Wb/nia/Famago tanö

Lamane balugu....!
Lö dania i'odödögö, wano motagaule börö zinasa,
wano mo'ue ra'ura'u danga,
wano mo beŵeŵö lalai gafasi,
yomo khö duada Sirao Uwu Zihönö.

Tenga dania awai naya tanömö danö,
me möi fabiri töla gana'a,
memöi fabiri töla mbalaki,
Silaŵö Sila'uma Momböi,
Ono Hadi Duli Mangaraza,
mado ma zai me tumbu danö,
Fombatö Galawe Barisa Ria.

Yahaloi sadania yahalokha khönia.
No ibe'e khö nia fanizi,
famango mbawa,
Si Laride Ana'a.

Imane..
Hadia nano onekhe'ö fabiri,
hadia nano onekhe'ö fagema,
nano ökalaisi nono ndrawa,
nano ökalaisi nono maru.
No toröi tou naya namau tanömö danö,
no toröi tou naya namau tanömö gölia.

Töi nia me iraono sambö tödö,
töi nia me iraono sambö era-era,
ifuli yomo ia khö nina nia börö zatua,
ifuli yomo ia khö ninania börö zadono.
Ilau mowengu yomo badalinga mbatö,
ilau mege-ege yomo badalu zinata.

Andrö dania iŵaö ina nia börö zatua,
iŵaö ina nia börö zadono,
hadia zabu dödö'u barö dötö'a,
hadia zabu dödöu barö doto.
Imane Silaŵö Sila'uma Momböi,
no toröi tou nanya namagu tanömö danö,
no toröi tou naya namagu tanömö gölia.

Iŵaö ina nia börö zatua,
iŵaö ina nia börö zadono,
ae sofu yaŵa khö Ata Balugu Luo Mewöna.
Andrö wödania möi Zilaŵö Sila'uma Momböi,
yomo khö Ata Balugu Luo Mewöna,
yomo banarö gasali uwuzömi,
yomo banarö gosali uwu ledaŵa.

Iŵaö Silaŵö Sila'uma momböi..
Be'e khögu naya namagu balö warökha,
be'e khögu naya namagu balö dikatika.
Möido mubözi danö wagölö-gölö,
möido mubözi danö wa gaya gaya,
möido ubago tou danö nahia zihönö.

Iŵaö Ata Balugu Luo Mewöna,
tebai öfazaŵa mbalö warökha,
tebai öfazaŵa mbalö dikatika,
iraono ndra'ugö ambö tanga,
iraono ndra'ugö ambö turu,
ma dania öbözi khöu duturu laŵa,
ma dania öbözi khöu duturu luo,
na möi'ö öbago danö nahia zihönö,
namöi'ö öbago danö nahia zato.

Da'ö zi sazo'e balö warökha,
da'ö zi sambua yöu balö dikatika.

Lö nasa aya tanömö danö,
lö nasa aya tanömö gölia,
tane'a mbalö warökha,
tane'a mbalö dikatika.

Ifuli zui ia khö nina nia börö zatua,
ifuli zui ia khö nina nia börö zadono,
Iŵaö hadia mube aya tanömö danö,
hadia mube aya tanömö gölia.
Lö tane'a mbalö warökha,
lö tane'a mbalö dikatika.

Andrö dania maoso galawe Barasi Saota,
ihalö nuwu zese ana'a,
ilau manukhu bu manaö huwa,
isukhu mbu bazalo'o yaŵa,
bahasa undrai mbu undrai huwa,
da'ö zi öfa soi aya tanömö danö.
Da'ö danömö danö sa'usö sobaya,
da'ö zobörö nue siso kondra,
lö sa börö ebua sibai,
ha sambua uli laharö gana'a,
da'ö danömö danö nifagirö-girö,
da'ö danömö danö nifa denadena,
melö uli laharö gana'a.

Andrö dania maoso Ata Balugu Luo Mewöna.
Ihalö yaŵa danö nifagirö-girö,
ihalö yaŵa danö ni fadena dena,
si'ite sizai hili-hili danö,
sizai bawa löfö sotöfi,
ihalö nasa nösi hulu töla gana'a,
tanömö danö si öfa soi,
tanömö danö si öfa öri.

Sambalö danömö danö muramura langi,
sambalö danömö danö muramura mbaŵa,
sambalö danömö danö böböi döla hulu nangi,
Sambalö danömö danö böböi döla hulu mbara.

I'ohe yaŵa baraŵi mbawa duwutuwu,
iteu yaŵa mbua döla godu kara,
iteu yaŵa mbua döla godu sawu,
yaŵa khö Duha bandrege danö.
Ibe famakhei danö hulö la'uri,
ilöma ba nuwu duturu laŵa,
ilau khö nia wondrege wa'a'ere,
ilau khönia wondrege wamihara,
i'ohe bawa'erua yaŵa.

Yahaloi dania yahalokha khö nia...
Tedou danö bawamaigi maigi,
tedou danö bawangila ngila.
Lamane izai BULU DÖRI ANA'A.
Tebai nasa nibe'e badanga,
tebai nasa nibe'e baduru,
ambö na sa tane'a mbalö warökha,
ambö na sa tane'a mbalö dikatika.

Andrö dania ifakaoni'ö zifasambua ama,
ifakaoni'ö zifasambua ina.
Lafanöi danö sangehowu ama,
lafanöi danö sangehowu ina.
Tedou danö bawamaigi maigi,
tedou danö bawangila ngila,
izai NIRU FOMBALI MBÖRA.
Tebai nasa nibe'e badanga,
tebai nasa nibe'e baduru,
ambö nasa tane'a mbalö warökha,
ambö nasa tane'a mbalö dikatika.

Ifuli zui dania ifakaoni'ö zifasambua tua,
ifakaoni'ö zisambua banua,
lafanöi danö sangehowu tua,
lafanöi danö sangehowu banua,
tedou danö bawamaigi maigi,
tedou danö bawangila ngila,
izai OLOSO FOLOKHOI WAKHE.
Tebai nasa tane'a mbalö warökha,
tebai nasa tane'a mbalö dikatika.

Ifakaoni'ö zi öfa öri,
ifakaoni'ö zi öfa soi.
Lafanöi danö bawusiwusi,
lafanöi danö ba hehaheha,
tedou danö bawamaigi maigi,
tedou danö bawangilangila,
SIŴA MONAHA OSALI,
SIŴA MONAHA LEDAŴA.

Tola sa'e tane'a mbalö warökha,
tola sa'e tane'a mbalö dikatika.
Awena ibe'e badanga,
awena ibe'e baduru.

Manö sibai mege me'i'ozara zaragö,
moroisa guli laharö gana'a,
umönö solemba badölanora.

Awena ibe'e ba danga,
ibe'e sa'e baduru,
khö Zilaŵö Sila'uma Momböi,
Ata Balugu Luo Mewöna.

Iŵaö ae bago sa'e tou danö
nahia zihönö,
ae bago sa'e tou danö nahia zato.

Iŵaö Silaŵö Sila'uma Momböi,
tebai nasa ubago danö wagölö-gölö,
tebai nasa ubazi danö wagayagaya.
Sonasa heduhedu mböwö barögosali,
sonasa hedu hedu mböwö barö ledaŵa.

Iŵaö Ata Balugu Luo Mewöna,
asala möi'ö öbago tou danö nahia zihönö,
ube'e dania ndra'ugö ba nowi rourou dödö,
ube'e khöu doto usö balö warökha,
nuwu manu daona ana'a,
manu sisiŵa hekhehekhe duga,
manu solalai bu ki'o,
manu sizai akhe tara,
hulö dania öfazaŵa gölömbu zotöra,
hulö dania ofazaŵa gölömbu gafasi,
na möi'ö öbago danö nahia zihönö.

Ibe'e nasa banowi rourou dödö,
Zilaŵö Sila'uma Momböi,
Ata balugu Luo mewöna,
ibe'e dadaoma zamago aya tanömö danö,
isou yaŵa lali dora alangi,
khö Duha ba ndrege danö,
i'uke yaŵa zi tölungafulu famu'a,
i'uke yaŵa zi tölu gafulu fogalo,
ba nihöndrögö uwu walölöŵa sina.

Andrö dania odödö wanguŵa'ö,
ya'ugö satua dome dalinga mbatö,
hezo zino öhöndrögö,
zisara uwu walölöŵa sina.

Ibe'e nasa banowi rou rou dödö,
Zilaŵö Sila'uma momböi,
Ata Balugu Luo Mewöna,
ibe'e ndrudru zamago aya tanömö danö,
ifatö yaŵa lalai wösi foriwu zihönö,
yaŵa khö Duha ba ndrege danö,
Itaru'ö raya ba högö danö bawa mözi,
hewösa sagöi mbalazi dandra tandra badödö,
tumbu luo ilumö'ö mboto niha yöu sihönö,
da'ö ziduata tanö ogafugafu,
da'ö zisaraö danö yaŵa mbanua odöŵadöŵa.

Aekhu atö luo zibaya,
ilumö'ö raya Hili Gombelata Langi,
da'ö yaŵa ziduata mbanua ogafugafu,
zi saraö danö odöŵadöŵa.

Andrö zui dania odödögö ŵa'ö,
ya'ugö satua dome dalinga mbatö,
nano öbe'e bakha ndrundru,
zamago aya tanömö danö.

Ihalö yaŵa ngamohi mbua weto alitö,
ibe'e farökha danö bawamözi,
ibe'e farökha danö bawanika,
falö ibözi khönia nuwu duturu laŵa,
falö itika khönia nuwu duturu luo.

Ihalö nuwu likhelikhe mbihara,
ya zimeziŵa ha uwu likhelikhe mbihara,
dua fatali hedowua gawöni,
tola silötö danö bawamözi,
tola silötö danö bawanika,
falö manaere danö mo afi zumbila,
falö manue dania danö mo'afi naga.
Manö sibai manumanu mböwö,
khöra ama ni'ohe numönö solemba ba döla nora.

Ihalö laeduru fara mata itö,
ihalö laeduru famaiso mbihara,
oluo hili göŵa'göŵa,
tola sa'o'ö danö bawamözi,
tola sa'o'ö danö bawanika,
faböi maniö khönia danö mo'asio.
Hiza na'u'angeraigö ia tödögu,
manö sibai gulitö fakhe,
ni'ohe numönö solemba badöla nora.

Ihalö nuwu lagaene ana'a,
ibe'e Lambae danö bawamözi,
fa böi alulu naya tanömö danö,
ihalö wanikha sisambua taŵa deu,
ihalö zigu-sigu mbörö geu tora alangi,
ibe'e biza danö bawamözi,
ibe'e biza danö bawanika.

Awena dania maoso Ata Balugu Luo Mewöna,
idada Lauru fodada zihönö,
no göi fao bada'ö Zilaŵö Sila'uma Momböi.
Irugi raya högö danö bawa mözi,
Iŵaö Silaŵö Sila'uma Momböi,
Na duhu atö aya namagu,
wombago aya tanömö danö,
naduhu atö aya namagu,
wombago aya tanömö gölia.
Ya mane ufazaŵa gölömbu zotöra,
na'ufazaŵa mbalö warökha,
yahulö ufazaŵa gölömbu gafasi,
na'ufazaŵa mbalö dikatika.

Tenga atö dania aya namagu,
wo bago aya tanömö danö,
yahulö ufazaŵa gölömbu gawöni,
na'ufazaŵa mbalö warökha,
tenga atö dania aya namagu,
wobago aya tanömö gölia,
yahulö ufazaŵa gölömbu ni'o dasa,
na'ufazaŵa mbalö dikatika.

Andrö dania ifazaŵa,
naya nama nia balö warökha,
ifazaŵa naya nama nia,
balö dikatika.
Ana hulö sagöi ifazaŵa gölömbu zotöra,
ana hulö sagöi ifazaŵa gölömbu gafasi.

Yahaloi dania yahalokha khönia,
yaŵa Ata Balugu Luo Mewöna,
Lamane nibago bawa iki-iki,
lamane nibago ba wekaka kaka.

Sia'a Nalaŵö Sia'a mbanua,
högö danö bawamözi,
ifa'eze naya balö warökha,
ifangoloi naya balö dikatika,
lamane Onozikhö silima nga'ötö,
Godu sabö'a töla,
Ifanaere zui naya balö warökha,
ifangoloi zuinaya balö dikatika,
Lamane Laraga Talu Idanoi,
I'oloi'ö naya balö warökha,
i'oloi'ö naya balö dikatika,
Lamane Bonio Raya Ni'owuluwulu,
raya ba Hili Hati, raya ba Gunung Sitoli.

Lamane boto Zowu Sahaya Haya,
nibago bazilaluo langi,
Laraga boto Wofola,
andrö dania wa fatuhi hili wofola,
wa fabue hili Lölö lakha,
Lamane nibago bakha bazikhöri luo.
Lamane laraga boto Zawö,
tanö sino fasulö wa'a nakhe,
tanö sifasulö wa'a ndriho,
salua yaŵa gawu gawu nasi,
ifa'eze naya balö warökha,
ifasalogoi naya balö dikatika,
Lamane laraga boto Luzananu,
laraga boto Nalua,
ifa'eze naya balö warökha,
ifasaligoi naya balö dikatika,
Lamane Muzöi simura mura,
Lafau Tögi Katawaena,
Lamane I'o yöu hou mbawa gawuwukha nasi.

No awai danö wagölö-gölö,
no'awai danö wagayagaya,
Nibago Zilaŵö Sila'uma Momböi,
ifuli yomo ia barö Gosali uwu zörömi,
ifuli yomo ia barö gosali uwu ledaŵa,
khö Ata Balugu Luo Mewöna.
Iŵaö ae failo sa'e niha,
tou ba döla ero danö.
Iŵaö no'awai danö wagölö-gölö,
no awai danö wagayagaya.

Iŵaö Ata Balugu Luo Mewöna.
Lönasa lafailo tou niha ba döla ero danö.
sonasa heduhedu mböwö barö gosali,
so nasa hedu hedu mböwö barö ledaŵa,
heduhedu mböwö gasa-gasa.
Dumögö danö mosinunga,
humeu danö modela.

Andrö dania iŵaö Ata Balugu Luo mewöna,
Halö yaŵa zia'a nuwu mbihara,
be'e ndriŵa danö bawamözi,
halö yaŵa zea sisiŵa fabörö,
fotambua naya tanömö danö.

Andrö dania odödögö waö,
ya'ugö satua dome dalinga mbatö,
nano dania mube'e ndriŵa danö bawamözi,
nano dania mube'e ndriŵa danö bawanika,
nano mufotambua naya tanömö danö.

Andröligu ba andrö da'ö.

Nisura: A. Pasca Telaumbanua

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö