbu,
Da'ö halöŵönia ba we'aso.

Mo'aya lewuö fatariawa alitö; [8]
Mo'aya lewuö fatariawa simbo;
Lewuö möli-möli zahulö,
Lewuö möli-möli zalio.

Ba he wöi lewuö fatariawa alitö,
He wöi lewuö fatariawa simbo.
Töla tetenaulu mbulu,
Töla öröba geho.

Sara taritö zöfu nina,
Sara haria zöfu nono.
Zi mate zombambaya singa,
Zatua zombambaya gumo.

He wöi na atoru mbulu solagara,
Na atoru mbulu sasoso.
Aekhu ia ba darizi menaŵa,
Aekhu ia ba darizi mbaho.

Ba itörö böhö daole-daole,
Ba itörö böhö lakhumo.
Ba hulö mbölödi nifaöndrö,
Ba hulö lula nifaolo.

No itutu mbu'u dölö-tölö,
No idou dawuyu galogo.
Mate da'ö manidi-nidifa,
Atua da'ö maniga-nigaolo.

Manö geheha Zalaŵa Helanö,
Manö geheha Duha Terongo.
Ba götönia ba we'atumbu,
Ba götönia ba we'aso.

Ba atoru mbulu solagara,
Ba atoru na mbulu sasoso.
Atoru mbulunia, ifao ba nangi,
Atoru mbulunia, ifao baoho.

Ba aekhu si tou ba nasi baŵa nadu,
Ba aekhu si tou ba nasi baŵa luo.
Ba hulö duwa niböbözi,
Mane tuwa nibabago.

Göna si tou ba hiu sogötö-götö,
Göna si tou ba hiu songaroto.
Mate da'ö manidi-nidifa,
Atua da'ö maniga-nigaolo.

La'ohe ö ba mbulu zebolo, [9]
Awö khöra dahö ba zörömi.
Awö khöra dahö ba zarao,
Khö nata Samagö waulu raya,
Khö nata Samagö waulu luo.

Andrö wa ero baŵa owuloa,
Andrö wa ero baŵa owulo.
Mbanua raya Mazingö hönö rozi,
Mbanua raya Mazingö hönö fao.

Ba zaröu nata Samagö waulu raya,
Ba zaröu nata Samagö waulu luo,
Mane zi'ulu Salaŵa Helanö,
Mane zi'ulu Tuba Terongo.

Ba zowatö börö zonahia,
Ba zowatö börö zo'omo.
Ba zaröu ninada Hezara Gana'a,
Ba zaröu ninada Hezara Hamo.

Mane sa ninada Bawaulu Mbatö,
Mane sa ninada Tuho Nomo.
Inada yomo Siburuti Bunga,
Inada yomo Simohua Gafo.

Ayau si'ulu Salaŵa Helanö,
Ayau si'ulu Tuha Terongo.
Ayau wö yomo wangazö-ngazökhi,
Ayau wö yomo wangeha-ngehao.

Ayau wö yomo nue dali mbanua,
Ayau wö yomo nue dali ŵalo.
Fondrafö zi no zumawili,
Fondrafö zi no aboto.

Wa öbe'e ba zi dua gosali,
Wa öbe'e ba zi dua nomo.
Zumange khöu dome wotalinga mbatö,
Zumange khöu dome wotalu zalo.
Si'ulu Salaŵa Helanö,
Si'ulu Tuha Terongo!

2. Fanuno sanari

a. Börö

Fagia moyo ana'a, fawude ganöwö, [10]
Baomo Zalaŵa Helanö,
Si mane zanari hae.

b. Gema

He sanaelu sanari-nari,
He sondröni bagi rambudi.
Böi migaözö, mida'i-da'i,
Böi mida'i-da'i wanari.

Lö moroi furida emali,
Lö fönada si manga mböli.
Manö wo zomasido fanari,
Hulö zumbila sanaha angi,
Hulö wönö sangaha-ngahani.

He wöi ua zanaelu, sanari-nari,
Me lasi'u mbagi rambudi.
Hulö fagia-gia nuwu nangi,
Okafu dödö zamaigi-maigi.
He wöi, me manahae, me manari,
Me malimözi mbagi rambudi.

Hulö ni'ezoi nibözini,
Yomo dalinga mbatö sörömi,
Yomo zuzu hare balaki,
Yomo ba nomo zalaŵa hadi.
Ba nomo anöita mbalaki.

Ba he wöi sa naya bagi rambudi,
Nukha zolaya sanari-nari.
He na zotöra si hönö böli,
Zi no mola'a-la'a lagasi.
Zi no mosua-sua mbaeŵa hömi,
Zi hulö ndröfi samö'i-mö'i.

Wa'omasida wamaigi-maigi,
Me humaga-haga rambudi.
Ba he wöi zanaelu sanari-nari,
Me lalega nösi sobari.
Ladölö danga sobaeŵa hömi,

Ba hiza duru sawai uro fusi,
Me lasi'u mbagi wanari. [11]
Fagobi gela-gela balaki,
Ihaga-haga mbo'ö fatambai,
Ba fagobi naya hadoli mbagi,

Andrö tobali dödö zamaigi,
Andrö tödöda ahöli-höli,
Ba zanaelu sanari-nari,
Yomo ba dalu mbatö sörömi,
Yomo ba nomo zalaŵa hadi.

Ba datahalö wadaŵi-daŵi,
He na mböröta wanari-nari.
Ya'e zi teturia, si teholi,
Maedo zanaelu, sanari-nari.

Yöu nata Gindraöhö Gindrali,
Donga Mburuti si tafi'ö angi.
So'aya niru töla zörömi,
Fanikhi mbua lagaene balaki.

Ba he wöi Nata Gindraöhö Gindrali,
Heza tumaro, hörö newali.
Yöu ba hili owoto nasi,
Yöu ba mbalö danö nihözi,
Yöu ba mbalö ndrao ni'azökhi.

Ba he wöi Nata Gindraöhö Gindrali,
Mo'aya kandra, börö zi'öli,
Kandra da'ö zi matua nangi.
Na lö mukandra zi matua nangi,
Humombo ena'ö nga'ukhu nohi.
Moloi ena'ö nga'ukhu zi'öli.
Fofo ena'ö, sihombo, gosali,
Fofo ena'ö, soloi, nose nowi.

Ba he wöi Nata Gindraöhö Gindrali,
Mo'aya sura uwu zörömi.
Ba he wöi sa zura uwu zörömi,
He wöi, me ifale'a, ibokai.

Mane solokhoi Dete Holi,
Yaŵa Dete Holi Balaki.
Ba na so Luo Mewöna, Luo Holi,
Donga Nazarata Nazari,
Nazaria Nazarata Langi.

Ba datahalö wadaŵi-daŵi,
Tafamada-madaŵi torosi, [12]
Tafamahi-mahie riti-riti.
Da'ö mböröta wanari-nari,
Börö me tebago mbarasi.

Alai mbarasi saetu ba ngingi,
Zaetu ba ngingi ndraono sa'iki,
Yaŵa khö Luomewöna, Luoholi.

Ba heza lahalö nuwu mbalaki,
Nitötö da'ö ba duho hösi.
Ba nifoloyo owo fanga'i,
Ba nifa'uröi köfa fogawisi.
Ba nifawude uwu mbarani,
Ba nifagia uwu gawa sauri.

Ba he wöi, me lafawude mbarani,
Ba he wöi, me lafagia gawa sauri.
Ba uliho nitefe'ö ba mbagi,
Ba uliho natafi'ö ba gamuri.
Khöra naya uwu mbalaki,
Ba zi möi manga'i balaki.

Ya'ia Nata Gindröndra Gindröndri
Ya'ia Nata Indrö-Indrölangi,
So'aya taka harimao nasi.

Ba ha samuza luo, samuza i,
Me no awai tebago mbalaki.
Ba iŵa'ö Tauranö Balaki:
"He inagu, börö zamaeri!

Kaoni damba-tambagu wanari,
Kaoni zamahea fanalikhi,
Ba wolili golu esöni,
Tou ba golayama ewali.

Na aekhu ba danö zi sökhi,
Na lafolaya zaembu balaki.
Na aekhu mbarahao fo'ewali,
Na lö tamba-tambagu wanari,
Na lö samahea fanalikhi.

Ba ulau waohasa fa'igi-igi,
Usikhi wakhe fabaya limi,
Uwöwöi wakhe fabaya tamböni.

Ba iŵa'ö Nazarata Nazari:
"He sa Luomewöna, Luoholi!
Kaoni damba-tamba wanari. [13]
Faöndru'ö zamahea fanalikhi,
Khö zi Tauranö Balaki."

Ba iŵa'ö Luomewöna Luoholi:
"He Nata Gindröndra Gindröndri!
Heza zi teturia, si teholi,
Si teturia ba wanari-nari?

Ba iŵa'ö Nata Gindröndra Gindröndri:
"Ya'e nirongogu, Holitalikhi:
Yöu Zidia-dia manu öli,
Ono namada Zuzu asi,
Donga ninada tawuyu nangi,
Ba zi tambai gawuwukha nasi."

Ba iŵa'ö Luo mewöna, Luoholi:
"Ba ae, da'ö faöndru'ö, ae kaoni.
Kaoni samaföfö fanari,
Kaoni samahea fanalikhi,
Khö zi Tauranö Balaki."

Ba maoso Nata Gindröndra Gindröndri,
Ituyu wato si lito ri'i,
Ilabu nowo töla dumusi.
Tumusi khöra hörö newali,
Yaŵa ba Deteholi balaki.

Ba ha samuza luo, samuza i,
Maulu nowo töla dumusi.
Ba i'ohe da'ö ba guli nasi.

Ba samuza luo, me tohare langi,
Mofanö khönia nowo, lö angi.
Moloi khönia nowo lö amuri,
Khö Nata Gindröndra Gindröndri.

Ba ha wa tölu luo, tölu mbongi,
Ha tölu bongi ba guli nasi.
Ba irugi namada Zuzu asi,
Donga ninada Tawuyu nangi,
Ba zi tambai gawuwukha nasi.

Ba irugi dalu mbatö sörömi,
Yöu khö namada Zusu asi.
Ba huhuo khöra lafalali-lali.

Iŵa'ö nata Gindröndra Gindröndri:
"Da'e ŵa khöu danigu, töla möi,
Möido mufaöndru'ö mukaoni, [14]
Khöu Zididia manu uli.
Ukaoni samaföfö fanari,
Ukoni samahea fanalikhi,
Raya khö Dauranö Balaki.
Aekhu raya ba danö zi sökhi,
Raya khö Luomewöna Luoholi."

Ba iŵa'ö amada Zuzu asi:
"Lö fasaule khögu, fatahi,
Hana na möi waföfö wanari,
Hana na möi wahea wanalikhi,
Raya khö Dauranö Balaki."

Ba iwa'ö amada Zuzu asi:
"He Sidia-dia, manu öli!
Ae raya, faföfö wanari,
Ae raya fahea wanalikhi,
Raya khö Dauranö Balaki."

Ba maoso Zidia-dia, manu öli,
Ituyu naya, mako balaki.
Möi ia sa managaŵa, möi mondri,
Si tou ba hele tölu fabali,
Si tou ba hele dua malimözi.

Ba hadia dagaŵania ba wemondri?
Dagaŵa khönia lölö gurakhi,
Ya'ia lömbu za'ua dödö hili,
Famaruka mbulu gamandri.
Awönia mbulu ndrima laosi,
Ba sambua mbanio ba dödö ngamohi.

Ba andrö ilau mamarö, mogozi,
Nifarö da'ö me talu mbongi,
Nihoe da'ö me afusi wali.

Ba he wöi me mamarö me mogozi,
Yöu Zidia-dia manu öli.
Börö zamöri, amohua sibai,
Hulö nitunu tawö hawali,
Hulö nileu tawö zaragigi,
Sagöla huania föna nangi.

Adeha mbaeŵa fabaya tögi,
Moloi wofo fabaya azuni.
A'oi rumöga zökha ba hili.
A'oi fakha'a nono garaŵi. [15]
Afusi si tou nene siliŵi,
Anönö hogu geu uro fusi,
Me la'ago zamöri-möri,
Yöu khö Zidia-dia, manu öli.

Ba ha samuza luo, samuza i,
Me no awai mamarö, mogozi.
Tebua gahe, ifalali-lali,
Itörö nora si siŵa bosi.
Irugi golayama, ewali,
Möi ia sa mondri molömbu ösi.
Ba a'oi toföfö manu safusi,
A'oi tonia manu soladari,
Manu sohala-hala bu mbagi,
Manu sosua-sua börö tu'i,
Me möi ia managaŵa mondri.

Ba ha samuza luo, samuza i,
Ifuli baomo tuho zörömi.
Ba ilabu mangehao, mangazökhi,
Ihalö gela-gela balaki.
Ibe mbala högö sa'i-sa'i,
Ihalö gawi orona ŵöli,
Ba ituyu warökha mbalö gawi,
Faniti da'ö zohili gawi,
Lafangamö-ngamöi ba zanifi.

Ba iŵa'ö Sidia-dia manu öli,
"Tutu ögu mböra ziradi,
Nifatö'ögu ba guli nasi."

Ba lalöwösi mböra ziradi.
Ba hadia nawö wakhe nilöwösi?
Ya'ia gadulo manu safusi,
Adulo manu siladari.

Ba me no mangehao, mangazökhi,
Ba tehua khöra gahe, lafalali,
Mofanö khöra nowo lö angi,
Moloi khöra nowo lö amuri.

Ba ha samuza luo, samuza i,
Larugi dalu löu, talu nasi.

Ba iŵa'ö Nata Gindröndra Gindröndri:
"He Sidia-dia, manu öli!
Fagaölö öda nafo, öfidi." [16]

Ba iŵa'ö Sidia-dia, manu öli:
"He Nata Gindröndra Gindröndri,
Lö ufagaölö nafo, ufidi.
Böi leke-lekedo ba mbagi,
Ba lö uleke-leke'ö ba gamuri,
Fa lö angi zuzumö ba mbagi."

Ba ha ŵa tölu luo, tölu mbongi,
Ha tölu bongi ba guli nasi,
Larugi Deteholi Balaki.

Ba maoso Zidia-dia manu öli,
Ilabu mondri, molömbu ösi,
Ilabu mangehao, mangazökhi.

Ba itoto'ö wakhe nidöngösi,
Ba ihalö gadulo manu safusi.
Itema itanögö, itandri
Ba dete hele tölu fabali.

Ba me moluo, me tohare langi,
Wa ibe börö hendri-hendri,
Löndru gadulo manu safusi,
Dua dalinga ifagöndri-göndri;
Sara nuwu lagaene balaki,
Ba sara danömö zari-zari lai,
Zari-zari luo, aya langi.
Ba dania tazara wadaŵi-daŵi,
Yaŵa danömö zari-zari lai.

Da ŵa ta'osisi'ö zara hakhi,
Yaŵa Zidia-dia, manu öli;
Me irugi dalu newali,
Yaŵa ba Deteholi Balaki,
Ba oi tobali dödö zamaigi,
Me humaga-haga mbölua ngai.

Alai mbölua sangörö si luli,
Khönia mbölua baŵa, bölua döfi,
Zanawö-nawö aya ba mbagi,
Zanui-nui aya nifatali.

Ba iŵa'ö Nazarata Nazari:
"He si Tauranö Balaki,
Hiza Zidia-dia, manu öli!
Labu angehao, angazökhi!

Ba maoso Dauranö Balaki, [17]
Ilau manukhu bu mamao rozi.
Ibe mbala högö sa'i-sa'i,
Ihalö gela-gela balaki,
Ibe naya nitali ba mbagi;
Ilau mo'awi orona wöli.

Ba möi ia ba golayama ewali,
Baewali nitela sörömi,
Khö Zidia-dia manu öli.
Ba no lahekhe mbawa wa'iki,
No ambö dödö zamaigi-maigi.

Lalau fabe'e afo nifidi,
Fabe'e bola ni'okariri.
No lasero lembe rambudi,
Ba lalau molaya, manari-nari;
Lalau mani'u bagi rambudi,
Lafolaya duwu balaki.
Lalili yaŵa golu esoni.
Ba he wöi me lafaföfö wanari?
Ba he wöi me lafahea wanalikhi?

Ahöli dödö zamaigi-maigi,
Me lalega nösi sobari,
Me lö ezai si manö, lö sezai,
Lö famaedora wa'asökhi,
Zi hulö haga mbaŵa na tuli,
Zi hulö haga luo, na tendrindri.
Ba he wöi, me maligoe, malimözi
Khöra naya bagi rambudi?
Zi hulö ni'ezoi, nibözini,
Ton nayara talu newali.
Hulö fagia-gia nuwu nangi,
Mangiwa yaŵa dalu newali,
Yaŵa ba Deteholi Balaki.

Ba zaröu da'ö, na ufadaŵi-daŵi,
Zaröu sa Luomewöna, Luoholi,
Mane zi'ulu salaŵa hadi,
Me no ibago duwu balaki.

Ba zaröu sa Nazarata Nazari.
Mane ninada Tuho Barasi,
So'aya bola ni'ökariri,
Nahia nafo niwa sinatali. [18]

Ba zaröu Zidia-dia manu öli,
Zaröu sa Dauranö Balaki.
Mane zanaelu, sanari-nari,
Mane zondröni bagi rambudi,
Yomo ba dalu mbatö sörömi,
Si mane zanari hae!

+++

Ba da zui tahalö wadaŵi-daŵi,
Me no mege taŵa'ö tatötöi
Yaŵa danömö zari-zari lai,
Zari-zari luo, aya langi.

Ha samuza luo, samuza göi,
Me tedou nga'eu tedou nösi,
Ilau yaŵa modaha, molali,
Ilau molali hulö gaŵöni.
Ba ha samuza luo, samuza i,
Samuza luo, me tohare langi,
Mowua yaŵa ba dödö madulai,
Yaŵa tanömö zari-zari lai.

Ba iŵa'ö Luomewöna, Luoholi:
"Ha zanaro bua, na o'öli,
Khögu danömö zari-zari lai?
Da'ukaoni mba'e hogu gaŵöni,
Ba'e Deteholi Balaki."

Ba iŵa'ö ba'e hogu gaŵöni:
"Da'utarogö mbua, na o'öli."

Ba iŵa'ö Luomewöna, Luoholi:
"Lö lai wanaro bua, na o'öli,
He wöi sa dandra-tandra balazi,
Na ötarogö mbua ba ngamohi?"

Ba iŵa'ö ba'e hogu gaŵöni:
"Ha saraö dödögu omasi,
Duata sa dödögu wa'onai."

Ba iŵa'ö Luomewöna, Luoholi:
"Tenga sanaro bua, na o'öli,
Ya'ugö ba'e hogu gaŵöni."

Ba möi zökha börö zebua si'ai.

Ba iŵa'ö Luomewöna, Luoholi:
"He wöi sa dandra-tandra balazi, [19]
Na ötarogö mbua, na o'öli?"

Ba iŵa'ö sökha börö zebua si'ai:
"Ha saraö dödögu omasi,
Duata sa dödögu wa'onai."

Ba iŵa'ö Luomewöna, Luoholi:
"Tenga sanaro bua, na o'öli,
Na duata dödömö wa'onai."

Ba möi mböhö soŵaha balaki,
Iŵa'ö: "Da'utarogö mbua, na o'öli."

Ba iŵa'ö Luomewöna, Luoholi:
"He wöi sa dandra-tandra, balazi,
Na ötarogö mbua, na o'öli?"

Ba iŵa'ö böhö sowaha balaki:
"Ha saraö dödögu omasi.
Duata sa dödögu wa'onai."

Ba iŵa'ö Luomewöna, Luoholi:
"Tenga sanaro bua, na o'öli.
Tenga sangehao, sangazökhi,
Na duata dödömö wa'onai."

Ba möi mbelu, sa'usö safusi.

Ba iŵa'ö Luomewöna, Luoholi:
"He belu sa'usö, safusi!
He wöi sa dandra-tandra, balazi,
Na ötarogö mbua, na o'öli,
Khögu danömö zari-zari lai?"

Ba iŵa'ö belu sa'usö safusi:
"Ha saraö dödögu wa'onai,
Duata sa dödögu omasi."

Ba iŵa'ö Luomewöna, Luoholi:
"Tema tarogö mbua, na o'öli.
Ya'ugö zangehao, zangazökhi.
Tarogö mbua ba dödö ngamohi,
Me ha saraö dödömö wa'onai,
Me duata dödöu wa'omasi."

Ba da ŵa taböbögö, tafali,
Ba dödö yomo zalaŵa hadi,
Zaröu danömÖ zari-zari lai.
Ayau wö da'ö salaŵa hadi.
Ayau danömö zari-zari lai.

Ba zaröu sa mba'e hogu gaŵöni. [20]
Zaröu mböhö soŵaha balaki.
Zaröu zökha börö zebua sibai.

Manö zalaŵa sombali-mbali,
salaŵa safaito, sanani.
He na zanani ba zi lö sökhi.

Ba zarou mbelu sa'usö, safusi,
Belu sangehao, sangazökhi,
Belu sondrorogö, samaeri.

Mane zalaŵa sosili-sili,
salaŵa sangehao , sangazökhi,
Ba mbanuania fo'ewali,
Na lö tewu'a huku, tobali:
Si mane zanari hae!

3. Fefaöndrusa na molaya-laya

He ihalö ndra'ugö emali!

Hadia nirongogu nirongomi?
Hadia ziruru, sihozi-hozi?
Si bakha ba mbate'e sanaköi,
Ba mbate'e tuho zörömi?
Ruru da'ö mbola afasi,
Khö Zitaunga Siburuti.
Fino da'ö ikholi-kholi,
Tawuo da'ö i'ezo-ezosi,
Bago da'ö idöfa-döfaini.
Ba he wöi, me no isaka ibidi,
Döfa khögu lö irugi mbawa,
Döfa khögu lö irugi ngai.
Kumoto khögu lela, gumoli,
Döfa gilogu fafali-fali.

Ihalö ndra'ugö emali!

+++

He ihalö ndra'ugö emali!

Hiza namada Tuha ba hili,
Me idöni nayania föda,
Mi idöni nayania gari,
Me ifaligoe, walimözi,
Ba alu yaŵa mbanua, ilau angi. [21]
Hulö aekhu nuwu zi tete'e,
Hulö aekhu nuwu ziriri.
Manö lakhömi Zalaŵa Helanö,
Manö lakhömi Zalaŵa Hadi.

Ihalö ndra'ugö emali!

+++

He ihalö ndra'ugö emali!

Hiza namada Tuha ba hili,
Me idöni nayania föda,
Me idöni nayania gari,
Itema igukhui dalu nasi,
Ba faefa nasi, fawöhöi,
Ba faröi nasi, fawöhöli.
Oroma zi laŵira, si tuli,
Oroma zi talou, si tafusi.
Ba tenga si laŵira, si tuli,
Hiu da'ö, segesolo sibai.
Ba tenga hiu segesolo sibai,
Manö zinuturu gowasami,
Khömi sowatö, börö zohadi.

Ihalö ndra'ugö emali!

+++

He ihalö ndra'ugö, ihalö!

Hiza nata balugu Gözö,
Me ilabu mbölödi gorö,
Si tou ba zanazi'u nidanö,
Si tou ba zangembua mbalö molö.
Ba lö na i wotafa, wodölö,
Ba lö na wohelea wosilötö,
Ba no itörö si matua gorö,
Ba lö salai wa'amate gorö.
Da'ö zahakhö dödögu, ahakhö,
Me mate ibö'a-bö'a manö.

Ihalö ndra'ugö, ihalö !

+++

Me ihalö ndra'ugö, ihalö! [22]

Ba hiza na nata balugu Gözö,
Me ilabu mbölödi haria,
Me ilabu mbölödi gulö.
Ba ifugö ba gahe zagö,
Ba aetu ba mbalö dara hösö.
Ba lö na i wotafa, wodölö,
Ba lö na wohelea wosilötö.
Ba no itörö si matua haria,
Ba no itörö si matua gulö.
Ba lö salai wa'amate gulö,
Da'ö i zahakhö dödögu, ahakhö,
Me mate mangiwö-ngiwö manö.

Ihalö ndra'ugö, ihalö!

+++

He ihalö ndra'ugö, ituyu!

Hiza namada Haoguru,
Me ihofi nayania dalu-dalu,
Khönia gadulo manu sangulu,
Yaŵa ba dödö wiga so'osu.

Ba he wöi sa nayania dalu-dalu,
Me itörö gehomo sotanga,
Me itörö gehomo ba dalu.
Ifamatö-matö wöli-wöli,
Ifaneu-neu fa'u-fa'u.
Ba fanala-nala'ö gahe deu,
Ba famaho-mahoi gahe zalu.
Fa lö da'ö alabu zafosu,
Fa lö da'ö alau ni'owalu.
Fa lö da'ö afatö da'io,
Fa lö da'ö tobö'a hulu.

Ihalö ndra'ugö, ituyu!

+++

He ihalö ndra'ugö, itutu!

Hiza namada Laowö gafönu,
Me ilabu mbalazi döla,
Me ilabu mbalazi wönu,
He na sara nakhe itandraölö, [23]
He na dua nohi ifabu'u.
Sambua sa nomo si maulu-maulu,
Sagörö nowi awai itaru,
Ha gasa-gasa gö mahemolu.

Ihalö ndra'ugö, itutu!

+++

He ihalö ndra'ugö, ihole!

Hiza nata Bawaulu Laria,
Hiza nata Bawaulu Fase,
Me i'oniha-niha mboto gae,
Me iwöi-wöi mbalö duhe.
Tobali da'ö ono alawe,
Ono da'ö alawe dome.
He na talinga faraeŵe-raeŵe,
He na zawali ngamohi ma'ae.
He na ma'ae ba dalu zanaere,
He na zambö-ambö danga mba'e,
Zi biha sa danga mbo'ole.

Ihalö ndra'ugö, ihole!

+++

He ihalö ndra'ugö, itutu!

Hiza ninada buruti handru,
Me ilabu manukhu-nukhu,
Uwai laosi sanuge gamu'u,
Uwai nago matua zukhu tandru.
Me ifazawili gahe mbu,
Me ifasalio gahe mbaru.
Sageu mate ahötö naru'u,
Sageu gaŵöni mangalau hogu.

Ihalö ndra'ugö, itutu!

+++

He ihalö ndra'ugö, ihole!

Hiza wino ba ndraso mbogia,
Hiza wino ba ndraso mbogae.
He na zi samba si'u goli-goli,
He na zi matonga urö ŵe.
Ba he wöi ine no langanga, langaole,
A'oi adölö hörö zalege, [24]
Ahori möi zi fabiti ahe.

Ihalö ndra'ugö, ihole!

+++

He ihalö ndra'ugö, itutu!

Hiza nakhe ba ndraso honu,
He na nituhi tanö famu'u,
He na nisalogoi fama'uru.
Ba laru khönia awuyu gelefu,
Ba laru khönia atua ni'owuru.

Ihalö ndra'ugö, itutu!

+++

He ihalö ndra'ugö, ihole!

Hiza Nata Bawaulu Laria,
Hiza Nata Bawaulu Fase,
Ba sara zi'onia börua,
Ba sara zi'onia akhe.

Ba itaru'ö bauwu hohou,
Ba itaru'ö bauwu nene.
Ba tobali eu lataha maru,
Ba tobali eu zi manaere akhe.
Eu sobowo dawö-tawö,
Eu sowua harinake,
Eu lakhö-lakhö mburu'u,
Eu lakhö-lakhö ge'e.

Andrö wa sanalagu guro kowu,
Andrö wa sangosa guro nene.
Andrö dalima mamahea mburu'u,
Andrö dalima mamahea ge'e.
Diwo da'ö nono alawe,
Khö namada Bawaulu Dehe.

Ihalö ndra'ugö, ihole!

+++

He ihalö ndra'ugö emali!

Hiza mbawi duada Solu'i,
Alai mbawi nitaya, nihagi,
Tou barö mbatö naha gosali,
Tou ba ngai lösu daha ndraowi.

No mato felelima alisi, [25]
Ba he wöi, me lakhokhoi, latawi?
Tofana ia ezai rigi-rigi,
Tofana ia ba mbalö newali.
No möi wöha-wöha möli-möli,
Mane lakhömi Zalaŵa Hadi.

Ihalö ndra'ugö emali!

+++

He ihalö ndra'ugö emali!

Hiza Warökha Luo, Lagae Bögi,
Me ibago wato si lito laŵa,
Me ibago wato si lito ri'i.

He na folobö-lobö laewawa,
He na folobö-lobö gaŵöni.
He na nete-netera ba nasi,
Ba wangai aramba sebua li.

He na zi fulu hagu te'oli,
Ha sambua tekoko, tebözi,
Ba a'oi sa molili zoya sibai.

Ihalö ndra'ugö emali!

+++

He ihalö ndra'ugö emali!

He wöi Warökha Luo, Lagae Bögi,
Me ibago nayania föda,
Me ibago nayania gari.

Ba ha zamago ayania föda,
Ba ha zamago ayania gari?
Ba he na Laenga sowaru wögi,
Ba dane-danenia mbalö duhi,
Ba he na gokhönia mbözi-bözi,
Ba forökhönia duru si akhi.

Ba he wöi, me maulu nayania föda,
Ba he wöi, me maulu nayania gari.
Mane sa'iki zule ba wogai,
Mane si fao gasi-gasi,
Hulö zörömi wolo-wolo ngai.

Ihalö ndra'ugö emali!

+++

He ihalö ndra'ugö, itutu! [26]

Hiza ninada Kabölua Manu,
Me ifahede nayania sigu,
Alaido zigu, töla zi ŵalu,
Yaŵa ba mbawa hae tuwu-tuwu.
Ba he wöi, me ifahede nayania sigu,
Mane sanikhi hambo tanö yöu,
Hulö mbehu gai daru mbumbu,
A'oi moweugu ziraha baulu,
A'oi me'e ziraha ba dalu.

Ihalö ndra'ugö, itutu!

+++

He ihalö ndra'ugö, ihalö!

Hiza Nata Balugu Gözö,
Me ilaba mbölödi mböwö.
No ifugö ha zologotö,
Aetu mbalö ba mbawandruhö.
Ba silu uli mbawi satabö,
Ba tafa khönia nigötö-götö.
Ba hezo tou harinake tawö,
Ba dölö kundri luo, kundri dahö.

Ba ha samuza luo, ha ma'ökhö,
Me itörö Salaŵa Helanö,
Ba fakhai ba dangania gundri dahö,
Ba izozo mbawania tawö-tawö.

Ihalö ndra'ugö, ihalö!

4. HENDRI-HENDRI

1. Baŵa moroi yöu,
Bu luo moroi raya,
Ba faoma fandrundru haga.

2. Hulö faefo niha yöu,
Möi ia ba Mazingö,
Manofu si a'a mböwö.

3. Hulö afatö gela-gela, [27]
Hulö ateu wale-wale;
Andrö sibai lö fahole,
Me awönia ba wolare.

4. Hulö mbalaki Lahömi,
Hulö mbalaki Gombu,
Ba lafatötö worudu,
Ba hulö mbowo sangölu.

5. Manugu manu safusi,
Manugu manu soyo,
Tatema mbe' lakhö garawi,
Na lö fao giwo-iwo.

6. Manugu manu safusi,
Manugu manu saitö,
Tatema mbe lakhö wötö,
Na lö fao ba wamöbö.

7. Halö gela-kela guaza,
Yomo Zalaŵa Helanö.
Hulö gela-kela mböhö,
Afatö waha zogamö,
Aetu mbagi zanui arö.

8. Hönö geu ba danö,
Yomo Zalaŵa Helanö.
Ha sageu wösi,
Soroma bulu ba nasi,
Balazi nuwu zikoli.

9. He wa lö tahumbaö.
Yomo Zalaŵa Helanö.
Ba he wa lö tatehe,
Ba nukhada ele-ele.

10. Hulö fabözi Laowömaru
Yomo Zalaŵa Helanö.
Hulö fabözi La'omili,
Ha samuza famözi
Mbagi haria dalu nasi.

Umbu

• Heinrich Sundermann, Niassische Texte Mit Deutscher Übersetzung, 's-Gravenhage, 1905, nga'örö 1-27.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö