Wb/nia/Bugi Sa'usöboto ba Balugu Luomewöna
So samösa niha ba mbanua Mazingö Raya meföna, töinia Bugi. Sökhi sibai mbotonia, hulö nilömbu gela-gela, lö mosinegu ba wo'amuatania, faoma wa'asökhira Mbalugu Luomewöna si so yaŵa ba Deteholi'ana'a.
Börö wa'asökhi mbotonia andre, labe'e töinia Bugi Sa'usöboto. Owukho sibai dödö Mbugi andre, me oi lakata-kata ia niha, lazuno-zuno, lö sitöra moroi ba wa'asökhinia ba mbanuara andrö. Mendrua manö me ha Balugu Luomewöna zi faoma fokhalania.
Samuza ma'ökhö tumbu ba dödönia we'amöi mamaedogö fa'asökhinia khö Mbalugu Luomewöna yaŵa ba Deteholi'ana'a. Omasi ia i'ila hewisa wa'afagölö mboto fefu.
Lö ara aefa da'ö, ifalua ninaö'ö dödönia andrö. Iröi mbanuania, numalö ia yaŵa ba Deteholi'ana'a. Lö olohi ia, me lö ahono dödönia na lö i'ila hewisa göi wokhala mboto Mbalugu Luomewöna andrö si no ara teholi te'ata.
Me no irugi khamötö dödönia andrö banua Teteholi'ana'a, i'ondrasi Mbalugu Luomewöna.
Hiza'i, ha fo'omo Luomewöna zi so, sotöi Silewenazarata.
Isofu Bugi, hezo Mbalugu Luomewöna, ba itema linia Silewenazarata wa no mofanö möi mukoli.
Imane Bugi khö Ziliwenazarata, "No teturia khögu tou ba mbanua Mazingö, wa no fondrege wa'asökhi mboto Mbalugu Luomewöna. Omasido ufaigi ia, heza zi sökhi ndra'aga ba mboto".
Itema linia Silewenazarata, "Me so ndra'ugö mege, ufaigi moroi sa, hulö a'ine Mbalugu Luomewöna ndrau'gö, he boto, he nukha, ba he sikhala. Lö mamakhalado, uwalinga ya'ia ndra'ugö, he falukha ami he lö'ö, ba no faoma sibai".
Ifuli zui mohede Mbugi imane: "Heŵa'ae faoma wa'asökhima ba omasido nasa möi mufaigi yaŵa Ndrundrutanö. Da mafaedo göi wa'asökhima."
Imane Silewenazarata, "Amagu wö da'ö, lö börö sökhi, tenga simane fa'asökhimö. Böi sa'ae faigi ia, tobönö khöu wa'asökhimö".
Lö olohi Mbugi Sa'usöboto. Möi ia yaŵa ba wamaedo fa'asökhira khö Ndrundrutanö.
Maoso Zilewenazarata ihalö khönia gari sitefuyu, i'ohe föna Mbugi, börö me i'ila wa no olohi sibai Mbugi, ba abao dödönia na lö latehe khönia we'amöi.
Imane Silewenazarata, "Hadia lö olohi ndra'ugö we'amöi?"
Itema li, "Ha sambalö wa möido ba wamaedogö fa'asökhima."
Imane Silewenazarata, "Lau, na lö olohi'ö".
Me no aefa ihalö ndranga gari si no i'ereni, ba ibe'e föna Mbugi, imane: "Simane danga gari andre wö, mboto namagu, he ö'ila he lö'ö".
Ha aefa iŵa'ö da'ö Silewenazarata, ba i'anema'ö tefuyu mbagi Mbugi Sa'usöboto, isaŵa furi mbörötu'inia, akandro hulu ba tai'o, ba simanö göi gahenia. Simanö göi nasa nösinia tanöbö'ö, oi tefuyu ba tekiko.
Lö sa'ae fa'asökhi mboto Mbugi, no tobali tefuyu ba tekiko, lö mangawuli sökhi. Heŵa'ae maniasa ia, ba lö sa'ae mangawuli zi no numalö, hatö fanaögö fa'akao. Oi ahöli dödö niha mbanuara me ifuli ia tou, lö idunö-dunö hadia mbörö zalua khönia andrö.
Nitöngöni
[edit | edit source]- No mufaudugö wanura ba EYD (Ejaan Yang Disempurnakan).
- No lö mufaogö wamo'eluaha, ena'ö lö aetu manö-manö ia ba tenga tobali famotu niha.
- No göi mu'alösö'ö ma'ifu wanutunö ya'ia.
Umbu
[edit | edit source]Bugi Sa'usöboto ba Balugu Luomewöna bakha ba Buku Cerita Rakyat (Manömanö) Nias Kota Gunungsitoli (2019), nifa'anö Soraya Zebua & Yasato Harefa, nga'örö 41-42.