Wb/nia/Böhö ba Bae'a
Samuza ma'ökhö no owulo mbae'a ba mbotogeu sanau somumu nisöndrara bakha ba gatua. Hiza khöu, balazi wa'omuso dödöra, zara lakoko-kokoto nawöra tanöbö'ö, afu-afura faoma la'owua-wua'ö dödöra wemanga ö sami andrö, ahuluara. Hawa'ato mbae'a samondrongo li koto-koto andrö, oi humi'a dödö wangondrasi nahia si so boto mumu andrö.
Ba zi lö mudöna döna, tohare manö sageu mböhö sebua, no bada-badago mboto, no ifaöga wamakhö-makhölö ba wangalui önia. Itörö zinga mbotogeu somumu andrö, lö i'la-ila wa so mbae'a sanana-nana ba gamaudu da'ö, so nitendrenia, to'ewe misa barö ndru'u. Salöföra wö na'i lö nihundragönia, hadia mena'ö na agafufu.
Afökhö dödö mbae'a nitendrenia, imane ba dödönia, "Da ulau mofönu khö mböhö andrö."
Ifahatö ia khö mböhö, imane: "He böhö, hana wa asilöyaŵa sibai ndra'ugö, harumani wa ötendre ndra'o. Hana wa lö öfaigi-faigi lalau? Lö lai wa alaŵa sibai gaheu ba ebua mbotou, hana wa no öfaöga'ö na mofanö'ö, lö ba dödöu sa'ae awöu ösi gatua andre?"
Itema linia böhö wanguma'ö, "Hadia we..., ya'ugö wö'i zasilöyaŵa. Aine, da uhundragö'ö tou ba da'a!"
Imane zui Bae'a khö mböhö, "Lö lai wa'abölö, lö lai wa'anau gahe, baloi göu, samuza ma'ökhö ŵara lö falukha zui ita, u'oroma'ö göi dania khöu wa tenga si tebai ndra'aga andre."
Ibini'ö ia ba ndru'u, lö sa'ae ifarangai mböhö.
Inönö wehedenia böhö, "Böi oloi ba, hatö'ögö na sindruhu abölö'ö, da u'oroma'ö khöu wa'abölögu".
So mbae'a bö'ö, muhede ia khö mböhö, imane: "He böhö, lö lai wa'ebua mbotou lö lai wa'anau gaheu, ba lö lai wa'abe'e mbawau. Lö mu'ila haniha zimöna na talau fatandra wofanö ya'ita andre. Böi otanado ua ma'ökhö. Wa'olofogu na'i. Ofanö ua, hiza'i, na omasi'ö atö ö'oroma'ö wa'abölömö, tema talau falukha ba da'a ba zi dua wongi. Tafasui hili andre mato mewulu famasui, tafaigi sibai haniha zanau badu. Hönagö lau manga, ba busoi'ögö ua."
Aefa da'ö labini'ö ira, lakafa ira ba danö.
Börö wa'aila mböhö, itema li mbae'a, imane: "Lau...! Ba zi dua wongi falukha ita ba da'e, he! Aila zi lö tohare ba luo da'ö, tenga ono namania ia."
Me no mofanö sa'ae mböhö andrö, owulo mangawuli mbae'a lalau mangosara. Lafatunö hewisa nifaluara na tohare mböhö ba zi dua wongi tö. Oi zara lafaehagö zöndrara. Ba gafuriata lahalö rahuta gera-erara, ya'ia da'e:
- La'alui ua hezo dobala si to'ölö itörö-törö böhö gamaudu hili si so ira andrö, ba latöngöni.
- Ba ginötö da'ö dania lafa'oli ira ba zinga lala mato fulu ngaröfa wo'otalua ba zi sandrohu töröŵa mböhö andrö.
- Ero na isofu böhö "Hezo ö Bae'a" ba lamane wanema li "Ya'edo" ma "Ya'e ndra'o." Ha si so gamaudu fönania zanema li ena'ö na'atö iwai no tehulö ia, tandra wa sabölö moroi khö mböhö sasilöyaŵa andrö. He irugi bongi böi mubulö'ö zimanö.
Hizaŵa'i, me no irugi inötö waondratara, dua ngaluo aefa fawongi ira, ha tumbu-luo sibai ba no te'oli mbae'a fasui hili andrö, molo'ö si no la'osara'ö. Mato sambua za aefa da'ö, ba tohare mböhö, no ifadandro-dandro, no ifaöga, ba ifakhölö-khölö ia. Lö ni'ilania wa so mbae'a, börö me no lakafa ira ba danö.
Mu'ao mböhö imane, "Tawai i, he-he-he. Ata'u Mbae'a! Ha bawa zi lö ba'a...! Hezo ö na sindruhu?"
No azöla-zöla li mbae'a si so fönania, imane, "Ya'edo böhö! Tenga sata'u ndra'odo, no sodo ba da'e. Ahulödo moroi khöu mege, dörö lö oroma khöu ndra'o me no öfaöga'ö ba wa'asilöyaŵamö. Imane-mane wö ba gamaedola zatua föna, tola tasawö zinata mbawa namada, ba alakha sibai na tasawö zinata mbawada. Hadia no abuso'ö ba? Ma lö nisöndrau na'i ösi dalumö ba zahulö andre? Na duhu dödömö, tema ya'i taborögö."
Lö ifombadu-mbadu sa'ae böhö, fao fa'aukhu dödö i'anema'ö li da'ö imane, "Hu..., böi oya'ö sa'ae khöu.... Aine, gohido... Taborögö. Hiza he! Aliogö!"
Me no laborögö mato alölö afo si sara wagohisa, manofu mböhö, "Hezo'ö, Bae'a?"
Imane Bae'a si so fönania, "Ya'edo, fönau."
Tokea mböhö, börö me furinia mege so mbae'a, ba hana wa no fönania so iada'e. Ihötöi ifandrai wagohisania böhö.
Ba ahakhö sara roko, ifuli isofu imane, "Hewisa, hezo'ö Bae'a?"
Itema linia bae'a si so fönania, imane "Ya'e ndra'o, tebai'ö lö?"
Itugu fasalakha dödö mböhö, ba ihötöi ihoda wagohisania.
Simanö-manö alua irugi laluo, awena mewitu famasui. Lö irugi zimeziŵa famasui, ba no muhae sibai mböhö, atata döla, tolea tou ba taya nosonia.
Tohare mbae'a sato, lahurufai wamaigi böhö si no tolea tou ba danö. Tambai dödöra omuso, ba tambai göi ahakhö dödöra.
Lamane-mane khö nawöra, "Ha-ha-ha-ha, no ala zebua bawa, sebua fa'asilöyaŵa. Faya wa'abölö ba fa'ebua mboto, faya wa'anau waha ba fa'anau gaeŵa."
Lamane nasa, "Ganuno galaŵa i'osa'ö gara sebua, fa'amate lua-lua. Ala wa'amu'i ibe'e fa'atua-tua."
Me no sa'ae mate mböhö andrö, ba tenga botomumu ni'ara, la'owasaini ine wemanga nagole mböhö andrö, oi zara lakaoni nawöra, sate laturiagö khö dalifusöra, omuso sibai dödöra gahuluara sebua andrö.
Nitöngöni
[edit | edit source]- No mufaudugö wanura ba EYD (Ejaan Yang Disempurnakan).
- No lö mufaogö wamo'eluaha, ena'ö lö aetu manö-manö ia ba tenga tobali famotu niha.
- No göi mu'alösö'ö ma'ifu wanutunö ya'ia.
Umbu
[edit | edit source]Böhö ba Bae'a bakha ba Buku Cerita Rakyat (Manömanö) Nias Kota Gunungsitoli (2019), nifa'anö Soraya Zebua & Yasato Harefa, nga'örö 50-53.