Wb/nia/Kabu Gedena ba kabu feisbuk
No sonekhe sibai gulö andrö moroi ba gotalua zaliŵa-liŵa ba danö. Ba möi ia iŵaö khö ndra'alawe: "Hadia sindruhu wa no iŵaö tebai so khömi HP si so internet?"
Imane ira alawe andrö: "Tola sa ma'okhögö hape si so internet, ba hiza i no göi iŵaö khöma wa tebai ma'oguna'ö feisbuk, instagra, tikitoko ba tanö bö'ö na. Na mababaya da'ö ba mate ndra'aga!"
Ba imane khönia ulö: "Ma'ifu lö mate ami! Na mi'oguna'ö facebook, instagram ma tiktok ba ha teboka hörömi ba mihalö selfi, ba muzawili selfimi ba zi sagörö ulidanö."
Ba ibokai HP-nia ira'alawe andrö ba i'anema'ö mu'ao ia iŵaö: "Sökhi sibai feisbuk ba instagra awö tikitoko andrö. Monönö wangi'ilagu ha ba wombaso-baso oi högö zura ba ba wamaigi-maigi foto selfi. Lö moguna sekola sa'ae me da'a no abönö tobali gumbu wa'atua-tua."
Ba ihalö HP-nia ba i'oroma'ö khö wo'omonia facebook ba instagram awö tiktok andrö. Ba teboka höröra darua ira ba oroma khöra wa no oi adodo zaraewara.
Ba imane Sokhö khö ndra'alawe andrö: "Afökhö dania khöu wohalöŵö börö me no arörö'ö ba wangai ba ba wamaigi-maigi selfi. Ahou dania khöu wondrino gö nono khöu ba lö inötöu wanolo matuau sofökhö."
Ba khö ndramatua imane: "Börö me lö ö'o'ö ligu, sidao-dao ba lafo dania ndra'ugö götö wa'auriu. Aböböi dania mbawau wamaigi-maigi facebook, instagram ba tiktok, irege mangawuli ndra'ugö ba danö tou."
Ba ifofanö ira moroi ba Gedena, nahia wa'atulö ba fangi'ila andrö, ba itibo'ö ira ba kabu Facebook. Heŵa'ae fa'abu dödö zalua khöra, ba faduhu manö dödöra wa ba Gedena nasa so ira awö wa aboto ba dödöra zi sökhi ba si lö sökhi.
Nifa'anö: Sirus Laia
Umbu: Wikibuku Nias
Nitöngöni: Omuso dödögu na öfazaewe nidunö-dunö andre ba media sosial ma Internet. Hiza i be'e fao gumbu heza tehalö ia, ya'ia da'ö moroi ba Wikibuku Nias (simane nisura yaŵa andre). Tafaigi ena'ö to'ölö ita wanötöi gumbu zura ni'oguna'öda.
Umbu
[edit | edit source]Tesura nidunö-dunö sadogo-dogo andre yaŵa molo'ö wanutunö moroi ba 1 Moze, faza 3.