Wb/nia/Böhö tanömö döla - Böhö tanömö gana'a
Da'uhalö börö duma-duma,
da'ube börö maedo-maedo,
famaedo wa'anumana,
zatua khöma yomo ba dalinga mbatö.
Tema dania samuza ha ma'ökhö,
khö Laoya töla gana'a,
raya ba danö ngawanua Mazingö.
So khönia mböhö si mörö-mörö,
so khönia mböhö sogaya-gaya,
böhö si döfi femörö,
böhö si döfi hatö maoso.
Sara yaŵa wahania bola lahina,
sara yaŵa wahania bola nafo.
Waha khönia tanö ba gambölö,
saita nuwu galimaŵa öri,
saita nuwu mbola ni'otaraŵa.
Waha khönia tanö ba gambera,
sita lauru tumba ba wakhe,
saita gafore si'öfa hala,
afore si öfa singa,
saita naya buluwali'era,
saita naya buluwanulo.
no fafönö yaŵa ba dalu galizuzu.
Yahaloi dania yahalokha khönia,
no fatiu na khöda baŵa nadu,
no ikhai khönia maria si siŵa talinga,
no ikhai khönia maria si siŵa ta'a-ta'a,
ba wamana hiu sogete-gete,
sitou ba nasi baŵa nadu,
awai yaŵa banua si rita-rita,
awai yaŵa banua si ratara.
No tohafa yomo mböhö simörö-mörö,
no tohafa yomo mböhö sigaya-gaya,
böhö si döfi femörö, böhö si döfi femaoso.
Itörö rawi mbawa duwu-tuwu,
itörö rawi mbawa du'asa,
ifazaumba ia si tou ba dalu golayama,
mo'ugu mo'agau banö.
Idölö folöi sitou ba nasi baŵa nadu,
igamö-gamö siefo khö duha so'omo ana'a.
No sa fao khönia nuwu galimaŵa öri,
no sa fao khönia nuwu mbola ni'otaraŵa,
no fao khönia naya töla lauru,
no fao khönia naya töla gafore,
afore si'öfa lali afore si'öfa singa,
no fao khönia naya buluwali'era,
no fao khönia naya buluwanulo.
saga ni'omanu-manu saga ni'obörö mboha.
Ya'alohi ya'alokha khönia wö balugu,
na'uböbögö ia tödögu,
na'ufaedogö ba lala gamaedola,
na'ufaedogö ba lala hoho,
na ufali'ö mato ma'i-ma'ifu,
na'ufaliö lö'abölö-bölö,
zaröu sibai mböhö simörö-mörö,
zaröu sibai mböhö sigaya-gaya,
raya ba danö gawanua Mazingö.
Manö sibai yomo zowatö ande börö zonuza,
manö sibai yomo zowatö andre börö zinumana.
Andrö dania walö sumange dome
salua ba dalu golayama,
andrö walö sumangemi ya'ami tome
salua ba dalu newali,
aya khömi wa'ebolo dödö.
Andrö ligu ba andrö da'ö.