Wb/nia/Baeŵa Moro'ö
Mazingö ma Mazinö Laŵindra sato niha tanö-raya,
Botoniha Yöusihönö, tanö yöu, ba
Boto Mörö'ö Siliwuöniha, tanö ba gaekhula.
.jpg)
Ba mbanua sitölu da'e ato niha sowanua khönia.
Ero banua misa so zamatörö, nifotöi Balö Zi'ulu, Balugu, ma Salaŵa sato sibai. Fefu ndra sololohe famatörö ba mbanua sitölu andrö oi zara fahulö ira ba wondrou'ö: fa'atua-tua, fa'owaöri mboto, ba fa'afalawu gokhöta, zisiŵa soi siŵa ngawalö ba nono wobanuasa ba nono wobarahao khöra.
Ba zi samuza luo ha samuza ma'ökhö, ilau teu sabölö-bölö i'otarai miwo manu siföföna ba zahulö irugi moluo, ofeta ba zilaluo lö i'ila döhö deu, irege fefu nungo nidanö a'oi falawu molö, simanö göi nungo nidanö Oyo sanörö mbanua Boto Mörö'ö Siliwuaniha. Alua molö si falawu-lawu sombala daso.
Ato niha he iramatua, he ira'alawe, iraono, awö ndra satua site'u'u wombaloi wa'alö molö. Owulo ira ba kade ma lafo kofi. Ira satua a'oi zara mamato-matou wa'ahöli-dödöra wa'ebua molö samuza da'a moroiba molö segebua ba zi no numalö. Ba gotaluara so zanguŵa'ö wa fa'aso molö samuza da'a oi sohokha-hokha mbuda ma sata'u ita wa'atoharenia, ha sangatö ba no falawu ibala ndraso. Sito'ölönia na simane da'ö wa'atoharenia, so zaliŵa-liŵa-ba-danö zangahani moroi ba narö hili, simane ulö ma baeŵa sesolo.
Ba gotalua ndra satua zowulo ba lafo sebua andrö mozizio samösa duada si no afusi mbu högö sobumbewe ba sogambi sanau, asese lakaoni khönia tuada ere. Mu'ao ia imane: "He ya'ita fefu banuada si so ba zinga nidanö Moro'ö, mi'angelama, böi abölö ahatö ita ba zinga mbewe nidanö. Tola manö ba zi lö mutötöna itörö ulö ma baeŵa sesolo sangahani, ba böi tobali ita uso dödönia ba wamohagö ya'ita.
Me no aefa laluo ba zi lö mutötöna terongo li zi'ao-ao sifao we'ira-ira hulö nigohi mbekhu moroi raya ba lulu nidanö Oyo, lamane: Angelama, angelama, miaröu'ö ami ba zinga nidanö, mibini'ö ami, hiza misiyöu gulö sesolo mangahani. Ya'ami ira onomatua sihino döla, onomatua salio boto mihalö wangönami! Ba wamondrongo si'ao ba so'ira-ira, fefu niha a'oi afusi mbawa moloi ndrora ba wa'agata'u. A'oi fabali toyo niha sowulo ba lafo, lalau moloi miyaŵa ba hili, a'oi mo'ira-ira ndra'alawe sifao iraono sigide-ide börö wa'ata'u. Ato zamini'ö ya'ira ba detembuatö ba narö zagö, so gö zolau ya'ia ba narö gambala, so göi ndra niha satua zogikhi töla ba zangandrö ena'ö lafalua khönia wangotome'ö iraononia.
Ira onomatua sabölö töla, onomatua salio boto, lafa'anö ira, so zangai toho, gari, balatu, fafo, baluse, bagogama, ba tanöbö'önia. Lafake mbaru göröba ba wanuwö. Lafa'oli ira ba mbewe nidanö ba wanema'ö nudu samawukaisi mbanuara ba Mboto Moro'ö Siliwuaniha. Ato göi ndra ama zolohe remoremo eu ni'oguna'ö ba wanuliö udu. Hadia zifakhamö ba dangara simane so zolohe goyakoya, danga wogaoi haru famalökha galame, ba tanöbö'önia. Ohitö dödö ha sambua, ba wama'ala nudu sameta'u niha ulö sesolo nirongora.
Ba gotalua wa'afawuka dödö ba wa'ata'u, me ha sangendrulu niha sagabölö ba wogamö singa nidanö, so namada sotöi Balugu Sangenisato ya'ia zanuhe bakha bambanua Boto Moro'ö, muhede ia ba wamahono niha sato sowulo ba zinga nidanö, imane:
"He ya'ami onomatua sabölö sihino-döla salio boto, böi i'enemai alio fawuka ogömi-dödö ba wa'aösö. Haogö ua wamondrongo duria nirongo, fahela ua hadia ba dödö, böi aösö faduhu-dödöda ba zawena morongo, lö na'i tatu na atulö ba na faya, ba hana alio sibai muhi'a-dödöda ba wamalua fasuwöta si lö ta'ila haniha zanuwö ya'ita". Faböi fasala ita ba wangotahögö ya'ia, ta'osisi'ö ua he zo zindruhunia. Amatunöisi ua ba zatua si no biha fangera-ngera, fa böi alua khöda gabula dödö sofenaeta. Na no mu'ila hezo zindruhunia, awena tafaudugö wangöna nihenagöda ba wanema'ö emali salua andrö.
Atulö sibai mene-mene nifaehagö namada Balugu Sangenisato, faudu ba faböbö ia ba gamaedola zatua föna khöda ba Danö niha me lamane: Na lö satua sangila mo'ere, na lö satua sifabewe, itörö narö danö afore, itörö hogu geu lauru wakhe. Ba wamondrongora mene-mene namada Balugu Sangenisato, niha sato ya mendrua manö ndraono matua sabölö töla onomatua salio boto, awana oi fatöngö bawa, me awena aboto ba dödöra wa nifaluara lö enahöi, me nilau ba wa'alio nifalua ba wa'aösö. Andrö lahalö sambua gangetuala ba wangosisi'ö hadia sibai ni'ata'ufi zaurifö sangahani ba nidanö Oyo andrö.
Me no lahaogö wangosisi'ö ba lanehegö sibai, awena aboto ba dödöra wa tenga ulö sesolo zangahani ya'ia ba nidanö Oyo da'ö, ba hiza'i baeŵa sesolo sotalinga sizai daga lou mbawa ba no a'usö gindrö-kindrönia.
Awena a'oi zara laboho mbawa khö nawöra iraono amtua sabölö töla, me tenga sa ulö sesolo zitohare ba nidanö Oyo, no i baeŵa sesolo. Andrö ha ahou zamö'i teboloso duria ba mbanua Boto Moro'ö Siliwuöniha wa tenga ulö zalua, ba hiza i Baeŵa sesolo. Ba wamondrongora turia safuria da'ö, ira niha sato soloi ba hili megeno la alio'ö wangai balatura fahulö ira lagamö-gamö zinga nidanö Oyo nomege, simanö göi ndraona sigide-ide sege-ege sifa'alai megeno oi zara lahalö khöra nono gara ba wanebu baeŵa ma sa dania mate na no göna ba högönia. Ha sangendrulu ira wogamö singa nidanö. Hadia gohitö dödöra? Fahulö ira enaö ya'ira zi'oföna mamesokho baeŵa sesolo andrö. Börö molo'ö angetula wahasara dödö ba Danö Niha nifotöi Amakhoita ba wofua ahulua, haniha zi'oföna mamesokho; ya'ia zahulu, ba tana khönia ma urakhania ebua moroi ba niha bö'ö. Da'e zahöli dödöda ba wamaigi warange ndra banuada, faudu ba gamaedola zatua me imane: Na ba döŵa ŵani sambua benua lö ya'o, ba na ba döwa gaesoso ba tanö föna so ndra'o.
Me no oi owulo niha sato ba zinga nidanö, oi zara la balagö nawöra, ba sogöi zifatuli hulu fahulö ba woagö mbewe nidanö. So ba gotaluara Balugu Sangenisato i'amenesi ira mohede mu'ao ia imane: "He ya'ami ira banuada sato, miangenanö böi ha mohufa-hufa manö. Böi mi eŵa mbaeŵa na hõnõ wa ifuta ofagaölö ia ahele mbalatumi ba tola mesokho ami, mifaudugö woleŵa gamaudu mbaginia, böi mi'ewa dalu ba mendrua manö gi'onia, böi fahulö ami ba woleŵa, tokhai mbalatu khö nawömi. Abölö sökhi mi faduhusi todö khö zonekhe ma sito'ölö fagai baeŵa ma si no asese moleŵa baeŵa, hakha ya'ira zama'ala me ba da'ö göi so wa'onekhera."
Awena ahono niha sato no mege, lawuwu ira furi, lafolala föna ndra satua sonekhe ba wangai baeŵa, andrö me no larugi zinga nidanö ba zi so baera silö tebato ba wombukhö-bukhö'ö ya'ia, la baloi ndrege oroma högö ba baginia, ha sangaefa la'olewa'ö bagi, ahou zamö'i aetu mbagi baeŵa ba wotataisira, tezaumba högö yaŵa ba ngöfi. I'anemaö ha sangendrulu niha sato he satua he iraono hasara-dödöra ba wolulugö baeŵa sesolo da'ö ba ngöfi nidanö. Ba da'e faböbö gamaedola ndra satua föna na lamane: "Aoha noro nilului wahea, aoha noro nilului waoso, alisi tafalaŵa-laŵa, hulu tafaewolo-wolo" eluahania "Alio na nifalului zato".
Me no ofeta ba ngöfi ba dete danö, fefu ndra sabölö töla ba sagatarö balatu lafaluluisi wanatawi, so zangai gaöti, so zanga'i förögi, so zangai lalae, ba so zangai si'e, sölu, ba fakake tanöbö'önia. Ira satua si fao iraono modadao ira lafasui zanatawi ahuluara baeŵa sesolo. Me no aefa la tatawi, ba labagi ladozigö ira fefu fagölö-gölö wa'egebua lö högö ba lö i'o. Oi omuso dödöra wangawuli ba nomo, fefu oi monoro danga ira Lasuno Luolangi ba wa'owua-wua dödö.
Ba lala me mangawuli ira, oi zara lafatou-tou tödöra, lamane: na lö Balugu Sangenisato zo'amenesi ba sa nuturu lala khöda, ba tola ahöwö ita baeŵa sesolo da'ö. Ba da'e itörö na laŵaö-ŵaö ira satua ba gamaedola: Andrö wa so zatua sanguŵa-nguŵa'ö, andrö wa so gere sondröniaö wa me sumange onönötania: Satua za nguŵa-nguŵa'ö, iraono zolo'ö-lo'ö.
I'otarai me luo da'ö lö aetu itörö-törö dödöra Baeŵa Moro'ö solohe fa'owua-wua dödö.
Saohagölö
Umbu:
Nidunö-dunö ma manö-manö ndra satua ba ndraono (cerita rakyat)