Wb/nia/Göndru Sawai'ana'a ba Latitia Sörömi
So darua ndraono sendronga inötö, luo, ba baŵa wa'atumbu. Samösa ba mboto niha raya töinia Göndru Sawai'ana'a. Sambua göi yöu ba mboto niha sihönö, töinia Latitia Sörömi. Niŵa'ö zangalahi, na faedo ena'ö ira wedadao, elungu niha wamaehugö, heza Göndru Sawai'ana'a, ba heza Latitia Sörömi, no fagölö-gölö mboto faoma mbawa, hulö zifaero, hulö zi hasambua ina laŵa'ö-ŵa'ö ba khöda, awai nifateu gae.
Ba me no egebua ira, faoma larongo-rongo duria nawöra, heŵa'ae lö irai mowalukha. Me simanö ba faoma tumbu ba dödöra wanguma'ö, "Lö tola orudu nahia zi faoma tödö ngawawa, tebai faedo ba dugela zi faoma silatao", ba ginötönia ba faoma mafalalaŵa lalai mbutegi'oma, faoma mafananau giwo-iwoma, oroma sa dania haniha zo'angenua iwo-iwo.
Samuza inötö, samuza luo, endronga mama'anö ira hulö zi no mangosara wa falukha ira ba wasöndrata. La'ohe gama-gama ba wanuwö ba wasöndrata na fatandra töla, oi da'e fefu ni'ohera: toho si siŵa dömö, gari sobawa wötö, ba baluse silalu'a we'e-we'e. Da'ö wangöna ni'ohera, latueli nora ba la'ombakha'ö wa tuguma ma ohitö dödöra zamösana, ba wangai högö zi faudu baŵa wa'atumbu.
Ba dalu lala ba mbanua Mbotombawö falukha ira, faoma no mangaro ba mangöhöna. Fatua lö fazuzu ira, muhede Latitia, "Haniha ndra'ugö?"
Itema linia Göndru imane, "Göndru Sawai'ana'a ndra'o, möido mangai högö Latitia Sörömi".
Itema Latitia, "Ya'odo Latitia Sörömi, möido göi mangai högöu, Göndru."
Ha fa aefa laŵa'ö da'ö, lalau fatele, oi ohafa ndru'u mato sadumba tanömö. Lalau doho khö nawöra, faoma lö göna, ilumö'ö ira baluse. Fao fönu, faoma la'ositölagö wangahandro awöra, hadia zalua terongo li zaere-zaere satoru na mu'ugu mbanua. Hulö aboto ngahönö wiga, hulö zaetu taŵi-taŵi garamba si ngaotu fa'oya. No wai fadou nikhu gala-kala, no fasömö ndrömö dohora. Lafasöbi-söbi lö aefa, no lalau zindruhu dölara. Latibo'ö tou ba danö dohora. Lasöbi gari sobawa wötö, satarö hulu wamölö, lalau fagötö latabaisi ba gabera, lafaligoi ba gambölö, balusera zi tobali tandrösa, oi lö molade lö olegata.
Afuriata lalau zahori dölara woleasi, wogukhui awöra. Hadia zalua, terongo li ziriti, zumawili zo'ono galue yaŵa ba dalumbanua, no falemba mbawa gari, la'oguna'ö mbaluse si tobali fangöna ba wamunu awöra, ifuli alua terongo li sigoli si'agau me fagobi ba dalumbanua ba aekhu tou ba danö. Hulö na aso'a geu awöni, mane na afatö zinarikhi.
Atoru tou ba danö mbalusera no falemba ba no göi telawo ira tou ba danö ma'adarua. Ba böböira adoru-doru mohandroma tou ba danö. Alölö afo wa'ara, ifuli mangawuli wa'abölöra ba faoma lafaigi mbawa nawöra, faoma lanehe-nehegö, hiza faoma lö sabötu gulira ba lö selezitö, ba lö göi sabao ba nösira, ha fa'erege dödö me ara sibai wasöndratara.
Faoma laboho mbawa khö nawöra, faoma ohahau zikhalara hulö na lö salua hadia ia ba gotaluara, no la'olifugö ira, lafahatö ira khö nawöra ba faoma ladunö-dunö hadia ia zitumbu-tumbu ba dödöra me lö na sifaondra ira.
Imane Latitia Sörömi, "No maulu wa'erege dödöda, hadia so nafo ba gandre-kandreu, da tanganga."
Ba itema-linia Göndru, imane, "Ba da'e ha tambai dawuo nisöndragu, ya'e."
Ihalö dawuo Göndru, ba ibe'e göi Latitia ha sagoli wino nisöndrania ba naha nafonia. Ba faoma latanögö tou ba danö ba faoma auri ba manöi wa'ebua, ba mowua gasa-gasa wedadaora.
Lahalö dotoa doho anöita dawuo, lateteu mbua wino, lakekete mbulu dawuo, ba langanga irege döhö wa'owökhi dödöra. Sitöra labagi ba lafaosa fagölö-gölö, da'ö zi tobali ni'odörara ma sitobali fanörö tödö ba walukhatara.
Fatua lö fabali ira ba imane Göndru khö Latitia, "Dozigö niha yöu afo andre, ba udozigö göi niha raya".
Ba faoma fatalagu bagi ira, ba lafuli ira ba mbanuara zamösana.
Ba me larugi khöra ba labe'e nafo ba mbanuara. Ba oi omuso dödö niha mbanua, ba lamane, "Sökhi i da'a, tola tabe ba mbawada. Na högö ena'ö mege, ba lataŵi ba mbalö mbanua, ba fatikhu niha wa'aböu. Duhu wa ha sara manga afo wangatulö zi fatalifusö.
Nitöngöni
[edit | edit source]- No mufaudugö wanura ba EYD (Ejaan Yang Disempurnakan).
- No lö mufaogö wamo'eluaha, ena'ö lö aetu manö-manö ia ba tenga tobali famotu niha.
- No göi mu'alösö'ö ma'ifu wanutunö ya'ia.
Umbu
[edit | edit source]Göndru Sawai'ana'a ba Latitia Sörömi bakha ba Buku Cerita Rakyat (Manömanö) Nias Kota Gunungsitoli (2019), nifa'anö Soraya Zebua & Yasato Harefa, nga'örö 37-39.