Wb/nia/Böröta Nafo Si Lima Endronga

From Wikimedia Incubator
< Wb‎ | niaWb > nia > Böröta Nafo Si Lima Endronga

Bago

Heza gotaraönia me moŵa'a,
Heza gotaraönia me mobörö,
Ha samuza luo öna-öna,
Ha samuza luo zi ma'ökhö,
Me mate idaö'ö-daö'ö,
Me atua ida'a-da'a,
Zirao Uwu Zihönö,
Zirao Uwu Zato.
Owulo khönia nono simatua,
Owulo khönia nono sila'i,
Ono khönia si felezara lölö,
Ono khönia si felendrua gaya-gaya,
Latawi mbökania sotöra,
Latawi mbökania nukha,
Aetu khönia noso ba zinata mbawa,
Moloi khönia noso soriwi-riwi lökhö.
Lö lai geheha sogafu-gafu,
Lö lai geheha so döwadöwa,
Latema da'ö ono simatua,
Latema da'ö ono sila'i,
So i geheha si lö mutema,
Sanue tareŵe börö gawa,
Sanörö rawi mbawa duwu-tuwu,
Sanörö rawi mbawa du'asa,
Sanufa hogu geu tora'alangi,
Tora'a tanömö nafo,
Tora'a tanömö lahina,
Andrö dania ha samuza ha ma'ökhö,
Samuza luo mahemolu mbanua.
Möi barawi mbawa duwu-tuwu,
Möi barawi mbawa dua'asa,
Inada Silaewehai Nazarata.
Iwaö khö Nata Balugu Luo Mewöna,
Khö Nata Balugu Luo Zaho,
Imane hadia yaŵa ba hogu dora'alangi,
Zawai lömbu roto matua,
Zimatonga danö ihagaini,
Zisaraö mbanua aruzö-ruzö.
Iwaö Nata Balugu Luo Mewöna,
Iwaö Nata Balugu Luo Zaho,
Da'ö geheha si lö mutema,
Eheha namada börö zatua,
Eheha nama börö zadono.
Ae lili tou mbörö geu tora'langi,
Tora'a tanömö nafo,
Tora'a tanömö lahina.
Öndru nangi öfatika-tika,
Öndru nangi öfahöngö-höngö,
Angi sawai mbula-mbula,
Angi sawai mbolo-mbolo.
Ilau sagöi angi si hese tanö,
Angi si fatötö kara,
Angi si fatötö dao,
Aruru mömö masire ana'a,
Aekhu tou balali sofiga,
Aekhu tou balali somako,
Lö i'anema'ö ihalö uwuduru,
Lö i'anema'ö ihalö uwudanga,
Isalökhöi faoma ngalu-ngalu nukha,
Isalökhöi faoma ngalu-ngalu zotöra,
Idaya-daya hulö ndaono,
Ihae-hae hulö zilaöwa,
Muhede mömö masire ana'a,
Imane böi ohe yomo ndra'o barö gosali,
Böi ohe yomo ndra'o barö ledawa,
Böi tanödo yomo ba zuzu dawöla ana'a,
Ma dania fadaö khögu mbulu fadaö döla,
Angongo ndra'o mo'ene ndrawa,
Aleu ndra'o mosilaöwa gara,
Andrö dania maoso ninada Silaewe Hae Nazarata,
Möi mutanögö tou ba gaotö famarö göba,
Möi mutanögö tou ba gaotö wanikha,
Lamane ihedegö,
Ae tanömö nafo Zi'ulu,
Ae tanömö nafo Zalawa,
Yatobali ndra'ugö bago ria,
Yatobali ndra'ugö bago mömö,
Bago masire ana'a,
Sire döla geu böwö,
Andrö ha öfa bongi döi zi lalö,
Ha dania öfa bongi wa'ara,
Alua löndru sofalölöwa,
Aboto mbulu mofanikha,
Aboto mbulu mohara'a,
Tedou ba wamaigi-maigi,
Tedou ba wangila-ngila,
Dua izai ohi ba wabaliŵa,
Fa datölu monöu mbulu döla,
Fa daöfa monöu mbulu ndraha,
Fa darua monöu mbulu wabaliŵa.
Ketelö ya'i mbago atua
Haniha duka zogete solöwa,
Haniha duka zogökhö so ndra'a,
Ira kadidi akhi Gawao'a,
Ira kalue akhi Laowöndröma,
Ikhökhö ba galo töla balaki,
Ikhoi-khoi ba galo töla ana'a,
I'otölu-tölu rozi mbu,
I'o mendru-mendrua rozi huwa,
Da'ö mbago masire ana'a,
Si medölu wa'aukhu lada,
Si mendua waukhu lahia,
I'obini-bini mbalota,
I'alu-alui gali mawa,
Yomo khö Nazariti mböröta,
Ba khö Nazarata me tewua'a,
Da'ö mbago masire ana'a,
Da'ö mbagoda ma'ökhö da'a.

Betua

Hadia nafo sorudu ba mbola,
Ya'ia mbetua tuturu gara,
Ha samuza luo ha ma'ökhö,
Ha samuza luo öna-öna,
Möi barawi mbawa duwu-tuwu,
Möi barawi mbawa du'asa,
Ata hulu hada ana'a,
Ilau bahö si sambu-sambua,
Bahö si lö tambalina,
Aetu högö so kuri duha,
Fabali khönia högö siŵa naha,
Tofana gutonia sizai böra,
Sanörö yaŵa ero mbanua,
Saekhu tou ba nasi solöba,
Da'ö mbetua tuturu gara,
Nitunu ba hulo Wunga,
Nitunu ba hulo Makora
Nileu bahulo Galifa,
Da'ö nösi mbuku gadö laoya,
Da'ö nafoda ma'ökhö da'a.

Fino

Hadia nafo sorudu ba mbola,
Fino solölö gafasi,
Fino solölö gana'a,
Hadia gotaraönia me böröta,
Hadia gotaraönia me mowua,
Ha samuza luo öna-öna,
Ha samuza luo zi ma'ökhö,
Möi mondröni taelu wanari,
Möi mondröni taelu wolaya,
Tou ba newali olayama,
Ewali talu zebolo,
Ina Silaewe Hai Nazarata,
No fasaule khönia ngenge dalinga,
Fagobi khönia mbua gela-gela,
Ateu khönia zi matonga mböra,
Ibözi dödö i'orudua danga,
Imane alai nayagu bua gela-gela ana'a,
Masa'ae so dome dalinga mbatö,
Ma so dome dalu zinata,
Lö khögu maena ele-ele mboto,
Lö khögu maena ele-ele dödö,
Andrö dania iwaö,
Khö Zilaewe Hai Nazarata,
Nata Balugu Luo Mewöna,
Ae fobagolö wananö ba dödö,
Ae tanögö ba ngai hambo gosali,
Ae hayaigö ba hambo ledawa,
Itanögö ihedegö Ina Sihai Nazarata,
Ae tanömö nafo Zi'ulu,
Ae tanömö nafo Zalaŵa,
Ha öfa mbongi döi zi lalö,
Ha öfa mbongi wa'ara,
Moledo löndru sofalölöŵa,
Moledo löndru sowua,
Tedou ba wamaigi-maigi,
Tedou ba wangila-ngila,
Ha sandroto töla mbua yaŵa,
Tenga nitendre töla na manöi,
Ha nitendre bola afasi,
Aruru wino siŵa ngamohi,
Tenga ni'ogoli'ö madawa,
Tenga ni'ogoli'ö förögi,
Ha nihekhe mbawa wa'iki,
Fabali wino felendrua goli,
Ba hönö yomo dome oi dozi,
Ba dua rozi tö zangawuli,
Da'ö nafo mbanua sangondrasi,
Labe göi böli gölö zamidi,
Da'ö wino solölö afasi,
Da'ö wino solölö ana'a,
Ahono da'ö barö gosali,
Ahono da'ö barö ledawa,
Da'ö winoda ma'ökhö da'a.

Gambe

Hadia nafo sorudu ba mbola,
Ya'ia gambe nihare nilata,
Hezo gotaraönia me böröta,
Hezo gotaraönia me mobulu,
Ha samuza luo öna-öna,
Ilau mamoe mari masa,
Buruti Si Wohia Lönga,
No isaka durunia laŵa,
Ifoe khönia duturu sebua,
Ha do duru Si Wohia Lönga,
Möi ia ifo wangolö wonaha,
Möi ia sa itanögö wahaya,
Tou ba newali olayama,
Da'ö gambe nihare nilata,
Da'ö nilata sandrohu niha,
nafoda ma'ökhö da'a.

Tawuo

Hadia wamasoli famaruka,
Hadia nafo sorudu ba mbola,
Ya'ia dawuo sini tawuo lara,
Hadia gotaraönia me böröta,
Hadia gotaraönia me bohou na,
Si föfö gangi-angi mbihara,
Yaŵa khö Nata Balugu Luo Mewöna,
Yaŵa khö Nata Balugu Luo Zaho,
Ifobagolö ifonahia ba dödö,
Ina Silewe Hai Nazarata,
Möi mutanögö tou ba ngai gosali,
Itanögö tou ba ngai hambo ledawa,
Lamane ihedegö,
Imane ae tanömö nafo Zi'ulu,
Ae tanömö nafo zalaŵa,
Lö öfa bongi döi zi lalö,
Lö öfa bongi wa'ara,
Moledo löndru sofalölöŵa,
Alua löndru sofanikha,
Tedou ba wamaigi-maigi,
Tedou ba wangila-ngila,
Da'ö dawuo sini tawuo lara,
Tawuo sodoi bara ata,
Da'ö zizindro-zindro lö laso,
Da'ö zizio-zio lö anöita,
Da'ö dawuo so bulu gafasi,
Da'ö dawuo so bulu ana'a,
Da'ö zi hönö zi manga zagörö,
Da'ö zi hönö zi manga zadika,
Da'ö nösi nuwu galimawa öri,
Da'ö nösi mbola ni'otaraŵa,
Ahono da'ö yomo barö gosali,
Ahono yaŵa barö ledawa,
Yaŵa khö Nata Balugu Luo Mewöna,
Yaŵa khö Nata Balugu Luo Zaho,
Da'ö dawuo irugi ia da'a.



Sura Ni'amoni'ö: Mataio | Mareko | Luka | Yohane | Halöŵö Zinenge | Roma | Korindro I | Korindro II | Galatia | Nefeso | Filifi | Kolose | Tesalonika I | Tesalonika II | Timoteo I | Timoteo II | Tito | Filemo | Heberaio | Yakobo | Fetero I | Fetero II | Yohane I | Yohane II | Yohane III | Yuda | Fama'ele'ö

Fanolo wanura: Lala wanura | Fama'oli nösi | Ngawalö templat | Ngawalö kategori
Kategori: Amaedola | Budaya | Cerpen | Fangi'ila (Ilmu Pengetahuan) | Hendri-hendri | Hoho | Hikaya | Kamus Nias-Jerman | Kese-Kese | Lala wondrino (Resep) | Maena | Manö-manö | Manö-manö Nono Niha | Uso dödö (Entertainment) | Novela | Sejarah | Seni | Sinanö | Sinunö | Sura Ni'amoni'ö | Taromali Ero Migu | Turia Somuso Dödö

Fanolo wofanö: Olayama | Angombakhata | Bawagöli zato | Monganga afo | Nahia wamakori | Nga'örö spesial | Ngawalö wanolo | Sangai halöŵö | Safuria tebulö | Wikibuku | Wikikamus | Wikipedia | Wikiyunior