Wy/skr/جامع مسجد صادق، بہاولپور

اندرون شہر بہاولپور وچ چوک شہزادی دے نزدیک سفید سنگ مرمر نال بݨی ہوئی، ݙو منزلہ وسیع و عریض مسجد واقع ہے جیہڑی ایں مسجد دے بانی نواب صادق پنجم عباسی دی نسبت نال جامع مسجد صادق دے ناں نال مشہور اے. ایں مسجد دے بلند تے سفید مینار پورے شہر تے ایندے اردگرد دور دور توں نظر آندن. نواب صاحب نے اے مسجد اپݨی زندگی وچ شروع کروائی پر اے انہاں دی وفات توں کافی عرصے بعد تک زیر تعمیر رہی. مسجد دا گراؤنڈ فلور ہک وسیع ہال، سنگ مر مر دے ٹائلاں نال مزین صحن، بیت الخلا تے طویل و خوبصورت وضوء خانے تے مشتمل ہے. ایں فلور دے درمیان توں پوڑیاں فرسٹ فلور تے ونجݨ واسطے بݨائے ڳن جنہاں دا اپݨا سہݨپ ہے. فرسٹ فلور تے پہنچدیاں ہی مسجد دا پہلا حصہ اے جیہڑا ݙو بلند میناراں اتے ہک وسیع برآمدے تے مشتمل اے تے ایہو حصہ خواتین واسطے وی مخصوص اے. ایں مسجد دا مین صحن اتلے فلور تے ہے تے برآمدے توں نکلدے ای اے وسیع و عریض صحن شروع تھی ویندا اے جیندے تلے مسجد دے اثاثہ جات یعنی مارکیٹ تے دیگر دکاناں ہن جیہڑے مسجد دی طرح محکمہ اوقاف دے کنٹرول وچ ہن. صحن وچ فرسٹ فلور دا وضوء خانہ تے مسجد توں ٻاہر ونجݨ واسطے ݙوں پاسے پوڑیاں تے گیٹ ہن جیہڑے بازار وچ واقع ہن. صحن ختم تھیوݨ توں بعد مسجد دا سب توں سوہݨا تے اہم حصہ فرسٹ فلور دا ہال شروع تھیندا اے. صحن دی طرح ایندا رقبہ وی کافی اے. ایندا فرنٹ سفید ماربل اتے قرآنی آیات دی لکھائی تے مشتمل ہے. ݙوہاں طرف اچے سفید مینار ہن. ہال دے اندر چھت دا ڈیزائن انتہائی خوبصورت اے تے اندر موجود چھت تے فرش دے ستون ایندے سہݨپ کوں ودھیندن. وسیب دی سیر واسطے آئے ہوئے ہر سیاح کوں چاہیدا اے کہ اگراونکوں بہاولپور آوݨ دا موقع ملے تاں اتھوں دا وزٹ ضرور کرے.