Wb/nia/Tölu Nono Khö Noakhi
Tölu Nono khö Noakhi no sambua zinunö moroi ba ginötö Fangesa Dödö Sebua, si tehöngö ba zi sagörö Tanö Niha ba mböröta ngahönö ndröfia si-20. Tebörögö ia ba Helefanikha me ndröfi 1915 me alua khö niha wangesa dödö, tebörögö khö samösa guru sotöi Filemo, ba aefa da'ö itugu ato niha bö'ö göi.[1]. Ba zi lö arara, ha tölu waŵa, no muzawili wangesa dödö andrö ba zi sagörö Tanö Niha, irege muzawili agama Niha Keriso ba zi sagörö Tanö Niha. Aefa da'ö oya tefazökhi zinunö nihalö moroi ba Zura Ni'amoni'ö ba tobali sinunö ndra niha mbanua ero ma'ökhö.
Ösi zinunö
[edit | edit source]Tölu nono khö Noakhi
Semi, Khamo, Yafeti
Ya'ita ma'uwu Khamo sohalöŵö sonowi
hiza ma'uwu Yafeti niha safusi uli
sohalöŵö sonowi ba gurusi
Hiza ma'uwu Semi saitö uli
saulu ba sanörö-nörö salukhö lö monowi
no bagia da'ö nibe Lowalangi
Li zinunö andre tehalö moroi ba zura Moze sisara, faosatö 6 ba 7.
Famotokhi li zinunö
[edit | edit source]Li zinunö andre si yaŵa no lö fagöna ba ginötö iada'a.
Sara, faya wa niha saitö uli ha saulu ba sanörö-nörö. So göi niha safusi uli ma zui niha khöda zolau si manö. Lala-lala wangera-ngera simane andre lafotöi ia rasis, börö me lafagölösi fefu niha saitö uli tobali niha saulu ba sanaho-naho, si lö faudu ba zindruhu.
Ta'ila wa tenga sindruhu da'ö. Ato niha saitö uli sohalöŵö ba gurusi göi, tobali guru, doto, artis ba tanö bö'önia. So ira si tobali presiden, si mane Barack Obama.[2] Simanö göi niha safusi uli, so ba gotaluara zanaho-naho, niha safaito ba tanö bö'önia.
Ya'ita ba zinunö andrö no Ono Niha. Ba molo'ö sinunö andrö bagiada abölö sökhi moroi ba mbagia niha saitö uli. Ba hiza sala lala wamaigi simane andrö na ta'erönusi zanandrösa ba mbagia.
Dua, tenga bagia nibe'e Lowalangi (ba li Indonesia nasib) na tobali ita sohalöŵö ba nowi ma zui so halöŵö ba gurusi.
Heŵa'ae sohalöŵö ba nowi ita, tola manö tafawu'a wa'aurida na tafomaha ita ba nekhe-nekhe danga tanö bö'ö. No ato niha khöda si tobali sogale ma zui tobali guru, doto, materi ba tanö bö'önia na.
Sinunö andrö no tobali duma-duma wa asese lafa'oli niha zinöndra dödöra samösa tobali hulö zomasi Lowalangi. Andrö wa asese laŵaö iada'a, moguna sibai nifotöi kritik agama (ba li Jerman Religionskritik),[3] börö me ato niha sanguma'ö ösi tödö Zo'aya nösi dödöra samösa. Andrö wa itaria lalau gamuata si lö fagöna ba dödö Zo'aya me faduhu dödöra da'ö zomasi Zo'aya.
Tola tahalö duma-duma zalua ba Amerika Serikat iada'a. Faduhu dödö Donald Trump wa no somasi Lowalangi nifaluania. Ba hiza nifaluania andrö tenga somasi Lowalangi sa: irara'u ba ifakao ndraono awö niha sikoli (nifotöi imigran),[4] iheta lala ngahönö niha sinumana ba wanema dalu-dalu,[5] i'obo-obousi döi niha bö'ö, ifaböbö ba niha si lö omasi ia zi lö sökhi[6] ba tanö bö'önia na.
Umbu
[edit | edit source]- ↑ Uwe Hummel, Tuhoni Telaumbanua, Cross and Adu, Boeckencentrum, 2007, nga'örö 157
- ↑ Barack Obama, whitehouse.gov, mufaigi me 14/2/2024.
- ↑ Religionskritik, moroi ba Wikipedia.
- ↑ Immigration policy of Donald_Trump, moroi ba Wikipedia.
- ↑ Obamacare: Has Trump managed to kill off Affordable Care Act?, bbc.co.uk.
- ↑ George Floyd protests, moroi ba Wikipedia.