Wb/nia/Halöŵö Zinenge/19/I'ekhugö khönia niha Demeterio andrö
23 III. Ba tesao wagua-guasa sabölö-bölö maʼifu, me luo daʼö, ba huku andrö. [1]
24 So niha, tuka wirö, Demeterio döinia, samazökhi famaedo gosali Garitemi andrö, firo, tenga sideʼide wangalui nawönia tuka ibeʼe. [2]
25 Ba ifalukhaʼö ira, awö zi so halöŵö ba daʼö, ba imane: Miʼila, yaʼami andre, ba halöŵö andrö moroi mbalazoda,
26 ba anehe ami ba mirongo, tenga ha ba Nefeso, arakha ba danö Azia maʼasagörö saʼae, ba ato nidönisi Waulo andrö niha, nifaʼeronia khöda, wangumaʼö tenga Lowalangi nifazökhi danga niha.
27 Ba tenga ha si sambalö andrö zataʼu ita, wa lö laku nifazökhida andrö, löʼö göi ba dödöra gosali Lowalangi ira alawe sebua andrö, Aritemi, ba dania, ba tetayaigö göi waʼasalaŵania ösa, niʼataʼufi mbanua Azia fefu, awö niha fefu, ba guli danö maʼasagörö.
28 Ba me larongo daʼö, ba mofönu sibai ira, muʼao ira, lamane: Ebua Garitemi mbanua Nefeso andrö!
29 Ba samba banua manö fawuka dödö, ba ha sara dödö wanaŵa omo maimai, fagohi ira ba lasöbi khöra ndra Gayo Arisaro, banua Makedonia, awö Waulo. [3]
30 Ba möi enaʼö Waulo ba niha sato, ba lö lafofanö ia nifahaö.
31 Ba lafatenge göi khönia salaŵa Azia, si no fahuwu khönia, laʼandrö khönia, böi yamuʼoromaʼö ia ba nomo maimai.
32 Ba böʼö sa niŵaʼö zi samösa, böʼö niŵaʼö zi samösa, weʼaoʼao; noa sa fawuka manö dödö zowulo andrö, ba sato, ba lö laʼila, hana wa owulo ira.
33 Awena laŵaʼö Alesandro, ba hunö niha sato, nilulugö niha Yehuda ia. Ba ifazaŵa dangania Alesandro, muhede enaʼö ia ba niha sato, ibuʼa enaʼö.
34 Ba me larongo wa niha Yehuda ia, ba ha sara li zato, mato dua za waʼara, muʼao ira: Ebua Garitemi mbanua Nefeso andrö!
35 Ba ihonogö ira durutuli, ba imane: He yaʼami, banua Nefeso! Ha niha sa zi lö mangila, wa banua Nefeso zondrorogö osali Garitemi sebua andrö, awö zatoru andrö moroi ba mbanua si yaŵa?
36 Ba me tebai niwuʼai daʼö, ba sahono ami enaʼö, ba böi midaʼidaʼi wolau hadia ia.
37 Noa sa miʼohe ba daʼe niha andrö, ba tenga sorabu gamagama ba gosali ira, ba tenga göi sangoʼaya Lowalangimi.
38 Ba na so sa, ha niha ia, niʼadugö Demeterio ba awönia tuka andrö, ba lalau rafe ba so gumandru, faoma ndramuʼadugö nawöra.
39 Ba na so hadia ia, ba mböʼönia, niŵaʼömi, ba laʼasiwai ia ba walukhata satulö.
40 Ataʼu sa ita, laböbögö khöda wolaŵa salaŵa, laʼadugö ita, börö maʼṍkhö andre, me lö khöda börö wamuʼa salada ba waʼaekhu niha andre.
41 Ba me aefa iŵaʼö daʼö, ba ifofanö zowulo andrö.