Wb/nia/Afökhö Wabalisa

Famobörö

Töi niha ni'oguna'ö ba mbuku andre, Nela (Ina Dawido), Roro (Ama Dawido), Dawido (ono sia'a), Ramura (ganete zia'a, sitatalu), Ros (siakhi). Fefu lala gatunöŵa ba mbuku andre ba no sinörö'ö ba gera-era zanura. Na so zi faudu ba döi ma zui si faudu ba lala ni fatunö ba no si tenga ni odödögö.

WA Moroi Khö Nama Dawido

Lö angi ba lö siheu. Modögö danga ga Nela ba wombaso duria nitemania ba zahulö wongi ngaluo Sinaya, dua mbawa Sitölu döfi si dua ngahönö a dua wulu. Itema sambua duria ba WA moroi ba nomoro ba HP-nia.

"FABALI ITA!" Turia da'a tesura hurufo sebua fefu. So wönu. So Wakarasa sebua.

Tenga ha tanga Ganela zodögö. I'anemai'ö göi manimba-nimba dödönia. Ihasugö ia. Tedadao ia ba tetendro'ö ia tou ba dowa, ba ngai mbawa ndruhö mbate'era. Atoru tou gezoi nigogohenia.

Tokea nono Ganela sia'a, Dawido, si no lima fakhe fa'ebua sa'ae. HP nigogohenia ifazaumba manö yawa ba sofa. Igogohe mbo'ö dakera ba kambölö ninania faoma tangania. Ifazaŵa ma'ifu mbawa ninania ena'ö faoma fatöngö ira.

"Are you okay, Mom?" Ba nomo, Dawido no to'ölö fahuhuo ba li Inggris.

"Iya, I'm okay," itema li Dawido inania.

"Lö hana-hana nogu." Ifuli itohugö wamözini salora. Famai zui Dawido ba hapenia.

Fehede 'fabali', mendrua ba zi faronga, no sambua fehede sabua. So wa'aila na no sa'ae ofeta ba gangetula 'fabali'. Mendrua ba wa'aniha ba khö Keriso, fabalisa zifaronga sambua nitegu Lowalangi. Aboto sibai ba dödö Nina Dawido wa so wamahaö ba Daroma Li: haniha zamabali fo'omonia, heŵa'ae tenga börö horö, niha da'ö zamobörö horö wo'omonia, na ifuli mangowalu wo'omonia andrö.

No oya wa oriri nitörö ga Nela ba wangowalunia khö ga Roro.

Findra Wohalöŵö

Me sebua sekola Nama Dawido--no ihalö S-2-nia--sekola wanete S-1. Oya nekhe-nekhe si so ba dangania. Inönö nasa me no ono zohalöŵö ba zoi tanö bö'ö ia. No oya soi ihundragö. Ara toröi ia fao khö ndra amania ba Afrika. Tatu, ato niha segebua faka zi fahuwu ba sasese falukha khönia. Andrö dania wa teboka lala harazakinia, mohalöŵö ia ba zi sambua gödo sebua so urusai ulidanö andre.

Lö sa'ae tokea dödö nina Dawido na fasara waŵa lö tohare Nama Dawido. Mohalöŵödo! Da'ö dahi ero-ero na so wanofu. Ilau manö zi lö hede-hede Ina Dawido. He ŵa'ae oya manö nirasoinia si fabö'ö zalua khö Nama Dawido.

No tölu waŵa aefa lafara'u tanga ira ba gosali. Simane si to'ölö, itohugö halöŵönia Ina Dawido ba zi sambua gödo asuransi ba Jakarta. No samigu sa'ae lö sangawuli Nama Dawido. Harazaki manö me no so ira ba ginötö tola fahuhuo fa'ila hörö ba hape.

Fondruhö

Bersambung...

Bale zato: Olayama • Angombakhata • Bawagöli zato • Monganga afo • Nahia wamakori • Nga'örö spesial • Ngawalö wanolo • Safuria tebulö • Sanandrösa • Sangai halöŵö