Wb/nia/BALUGU SIRAO

Balugu Sirao Uwu Zihönö, balugu Sirao Uwu Zato.

Yaŵa ba Deteholi ana’a, yaŵa ba Deteholi hamo.

Dörö so’aya gelagela, so’aya balö ngaroto.

Sokhö afore si’öfa lali, ba Lauru su’asu’a ba Zato.

Ba samatörö fobanua, ba Solohe Huku ba Zato.

Yaŵa ba Deteholi Ana’a, Yaŵa ba Deteholi hamo.

Sangila molohe ba lala satulö, sangatulö’ö huhuo ba Zato.

Dörö siŵa khönia nono matua sifagölö-gölö, siŵa khönia nono matua si fangai faedo.

Oi ono fangali mbörösisi, oi ono fangali mbu’u kawono.

Samatohu balö götö-götö, samatohu balö ngaroto.

Ya’ia wa ha samuza ha ma’ökhö, ba ha samuza luo.

Meno atua sa’ae namada, Balugu Sirao uwu Zihönö.

Meno atua namada, Balugu Sirao uwu Zato.

Ba lö sa’ae fa’ahono wobanua, Lö fahasara ba Zato.

Melö sa’ae sangila molohe balala, balö sa’ae sangatulö ba Zato.

Andrö dania mu’ao ira khö Zirao uwu Zihönö, ba fahuhuo ira khö Zirao uwu Zato.

Laŵaö..

Ha wangali mbörösisi, ha wangali mbu’u kawono.

Samatörö fobanua zihönö, samatörö fobanua Zato.

Faböi fawuka yaŵa Detehöli Ana’a, faböi elungu göi Zato.

Örö i dania wa oi zara fa ya’iya’ia, ba oi zara fa ya’oya’o.

Nono Zirao si dasiŵa si fagölö-gölö, Ono Zirao si dasiŵa si fangai faedo.

Oi zara mamahulö famatörö fobanua, Oi zara mamahulö famatörö ba Zato.

Ya’ia dania wahasamuza ma’ökhö.

Örö mu’ao Zirao uwu Zihönö, i’be’e wa’ahono ba Zato.

He ya’ami fobanua, ba he göi ya’ami ono makhelo.

Böi sa mibusi dödö yaŵa gate, ba böi göi milangusi dödö zato.

Ba ya’ami göi iraonogu, si dasiŵa si fagölö-gölö.

Iraonogu si dasiŵa, sifangai faedo.

Böi ua mifahulö famatörö, böi göi mifahulö fe’aso.

So sa dania khögu dandra ila’ila, so sa khögu dandra fama’ötö.

Utaru’ö dania dotoa mburusa, ba utaru’ö sa dania dotoa doho.

Tou badalu golayama, tou badalu zebolo.

Ha dania zanuge hulö manu, ha zimiwo hulö zilatao.

Sanahanahae hulö zumbila, ba sanarinari ia hulö Moyo.

Yaŵa ba nikhu golakola, yaŵa ba nikhu hulayo.

Da’ö sadania nono fangali mbörösisi, da’ö wangali mbu’u kawono;

Da’ö dania zo’aya gelagela, da’ö zolohe huku ba Zato;

Da’ö göi zamatörö fobanua, ba samakhoi lala ba Zato.

Yaŵa ba Deteholi Ana’a, yaŵa ba deteholi hamo.

Sangokhögö zuzu hae zuzu dawöla, ba zuzu hae zuzu kaso;

Sidadao ba hörö laŵalaŵa, ba sangokhögö fotalu zalo,

Samaogö fotalifusöta, ba sangorudu ono makhelo.

Da’ö nibe’e dali mbanua, ba ni’odaligö göi niha sato.

Ya'ia dania,,,

Wa ha samuza ma’ökhö, ha samuza ngaluo.

Örö fahulö nono sia’a ba wa’atumbu, fahulö nono sia’a ba we’aso.

Ibe’e faohi fa’abölö döla, ibe’e faohi fa’alio mboto.

Dörö ilau ia tou ba dalu newali, ilau ia tou ba dalu zebolo.

I’olembai dotoa mburusa, i’olembai dotoa doho ni’ohulayo.

Lö’ö sa i’angonai'ö nama somböi nga’eu, lö’ö sa’ae i’angonai’ö nama sendroro boto.

I’odaligö i wa’abölö döla, i’odaligö wa’alio mboto.

Dörö medölu ifaröga ia, ba medölu iroinagö no.

Ba lö na’i irugi niasa dotoa mburusa, ba lö na’i irugi niasa dotoa doho ni’ohulayo.

No mangawuli tou ba dalu niwali, mangawuli tou ba dalu zebolo;

Örö ilau mowengu me’e modaŵadaŵa, ilau mowengu me’e maningoningo.

Me tenga nahiania ba wa’atumbu, tenga nahiania ba we'aso.

Ba wamatörö fobanua, ba wamaeri niha sato.

Yaŵa ba deteholi ana’a, yaŵa ba deteholi hamo;

Dörö i dania falali nono Zirao si fagölö, falali nono Zirao si fangai faedo.

Lalau mbalazi döla fa’abölö, lalau mbalazi fa’alio mboto.

Samösa lö si tola manuge ba nikhu golakola, samösa lö si tola manuge ba nikhu hulayo.

Oi zara mowenguwengu wobanua, oi zara abu dödö niha sato.

Me lö tesönda wangali mbörösisi, ba lö samatohu balö ngaroto;

Andö dania mu’ao Zirao uwu zihönö, mua’ao Zirao uwu zato.

Khö nono siakhi ba wa’atumbu, khö nono siakhi ba we’aso.

Ya’ia Luomewöna ono omasiö, Luomewöna samomo boto.

iŵaö: "Ae’e anuge ba ikhu golakola, anuge yaŵa ba ikhu hulayo.

Ba so sa gamonita ba wofanö, ba so ni’o balazigö ba wedadao.

Ena’ö fao i khöu lakhömi zalaŵa, ba fao khöu löfö zato;

Ya’ia dania wa awena maoso Luomewöna, ifazaŵa ia fao fa’alio mboto.

Idölö ia ba zuzu hare zuzu dawöla.

i’angona’ö bakha gana’a sasoso, i’angona’ö zuzu hare gawe, i’angona’ö dufo föröma kaso, i’angona’ö hörö laŵalaŵa, i’angona'ö wotalu zalo, i’angonaisi luze nora, i’angona’ö lulu mba’o, i’angona’ö lou halasa wakhe, i’angona’ö dalu zebolo, i’angona’ö gowe ni’oniha-niha, i’angona’ö gara sebolo, ba i’olembai dotoa mburusa, i’olembai dotoa do ni’ohulayo.

Dörö ihalö khönia wa’ahono dödö, ihalö khönia wa’ahono mboto.

ilau fa’öndu ngarö-ngarö dödö, ilau fa’öndu sifao fa’ahono mboto:

“Na nahiagu atö ba wa’atumbu, ba sinehe khögu göi ba we’aso.

Ba da’uandö nangi moroi raya, u’andö nangi si hohohoho.

Solohe ya’o yaŵa ba ikhu golakola, solohe ya’o yaŵa ba ikhu doho ni’o hulayo”.

Örö dania walö ahou zamö’i, ba lö ara si’ai me no.

Iwalö aekhu nangi moroi raya, ba alua nangi si hohohoho.

Samazaŵa yaŵa Luomewöna, solohe yaŵa ba ikhu hulayo.

Ya’ia dania wa’ilau manuge hulö manu, ba miwo ia hulö zilatao.

Ilau manahae hulö zumbila, ba manarinari ia hulö Moyo.

Yaŵa ba nikhu golakola, yaŵa ba nikhu doho ni’ohulayo.

Dörö i dania awena omuso dödö wobanua, awena owua-wua dödö niha sato.

me no sa’ae so Zamatohu famatörö, ba no sa’ae so Zolohe huku ba Zato.

Ya’ia dania wa iwa’ö Balugu Sirao uwu Zihönö.

Ba nononia si dasiŵa si fagölö-gölö, ba he göi ba wobanua niha sato.

A’oi sa faya wa’abölö döla, ba oi manö faya wa’alio mboto.

Na lö mu’ondaligö mbalö gondekhata, na lö fadoma faliera fanulo.

Ba he wö’i balatu he toho, ba’adeha nalö fangaro.

Ya'ahowu fefu.

Ama Pasca Telaumbanua

Fabaliŵa lala

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö