Wb/nia/Luka/12/Fangelama ba waminitödö ba ba wangata'ufi niha
1 I. Ba owulo niha sato, ba ngafulu ngahõnõ, tobali lahundragõ nawõra, ba ibõrõtaigõ Yesu, imane ba nifahaõinia ua: Miʼangelamaisi danõmõ roti ba warizaio andrõ, famini tõdõ andrõ.[1] [2]
2 Lõʼõ sa hadia ia nibalugõ, si lõ tebokai dania, ba lõ si tobini, si lõ teʼila dania.
3 Andrõ, ha waʼoya niw̃aʼõmi ba zogõmigõmi, ba ba haga terongo, ba hadia niw̃aʼõmi ba dõgi dalinga, si bakha, ba ba dete nomo yaw̃a teturiagõ.
4 Ba uw̃aʼõ khõmi si fahuwu khõgu: bõi miʼataʼufi zamunu boto, ba aefa õ, ba lõ laʼila mulau hadia ia.
5 Ba uʼoromaʼõ khõmi, ha niha niʼataʼufimi; miʼataʼufi zi tola manibo ba narako, na no aefa ibunu. Si ndruhu, uw̃aʼõ khõmi, daʼõ miʼataʼufi.
6 Tenga lima sagada laʼamawa ziliw̃i nali? ba sambua lõ solifu Lowalangi daʼõ.
7 Ba rozi mbu ba hõgõmi gõi fefu, ba no moeʼerai; bõi ataʼu ami, no tohude ami moroi ba ziliw̃i nali, he w̃aʼae oya ira,[3]
8 Ba uw̃aʼõ khõmi: Ha niha fefu zamaduhuʼõ yaʼo ba niha, daʼõ nifaduhuʼõ Nono Niha gõi dania fõna malaʼika Lowalangi andrõ.
9 Ba ha niha zangosilõʼõgõ yaʼo ba niha, daʼõ niʼosilõʼõgõ fõna malaʼika Lowalangi andrõ dania.
10 Ba ha niha fefu zanandraw̃aisi Ono Niha, ba niʼefaʼõ khõnia daʼõ; ba ha niha zanandraw̃aisi Eheha niʼamoniʼõ, ba lõ teʼefaʼõ khõnia.[4]
11 Ba na laʼohe ami ba walukhata ba ba zalaw̃a ba ba zolohe huku, ba bõi miʼabusi tõdõ he miwisa ba hadia wamoeʼa, ba hadia niw̃aʼõmi.[5]
12 Eheha niʼamoniʼõ sa dania zamahaõ yaʼami, ba daʼõ sibai, hadia niw̃aʼõ.
Luka 12 : 1 – 12