Wt/kaa/Tartıw

Feyil

1. Bir zattı ornınan qozǵaltıw ushın háreket jasaw, ornınan suwırıp julıp alıw, julıp taslaw. Gúrji menen kópegi, tartıptı seniń lashıńdı («Máspatsha»).
2. Belgili bir sazdı shertiw, sazendelik ásbabında oynaw. Gernay qoymay tartıp, Sırnay qoymay shertti (Berdaq). Ol ayttı bir nama tartıp ber endi, Qále Maqtumqulı, qále Berdaqtı (I. Yusupov).
3. Baylaw, tańıw, shandıw. Ya usı jipten bir aǵashqa tartıp baylap qoyıp, birewimiz oǵan kóz qulaq bolıp tursaq eken (A. Bekimbetov).
4. Bir nárseden qutılıwǵa kómeklesiw, járdemlesiw. Shıǵarıp tereńnen tartıp qolımnan, yarıw-doslar bir mindirdi (A. Dabılov).
5. Dán tuqımların digirmannan, qarazdan ótkeriw, jegiziw. Bir kepshik arpanı demde-aq tartıp keldi (K. Sultanov).
6. awıs. Tuqımlas, aǵayinles adamlardıń túr-túsi, minez-qulqı h. t. b. qásiyetleri jaǵınan bir-birine uqsas, úyles keliwi. Kempir «Qosıbaydıń balası bolǵan soń ákesine tartar» dep qattı qayrım sózdiń basına barmay otır edi (K. Sultanov). Er dayısına tartadı («Qq. x. n»). Seniń tuqımıńa tartqan (K. Sultanov).
7. awıs. Qızıqtırıw, ıntıqtırıw, kewilin awdarıw. Báhárgi waqıt jer beti atlastay dónip adamnıń kózin, oyın ózine erksiz tartadı (M. Dáribaev). ♦ Tartıp alıw – basıp alıw, ıqtıyarına qoymay zorlap alıw. Qolı-jolına qaramay tartıp aldı («Qq. x. e»). Telefonımdı tartıp aldı (Ó. Ayjanov). Mıyıq tartıw – jımıyıw, kúlimsirew. Áysánem mıyıǵın tartıp kúldi (J. Aymurzaev). Atızlarda mıyıǵın tartıp, Ashıladı aq altın (T. Seytjanov). Azap tartıw – qıynalıw japa shegiw. Rossiyada grajdanlar urısı bolıp jatqan máhálde suwıqtan kóp azap tarttı (Q. Irmanov). Juwapqa tartıw – jazalaw, ayıplaw. Onı islegen qılmısı boyınsha juwapqa tarttı. Jazasın tartıw – jábir kóriw, juwapqa tartılıw. Jazasın tartsın zańǵar! — dedi Qulbay kúygeninen (J. Aymurzaev). Temeki tartıw – shılım, papiros shegiw. Qabaǵı tartıw – mańlay terisiniń jıyırılıwı. Sazayın tartıw – jazasın alıw. Tabaq tartıw – qonaqqa awqat beriw. Jol tartıw – a) saparǵa shıǵıw. b) uzaq jolǵa shıǵıw, júrip ketiw. Kóterilgen sózler keshe ushqanda, Jol tartıp quyashlı Ózbekstanǵa (A. Dabılov).