Wb/nia/Famadöni ndroto-ndroto niha
Samuza föna lalau fadahö-dahö ya'ira si fitu yaŵa zaeru ba si lima tou zaeru. Lafadöni-döni haniha zia'a khöra ba wa'atumbu ba ba wa'asalaŵa. Dafitu ira samadö-madöni andre: bawa ba hörö, ikhu ba dalinga, tödö, tanga ba ahe. Hulö zi fazöndra-zöndra manö, hulö zi fasoso-soso.
Imane hörö: "Sia'a ndra'o moroi khömi fefu, börö me ya'o wondrege zoföna mangila hadia ia."
Ba imane talinga: "Lö'ö le, ya'odo sa zi oföna sibai mamondrongo gofu hadia ia."
Ba imane ikhu: "Lö'ö, ya'o sa zia'a moroi khömi fefu, börö ya'o zi oföna mangago hewisa hua gofu hadia ia."
Imane göi bawa: "Lö'ö atulö fefu da'ö khömi. Ya'o zindruhu sia'a, börö me ya'o zi manga fefu hadia ia."
Ba imane tanga: "Hana le, ya'o zia'a, börö me ya'o zanga'i fefu soguna khöda."
Imane göi ahe: "Tenga le, ya'o sa zakao-kao wofanö-fanö gofu heza. Ya'o zolohe ya'ami fefu."
Ba lö'ö manö sa hede-hede dödö barö dötö'a, ifondrongo-ndrongo manö, hewisa oi sia'a ira laŵa'ö.
Ba lö aetu fasoso-soso manö ira ya'ira si daönö andrö. Siŵa luo ba siŵa mbongi lö labato. Faoma abe'e, faoma lö alulu ira khö nawöra.
Ba atage ira wakarasa sa'ae.
Awena humede dödö, ida'i-da'i wamaehagö imane: "He ya'ugö hörö, he ya'ugö ikhu, he ya'ugö talinga, ba ya'ugö bawa, ya'ugö tanga ba ya'ugö ahe. Lö aetu wamadönimi me lö atulö fefu niŵa'ömi. Da'e sa zindruhunia. Ya'ugö hörö, lö manö maoso ndra'ugö wamaigi hadia ia na lö oföna uŵa'ö khöu faigi da'ö. Simanö göi ya'ugö talinga. Lö tola maoso'ö wamondrongo hadia ia na lö oföna uŵa'ö khöu ae fondrondrongo da'ö. Ya'ugö ikhu, lö maoso ndra'ugö wangago hadia ia na lö oföna uŵa'ö khöu ago da'ö. Ya'ugö bawa, na lö oföna uŵa'ö köu a, lö maoso ndra'ugö wemanga. Ya'ugö göi tanga, lö manö möi ndra'ugö manga'i hadia ia na lö u'o'ou ndra'ugö. Simanö göi ya'ugö ahe. Lö öbörötaigö wofanö na lö ufatenge ndra'ugö. Ya'ami fefu ha samalua si no uŵa'ö. Tenga ya'ami zia'a khöda fefu. Ya'o sa zindruhu sia'a.
Nitöngöni
[edit | edit source]- No mufaudugö wanura ba EYD (Ejaan Yang Disempurnakan).
- No lö mufaogö wamo'eluaha, ena'ö lö aetu manö-manö ia ba tenga tobali famotu niha.
- No göi mu'alösö'ö ma'ifu wanutunö ya'ia.
Umbu
[edit | edit source]- Famadöni ndra Sifitu-Yaŵa-Zaeru ba Silima-Tou-Zaeru bakha ba Buku Cerita Rakyat (Manömanö) Nias Kota Gunungsitoli (2019), nifa'anö Soraya Zebua & Yasato Harefa, nga'örö 22-24.
- Amaedola ba Manömanö bakha ba Heinrich Sundermann, Niassische Texte mit Deutscher Übersetzung (1905), nga'örö 28-29.