Wb/nia/Kadi'a ba Guru Tane'a
Mege, bözi sara, aefa Gadi'a ba zekola SD lö aröu moroi ba nomora.
Kalasi önö Gadi'a. Sindruhunia no alaŵa ndröfinia ma'ifu, no felewitu fakhe, owalusö sa'ae. Ba hiza börö sa'atö wa'omasinia sekola ba börö göi wa'ambö ndraono ba zekola sawena mufazökhi andrö, ba latema manö ia kalasi 4 me dua fakhe no.
Föna ö, no irai möi Gadi'a ba zekola SD bö'ö. Börö wa'aröu mato öfa kilo moroi ba nomora, ha irugi kalasi tölu ba iböhöli.
Götö we'amöinia ba SD saröu andrö ba si lö ahono-hono tödö ndra satuania ero ma'ökhö. Na moteu sa'ae ba agasese awena mangawuli Gadi'a ba nomo na no arakhagö ogömi.
Me ibörögö Kadi'a ba kalasi sara ba oya nawönia fao, oya zamasura'ö töira ba SD andrö. Itugu ara ba itugu alö ndraono si möi, laröi manö börö ngawalö daha-taha halöŵö soya wanoloni ira satuania ba nomo.
Afuriata hatö datö-datölu ndra Kadi'a zi fao-fao ba lala we'amöi ba SD andrö, irege kalasi tölu. Lö uzara-zara, ibato zekola Kadi'a, ha irugi kalasi tölu.
Ba mböröta ginötö Orde Baru ba lafasindro sambua SD ba mbanua ndra Kadi'a. Iraono sombato sekola no mege ifuli humulu dödö we'amöi ba zekola. Simanö göi Gadi'a.
Me luo da'ö tenga taha-taha we'amöi ba zekola ndröfi ndraono. Börö da'ö wa oya ndraono si zaŵa boto ba sebua döfi möi manö ba zekola. Ba ma'iki ita wamaigi-maigi... so zamake saraeŵa sanau, so zonganga afo, so göi zolohe balatu ba löwi-löwi.
"Ya'ahowu Bapa...", i'owai guru kalasinia Kadi'a me irugi golayama nomo zekola andrö mege ba zihulöwongi. "Ya'ahowu...", da'ö wanemali moroi khö guru Tane'a, guru si bohou tama moroi ba sekola guru si yaŵa ba Gunungsitoli. No siga-siga, no arize-rize, onekhe fabahasa.
So nasa gonönöta: amohua fanikha mbunga. Tuka simesi göi na favoli. Na so guru Tane'a bakha ba danölafa voli, na favoli ia, ba laröi niha harimbale halöŵöra, lafahatö ira ba danö lafa voli ba wamaigi faramaena Guru Tane'a.
Ba ginötö wamahaö lö ahono Guru Tane'a, so möi furi so möi föna ba wamotokhi ba dödö ndraono zekolania wamahaö andrö. La'omasi'ö ia iraono börö me onekhe ia wamahaö. Lö göi asese mofönu ia.
Tenga simane Guru Takhöli sasese manafari iraono he ha börö wa'ahou fa'atohare ba zekola börö deu toho. Irugi samuza ma'ökhö laböbözi ia ba harimbale. I'oroi da'ö lö irai ihötui sa'ae sitou SD Muzöi guru Takhöli.
"Negara apa di dunia ini yang ibu kotanya Lima?" Ba lö nini-ini ba so na i zi tokea ba wamondrongo fanofu andrö moroi khö Guru Tane'a.
No iboho-boho guru Tane'a. La'ila da'ö iraono andrö labörötaigö wangöngösa. "Faya da'a khö Bapada le... hewisa so negara si lima ngawua ibukota."
Irongo da'ö Guru Tane'a. "Ya'ugö zebua faya wö Dohu. Ebua moroi ba waya mbawi wayamö."
Moma'igi ndraono bakha ba kalasi wamondrongo fanema Guru Tane'a andrö khö Gadohu.
No iboho-boho Kadi'a. I'ila wanema li ba hiza alaŵö ia wanguma'ö. Khö ndra guru bö'ö, lö fa'alaŵönia, na i'ila ba i'anema'ö itema li.
Ba wamarou tödö ndraono, ihalö sara fena moroi ba nono mbarunia Guru Tane'a. Fena nifo'ösi taŵa, lö bohou sibai, ba hiza i no baga-baga.
Ba ginötö da'ö ha ira guru ba ha ira sohalöŵö ba gödo zangoguna'ö fena si manö, börö wa'ebua mböli.
"Yang bisa menjawab pertanyaan tadi, dia akan mendapat ini..." ifezaŵa dangania Guru Tane'a, tangania kabera sololohe fena andrö.
Labato wagua-guasa iraono, lö nini-nini. Zara lafahasu ira. Ifakhölö-khölö ia Guru Tane'a, i'ila wa so wa'edöna Gadi'a wanema li.
Ifulö-fulö dangania Kadi'a, ba lö ahono ia ba mbaku-baku, omasi ia ifezaŵa dangania ba wanemali. Ba lö alua.
Lö fakhamö ibe yaŵa dangania Kadi'a no humede Gadi'u. "Bapak...", humede Gadi'u ba i'amezaŵa'ö göi tangania.
Manimba dödö Gadi'a, ba simanö göi dödö Guru Tane'a. So waniasa khö Gadi'a ba wa'ahayania wanema li. Simanö göi Guru Tane'a.
Lö ara tö, awu'a sa'ae fena da'ö ba nono mbaru Gadi'u. Da'ö sa'e ni'era-era Gadi'a. Da'ö göi zi so bakha ba dödö guru Tane'a.
Föna-föna da'ö, no ha'uga kali inaö'ö wame'e fena andrö guru Tane'a khö Gadi'a. Ba lö isöndra lala. Lö tani.
Da'a lalania si baga, si lö manofu dödö ndraono bö'ö: ibali'ö buala fena ba nono zekolania sangila manema li. Ba no itötöna wa Kadi'a zanema li andrö.
"Alai ndra'o ndra'ugö Kadi'u, hana wa moharazaki sibai ndra'ugö... lö ira-irai khöu da'a ba zi lalö..." da'ö wehede dödö Guru Tane'a. Lö i alua baehania.
"Setahu saya setiap negara hanya memiliki satu ibu kota Pak", da'ö wanema li si kalua moroi ba mbawa Gadi'u.
Tenga mai wa'omuso dödö Guru Tane'a. Atulö niŵaö Gadi'u ba hiza tenga fanema senahöi. Eluahania... so nasa ginötö khö Gadi'a wanema li.
"Yaaaa... Di'a... apa jawabanmu?"
"Peru, Pak."
"Benar!"
Itugu lö ini-ini bakha ba kalasi, terongo li walölöŵa satoru. So zafusi bawa, so zanimba-nimba tödö, so zahele böböi.
"No lafalemba ba mbagolö atlas guludanö... ba lö khömi famaigi, lö na'i mileke'ö." Iduhugö sa'e wame mene-mene guru Tane'a ba ndraono nifahaönia andrö.
"Terima kasih, Pak," itema fena nifo'ösi taŵa Kadi'a moroi khö gurunia... tuhodödönia göi. Lö barani Gadi'a wamaigi bawa gurunia andrö.
Irugi yomo Kadi'a ba somuso sibai tödö ia. Isöndra fena nifo'ösi taŵa moroi khö guru omasiönia.
Ba zibongi, aefa manga ba aefa isasai wiga, galasi, awö mbowoa, barö wandru gasi nitaŵi barö lote khöra, ibokai mbukunia Kadi'a, ilau mombaso ba manura. Lö aratö ujian penghabisan. Tama sa'e dania aefa ö.
"Hana no baga-baga fenau nogu. Hezo öhalö?" da'ö wehede fanofu soroi ba mbawa Nina Di'a khö nononia omasi'ö. I'ila wa tebai i'öli fena andrö Kadi'a, lö tola khö Nama Di'a wowöli da'ö.
Irongo da'ö Ama Di'a sanagu-nagu diala satöla khönia. Ifakhölö ia ba hulö zi falemba hörönia ba fena Gadi'a si takile-kile börö haga wandru gasi. Lö moloi hörö Nama Gadi'a wamaigi.
"Fena nisöndrau ia andrö ba nogu? Alai na fena gurumö satoru." Ifazaumba wehede fanekhegö Ina Di'a, heŵa'ae no ihaogö wanguma'ö. Lö omasi ia na tetutu dödö Gadi'a ba wehede andrö.
"Tenga fena satoru wö Na!" ba ha irege da'ö wamotokhi Kadi'a, ifuli zui itohugö wanura.
"Haniha zame khöu ba nogu," itugu ombuyu weheda Nina Gadi'a wanofu khö nononia. Fatua itema li ninania Kadi'a no ŵa'i tohare Guru Tane'a. "Yahowu Bapa..., Ya'ahowu Ibu," imanö wangowai Guru Tane'a.
"Ya'ugö da'a i Guru. Aine. Dadao," ifazaŵa ia ama Gadi'a moroi ba nahania wanagu diala.
"He Di'a, fazökhi kofi ö ga'au... ö bapau guru," fakaole lela nama Gadi'a wangumaö khö nononia. I'o-si-lö-mamondrongogö Guru Tane'a, telobi dödönia bakha, manimba dödö Gadi'a, owua-wua dödö Nina Di'a.
Bongi ö, fao ira fadiala Nama Di'a guru Tane'a.
Lö ara furi ö, ha mato önö waŵa me no aefa tama Gadi'a, terongo li garamba, terongo li waritia, labözi göndra, famaena zato, oi owua-wua dödö ba wangowalu zi darua si tobali sambua.