Wb/nia/Halöŵö Zinenge/10/Foloʼö gumandra Konelio andrö

FAZA 10

1 Ba so ba Kaizaria niha, Konelio döinia, kumandra zaradadu Gitalia andrö;

2 niha satulö tödö, sangataʼufi Lowalangi, awö zoroiyomonia fefu; oya ibeʼe ba zi numana ameʼela, ba si lö mamalömalö wangandrönia khö Lowalangi.

3 Ba iʼila ba gangilata, oroma sibai, malaʼika Lowalangi, si möi yomo khönia, so labözi tölu, imane khönia: He Konelio!

4 Ba itöngö, ataʼu ia, imane: Hadia daʼö, Tua? Ba imane khönia: No itörö tödö Lowalangi, si yaŵa, wangandröu ba ameʼelamö andrö.

5 Ba iadaʼe, ba fatenge niha ba Yofe, ba fakaoniʼö Zimoni andrö,

6 nifotöi Fetero; no möi ia tome khö Zimoni andrö, tuka guli zaŵi, ba mbewe nasi so nomonia.

7 Ba me no mofanö malaʼika andrö, sihede khönia, ba humede ia ba zawuyunia, darua, ba ba zaradadu samösa, sangataʼufi Lowalangi,

8 ngoningoninia, ba me no idunödunö khöra fefu hadia ia, ba ifatenge ira ba Yofe.

9 Ba sara wongi, me so ira ba lala, me ahatö saʼae ira ba mbanua, ba möi yaŵa Wetero ba zi sagötö, mangandrö, so laluo.

10 Ba olofo ia, omasi ia manga. Ba me laʼasiwai gönia, ba abeta nosonia.

11 Ba iʼila, teboka mbanua si yaŵa, ba numalö mitou nahia, hulö lembe sebolo, nifotaŵitaŵi fatalinga si öfa, wanada yaʼia ba guli danö.

12 So bakha fefu ngawalö zaliŵaliŵa ba danö, si öfa ahe, ba fefu ngawalö guökuö ba danö, ba fefu ngawalö wofo ba dalu mbanua. 13Ba so zihede khönia, imane: Faoso, Fetero, taba ba ā!

14 Ba imane Fetero: Ai, tebai Tua, me lö urai uʼā zi lö sökhi, awö zi raʼiö.

15 Ba imane zui khönia sihede andrö: Böi bali si lö sökhi nihaogö Lowalangi.

16 Ba medölu zi manö, ba iʼanemaʼö tedöni miyaŵa ba mbanua si yaŵa nahia andrö.

17 Ba me ibusi tödö Fetero, hadia gangilata andrö, niʼilania, ba hiza, ba no so tou niha andrö, nifatenge Konelio, no lasofu nomo Zimoni.

18 Ba muʼao ira, lasofu, na so ba daʼö tome Zimoni, nifotöi Fetero.

19 Ba me ifatoutou na tödönia Fetero gangilata andrö, ba imane Eheha khönia: Hiza niha, sangalui yaʼugö,

20 ba faoso, ae tou, ba ae awöra, böi manufa dödöu, me no yaʼo zamatenge yaʼira.

21 Ba möi tou Wetero, iʼondrasi niha andrö, imane: Hiza, yaʼodo niʼaluimi. Hadia mbörö, wa so ami?

22 Ba lamane: Konelio andrö, kumandra, niha satulö tödö, sangataʼufi Lowalangi, si sökhi turia göi ba niha Yehuda fefu; no ifaŵaʼögö khönia Lowalangi ba malaʼika niʼamoniʼö, ifakaoniʼö ndraʼugö ba nomonia, ba wamondrondrongo niŵaʼöu.

23 Ba iʼohe ira yomo, ibeʼe göra. Ba sara wongi, ba möi ia, fao ia khöra: ba möi awönia dalifusö ösa, banua Yofe.

24 Ba mahemolu ö, ba larugi Kaizaria. Ba no ibalobaloi ira Konelio, no ikaoni zahatö khönia, awö zabölö fahuwu khönia.

25 Ba me möi yomo Wetero, ba ifaondragö ia Konelio, ituhi danö fönania, mangalulu.

26 Ba ifaoso Fetero, imane: Faoso! niha göi ndraʼodo.

27 Ba fahuhuo ira, möi ira yomo, ba iʼila zato, si no so ba daʼö, Fetero.

28 Ba imane khöra: Miʼila, lö töla ba niha Yehuda, orudu ia ba niha böʼö, ba lö tola möi ia khöra; ba khögu, ba no iʼoromaʼö Lowalangi, böi uŵaʼö, si lö sökhi, ba ma si raʼiö niha, gofu ha niha ia.

29 Andrö göi lö ufadaö weʼamöi, me lafakaoniʼö ndraʼodo. usofu iadaʼe, hadia mbörö, wa no mifakaoniʼö ndraʼo?

30 Ba imane Konelio: öfa bongi maʼökhṍ, me mangandrö ndraʼo, yomo ba daʼe khögu, me labözi tölu, ba hiza niha, si so fönagu, sobaru sihaga,

31 ba imane: He Konelio! No tefondrondrongo wangandröu ba no itörö tödö Lowalangi gameʼelamö andrö.

32 Andrö fatenge ba Yofe, ba fakaoniʼö Zimoni andrö, nifotöi Fetero; no möi ia tome ba nomo Zimoni, tuka guli zaŵi, ba mbewe nasi.

33 Ba uʼanemaʼö ufatenge khöu, ba sökhi me no so ndraʼugö. Ba no soga fefu iadaʼe, föna Lowalangi, ba wamondrondrongo fefu niŵaʼö Zoʼaya khöu.

34 Ba humede Wetero, imane: Awena si ndruhu aboto ba dödögu, lö ifaigi mbawa niha Lowalangi,

35 dozi sa, ha soi ira, sangataʼufi ya ia, solau satulö, daʼö zomasi ia.

36 Daʼö daroma li andrö, nifaʼoheʼönia ba Ndraono Gizeraëli, wamaturiagöʼö faʼohahau dödö khö Yesu Keriso, no daʼö Zoʼaya niha fefu.

37 No mirongo duria andrö, ba danö Yudaia maʼasagörö, si börögö ba Galilaia, me no aefa wamayagö idanö andrö, niʼombakhaʼö Yohane;

38 Yesu andrö, banua Nazareta, fombayoini Lowalangi yaʼia, Eheha niʼamoniʼö ba faʼabölö, sanöröi tanö, wanolo niha ba famadöhö fökhö nifakao Gafökha fefu, me no itolo ia Lowalangi.

39 Ba yaʼaga zi so ba mbörö ba nilaunia fefu, he ba danö niha Yehuda, ba he ba Yeruzalema, ba no lataŵi ia ba döla geu, no labunu.

40 Daʼö nisusugi Lowalangi, me no aefa zi dua wongi, ba no ibeʼe oroma ia.

41 tenga ba niha sato, ha ba zamaduhuʼö andrö, nihönagö Lowalangi wanutuyu yaʼira, khöma, si no orudu manga khönia, zi no mamadu idanö awönia, me no aefa maoso ia moroi ba ngai zi mate.

42 Ba no iŵaʼö khöma wangombakha ba niha andre ba famaduhuʼö, wa daʼö nihonogöi Lowalangi sanguhuku niha sauri awö zi no mate.

43 Yaʼia nifaduhuʼö zamaʼeleʼö, fefu, wa ba döinia lasöndra wameta horö dozi si faduhu tödö khönia.

44 Ba löʼö na saetu wehede andrö, ba aekhu Geheha niʼamoniʼö ba zamondrongo taroma li andrö fefu,

45 Ba tobali dödö zamati niboto, fefu, ha waʼato ira, zi no fao khö Wetero, weʼamöi, me telau göi ba niha baero gameʼela andrö, Eheha niʼamoniʼö.

46 Larongo saʼae, molau li böʼö ira ba lasuno Lowalangi. Ba imane Fetero: Hadia, tola tatenaŵa nidanö, fa böi tebayagö idanö daʼe, si no manema Eheha niʼamoniʼö, si mane yaʼaga?

47 Ba iŵaʼö khöra lafabayagöʼö idanö ira, ba döi Yesu Keriso. Ba laʼandrö khönia, enaʼö iʼaragö ia maʼifu khöra.

(Halöŵö Zinenge 10:1-47)

Famotokhi ba gahe

Faza 10: Foloʼö gumandra Konelio andrö (1-47)

Fabaliŵa lala

Fanolo ba wanura: Lala wanura • Fama'oli nösi • Ngawalö templat • Ngawalö kategori

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö