Wb/nia/Fali’era Mba’e Lahöhö

So duo rozi mao, mao saitö ba mao sogara-gara. I'otarai si hulö wongi ofeta manaere luo, ba sanigo manö niha wakara-karasara. Ma'ifu lö möi tou mbawa zambuanö. Lö somasi mangala. Faoma lafamuyu-muyu gi'ora. Laforoma'ö zai nifö satarö. Sa'a zihulö mbawa murige'e no lafangoro. He mao saitö ba sogara-gara lalau hulu ni'ebu'ö, lafosindro dalingara. Sobaloi haniha zi'föna moga'ai.

Sara uli nagole satoru moroi khö zanörö lala no so ba gotaluara. Lö fa'edöna wa'awuwu ma mangandrauli gera-era, ha sambalö ‘khögu nagole andre'. Fa'itaria ahono ira, lahalö mbadura. Ba na so ma'ifu sambua zaliŵa ba tesao zui wokira-kirara. Alangu dödö zamondrongo. Ba'e sotöi Lahöhö si so ba mbumbu nomo Zimiki tokea. Ifakhölö ia wangalui mböröta gakalirua.

Manofu-manofu dödö Lahöhö, hadia mböhö nifadöni mao andre? Manaoka ia, möi ia tou ba golayama. Ofeta ia föna mao si lö fa'aila, mao sabe'e tandro.

“Hadia manö nifadönimi? Kaliru manö ami. Lö ta'ila mörö". Imanö Lahöhö khö mao si fameo-meo.

Aboto ba dödö mba'e me i'ila so nagole sara uli föna mao andrö.

“Da'a mbörö dahi, da'a mbörö horö khömi, nagole andre."

“Lö hadöi lala baero labagi dua". So khögu wali'era sitola mombagi faoma fa'abua nagole andre, faböi so zebua zambuanö. Hadia fao dödömi? Imanö khöda lahöhö.

Lafahökö ira mao. Lau, ifuli ifanaoka ia lahöhö. Möi ihalö wali'era sino ibe'e yaŵa ba zaita, ba ndraha maziambu.

“Fali'era andre solohe fa'atulö. Databagi dua nagole ömi."

Lahöhö no i'osatua ia. Iforoma'ö ia wa tola tobali sangatulö, same'e lala ba zi teduhö ia. Lö itaha, i taba nagole andrö faoma ifönia satarö sihulö rosö.

“Wushhh...."

Nagole tobali dua...

No agatöngö khöda mao. Hiza ba wotaba Lahöhö nagole no ebua zambuanö.

“Böi abu dödömi, so wali'era solohe fa'atulö."

Irara dödö ndra mao Lahöhö. Ba itölö göi zifarahu ba nifönia me ibagi dua nagole. Ibe'e yaŵa ba wali'era nagole Lahöhö. Ba no abua tanö ba gambölö.

“Faigi, no ebua zambuanö."

Ifahela wali'era. Ihalö nagole sabölö ebua. I'usu zui khöda Lahöhö.

“Tebai abua zambuanö," imanö Lahöhö.

Ibe'e yaŵa nagole sino alö fa'ebua. Ifahela zui. Ba no awai abua zui ba dakera. Ifuli i'usu zui nagole sabua. Simanö ofeta idugu alö manö, alö manö, wa'ebua nagole börö narako khö mao. Ofeta sindruhu-ndruhu sa'ae fadaya wali'era. Hatö izai limi ba dakera, izai limi ba gambölö. Ahono dödö Lahöhö. No fadaya!

“Ya'e tou mi'a." Imanö Lahöhö fao iboho.

Ibörötaigö Lafakuru röngö-röngöra mao.

“Öfanö ba'e! Ohe wali'erau. Ya'ugö zabuso. Hatö hua öfa'agö'ö khöma!

“No uŵa'ö khömi ba wobörö, da'e lala afu lö fa'udu ami, so wali'era khögu." Imanö wanema li mao, ba'e Lahöhö. Lö sa'ae terongo li mao. Onini ira. Nagole nifadönira no taya föna höröra. Fabali toyo ira. Ifuli ia ba mbumbu nomo ba'e. Isaitagö zui yaŵa wali'erania.

Nitöngöni

Manö-manö andre nirongo-rongoda na famanö-manö ndra satua.

Fabaliŵa lala

Fanolo ba wanura: Lala wanura • Fama'oli nösi • Ngawalö templat • Ngawalö kategori

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö