Wt/kaa/Chaynik

at. 1. Suw qaynatıw ushın metalldan islengen ıdıs. Mıs chaynik. 2. Qaynatılǵan suwdı demlew ushın metalldan, farfordan islengen shúmekli hám uslaǵıshı bar domalaq ıdıs, úy- ruwzıger ásbabı, xojalıq buyımı. Farfor chaynik. Onıń ishinde tınısh tappay chaynikke chay quyıp bir kempir júrdi (Ó.Ayjanov). Zaxira chayniklerge chaydı demlep alıp kelip, onnan keyin de úy jumısları menen mashqul boldı (T.Najimov). Altın chaynik — altınnan islengen yaki altın jalatqan chaynik. Arshadaǵı altın chaynik penen altın keseler, altın bilezik penen altın árebekler, gáwhar taslı júzikler menen altın saplı qılıshlardı shıǵardı (A.Bekimbetov). Shubar chaynik — hár túrli naǵıs penen sırlanǵan alamısh chaynik. Almabas úyrekke megzes uzınsha shubar chaynikten chaydı simirip otır («Ámiwdárya» j.). Mańqıyıp turǵan, shubar chaynik attan qulaǵan shabandozday awdarılıp túsip pashaq-pashaq boldı (Q.Ayımbetov). Baqa chaynik — kishkene tırbıq chaynik. ... jeńgey shúmegi qańıltır menen qursawlanǵan judırıqtay baqa chaynikke shıpa shópten demlep, aldına qoydı (Ó.Xojaniyazov). Chaynik aydaspa — gón.s. eski dáwirdegi hayal-qızlar menen jigitlerdiń bir-birine chaynik jiberisip, chay ishisetuǵın otırıspası, otırıspadaǵı chay ishisiwi. Dasturxan jayılıp, chaynik aydaspa baslandı, jırawdıń quyqıljıtıp aytqan kúldirgi sózlerine jigitler kúlisip, baǵanaǵı ashıw umıt bolıp baratır edi (K.Sultanov). Chaynik-kese - chaynik penen keselerdıń ulıwma ataması, jıyıntıǵı. Qumar gá besik terbetip, gá chaynik-kása sıpırıp shırpıldap júr (T.Qayıpbergenov). Qonaqlar túrgelgennen keyin, dárriw chaynik-kesalar da jıynaldı (Q.Ayımbetov).