Wb/nia/Tuada HO sanaŵa Onozitoli

No mudada raya danömö niha,
no mudada raya danömö zato.
Datölu danömö zihönö,
datölu danömö zato.

Tahalö börö dumaduma,
tabe börö maedomaedo,
Tuada Hiawalangi Adu,
tuada Hiawalangi Luo.
Me tedou atö niha ba danö,
me tedou atö niha ba ndrao.
Awai sanöi ba lali gawöni,
awai sanöi ba lali gewo,
Mbalazi wa'ato niha ba mbanua,
mbalazi wa'ato niha ba ŵalo.

Tahalö börö dumaduma,
tabe börö maedomaedo.
Raya ba Nakhelauwe,
raya ba mbanua Lahemo.
Tuada Ho Salaŵa Mbanua,
Tuada Ho Tuha Terongo.
Sokhö afo silima endronga,
sokhö afo silima fao.
Sokhö ledaŵa omo tuho,
sokhö tomosa orahua zato.
Sokhö afore si'öfa-hala hala,
sokhö fali'era fanulo.
Sokhö lauru silima dumba,
sokhö saga ni'osilatao.
Sokhö godia balö gondrekhata,
ondrekhata ayania hamo.
Ya'ia zahuwa wangazö'azökhi,
ya'ia zahuwa wangeha'ehao.
Aya namania lö iböhöli,
Aya namania lö ibato.

Dunae khönia tambali nga'eu,
dunae khönia tambali mboto.
Ya'ia Nandrua Eregowasa,
yaia Nandrua Erelambo.
Ya'ia zao'ötö mbola lahina,
ya'ia zao'ötö mbola nafo.
Daönö khöra nono situmbu,
daönö khöra nono si so.
Daönö danömö zihönö,
daönö danömö zato.

Da'e duria sitehöngöhöngö,
da'e holi site'oso'oso.
Meziŵa no lalau owasa,
meziŵa no lalau lambo.
Oi owasa saelo tanö,
oi owasa saelo dao.
Meno alua gowasa safuria,
Meno alua gowasa adulo.
Möi ndraono wangosisi'ö,
möi ndraono wamondrondrogo.
Hadia zöndra nono wobanua,
da'e niŵa'ö nono woŵalo.
Oi zara omuso-dödö,
oi zara itögi mbo.
Ha da'e zambö omuso-dödö,
ha da'e zambö itögi mbo.
Aweda Nandrua Eregowasa,
aweda Nandrua Erelambo.
No aitö za'a duru,
aitö za'ania ba ngaroto.
Tetutu dödö yaŵa gate,
tetutu dödö yaŵa mbo.
Yomo khö Ho börö zatua,
yomo khö Ho Tuha Terongo;
Andrö mangea khönia dödö mangerangera,
mangea khönia dödö mamotomoto.
Yaŵa ba dete hare tawöla,
yaŵa ba dete hare tuho.
Andrö ilau khönia mukoli,
Andrö ilau khönia milo.
Mofanö mangonangona,
tebua mamaromarongo.
Fao khönia naya totoa mburusa,
fao khönia naya totoa doho.
Fao khönia mbalaki gawu,
Fao khönia gana'a ba holo.
Ihene nasi baŵa ladu,
ihene nasi ba luo.
Me ihalö hae molombase,
me ihalö hae metebato.
Ba luaha Nidanoi,
ba nene ba zodaso.
No i'ila guli wakhe,
no i'ila guliho.
I'uröi nene mafi miraya,
nene mafi ba gaekhula luo.
Me irugi namö gara siheu,
I'ila zimbo si'oroi ŵalo.
Wulö khönia dödö murögaröga,
wulöi khönia dödö riboribo.
Irongo giwo'iwo manu,
irongo giwo'iwo zilatao.
Omuso dödö yaŵa gate,
Omuso dödö yaŵa mbo.
Terongo yomo khö Zalaŵa Helanö,
teturia yomo khö Duha Terongo.
Tuada Gea salaŵa mbanua,
tuada Gea anofula zato.
Örö ilambe bagi zotöra,
Me irugi dalu zebolo.
Ba Dölamaera sia'a mbanua,
ba Dölamaera sia'a ŵalo.
Maoso Ho tome sisöla,
maoso Ho tome si so.
Itaru'ö naya totoa mburusa,
tou ba dalu-zebolo;
Irugi yomo narö-gosali,
irugi yomo narö-duho.
Labe dadaoma dufo safusi,
Lafedadao ba dufo ni'ohulayo.
La'owai dome salua yomo,
La'owai dome salua ba zinata duho Labe nafo silima endronga,
lafahulö likalika dawuo.
Aweda Siwulu Holi,
aweda Siwulu Tesao;
Lafaolagö lala zumange,
lataba li lala-ndriwo.
Labe wöröma tufo safusi,
labe dufo ni'ohulayo.
Meno fagölö lagöha duha,
meno faondra no owulo.
Lalau fahuhuo fa'erönua,
lalau famanömanö fagego.
Oi owulo nono-wobanua,
oi mamondrogo nono-woŵalo.
Lalau wanunöi umanö,
lalau manunöi hoho.
Ha sambua mböröta me ladada,
ha sambua mböröta me lafailo.
Wa'oi ira sifatalifusö,
wa'oi ira sifamakhelo.
Nga'ötö Zirao Alizuzu Zihönö,
nga'ötö Zirao Alizuzu Zato.
Moroi yaŵa ba Deteholi Ana'a,
moroi yaŵa ba Deteholi Hamo.
Oi omuso-dödö yaŵa gate,
oi omuso-dödö yaŵa mbo.
Ba Dölamaera sia'a mbanua,
ba Dölamaera sia'a ŵalo.

Baso nasa duria si no teholi,
baso nasa zalua si no te'oso.
Me no mowongi ba mbanua,
meno mowongi ba ŵalo.
Me no mangea dödö mangerangera,
meno mangea-dödö mamotomoto.
Khö Duada Ho tome sisöla,
khö Duada Ho tome si so;
Isofu balö fo'omö ngasilo mbawi,
isofu ba lö fo'ömö ngasara hamo.
No isofu gawöni si lö mutandra,
no isofu gafoa si lö wohu boto.
Meno sinehe khö Lowalangi,
meno nahia moroi khö Luozaho.
Meno lahalö wahasara-dödö,
meno oi fao-dödö ndraono.
Itema li Tuada Gea,
iŵaö satua börö Zendroro.
Hana na tafalua danömö zisökhi,
hana na tafalua danömö zi'öna'öna.
Öbe mböwö Oroisalangi,
Öbe mböwö Oroisaluo.
Siŵa fombu mbalaki gawu,
siŵa fombu gana'a ba holo.
Alua walöŵa si teholi ba danö,
alua fa'ama fala'o.
Tuada Ho tome sisöla,
Tuada Ho tome si so.
Ba Dölamaera sia'a mbanua,
ba Dölamaera sia'a ŵalo.
Lö ta'ila hawa'ara gasagasa,
lö ta'ila ha wa'ara ba wemilo.
Me no lalau zahuwa wangazö'azökhi,
meno lalau zahuwa wangeha'ehao.
Ba Nonozitoli ilau nahia,
ba Nonozitoli ilau nomo.
Da'ö duria siteholi ba langi,
da'ö höngö site'ata ba luo.
Sa'usölama wombatö dambali mboto,
Sa'usölama wombatö ba wemilo.

Nisura: Ama Pasca Telaumbanua.

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö