Wt/azb/کور‌اوغلونون تورکمان سفری
کور‌اوغلونون تورکمان سفری
[edit | edit source]
آنا آنلاتیم
- کور‌اوغلونون تورکمان سفری
دئيیرلر کور‌اوغلونون اوغلو يوخ ایدی. نیگار خانیمی آلمیشدیسا دا، آمما اؤولادی اولمامیشدی. کور‌اوغلو قارسین اتکلرینده‌کی آلاجالار آدلی داغدا عثمانلی قوشونو ایله توققوشدوغو زامان چوخ برک دارا دۆشوب، يئددی گۆن، يئددی گئجه او ماهاسیرادا قالمیشدی.
بۇندان چوخ قورخدوغونا گؤره کیشیلیکدن کسیلمیشدی.
گۆنلرین بیر گۆنو يئنه ده چارداقلی چنلیبئلده کئف مجلیسی قۇرولموشدو.
خانیملار، دلیلر، مئهترلر گئيینیب-کئچینیب کور‌اوغلونون، نیگار خانیمین ساغ-سولوندا ايلشمیشدیلر.
نئچه واخت ایدی کی، بیر يانا سفر يوخ ایدی. کور‌اوغلونون باشی داوادان، قالماقالدان بیر آز آيازیمیشدی.
کور‌اوغلونون جۆنون آشیغی دا بۇ کئف مجلیسینده ایدی. بیر طرفده اوتوروب کور‌اوغلونو گؤزله‌يیردی کی، نه‌دن دئسه اوندان اوخوسون. هامی کئفديدی.
بۇنلارین ایچینده بیرجه نیگار خانیم قمگین ایدی. دئيیرلر نیگار خانیم الینی اۇزادیب جیبیندن بالاجا بیر گۆزگو چێخارتدی. اؤزونه گۆزگوده باخیب درین بیر آه چکدی. کور‌اوغلو بۇنو گؤروب سوروشدو: – آي نیگار خانیم، کئف بیزده، داماق بیزده، مال-دؤولت بیزده، سن نیيه بئله قمگینسن؟
- کور‌اوغلونون جاوابیندان نیگار خانیم بیر ده آينايا باخدی. گئنه آه
- چکیب، آلدی گؤرک نه دئدی:
- قم-قۆسسم باشیمدان آشیب،
- من تک درده دالان يوخدو.
- قۆربت ائلده باغریم بیشیب،
- نئجه يادا سالان يوخدو.
- نئجه باخیم ائو-ائشیيه،
- يارالی کؤنلوم اۆشويه.
- توز بۆروموش بوش بئشیيه،
- شیرین لايلا چالان يوخدو.
- چنلیبئلده قار گؤرونور،
- گۆللر منه خار گؤرونور،
- گۆنوم آهو-زار گؤرونور،
- بیر قايدیما قالان يوخدو.
- تۇتون مجلیسده ياسیمی،
- گئيمیشم قم لیباسیمی،
- بۇ فلکدن قیصاصیمی،
- نه زاماندی آلان يوخدو.
- چنلیبئلی گۆللر بزر،
- گۆللر سارالسا کیم اۆزر؟
- هر قۇش بالاسیينان گزر،
- نیيه سنین بالان يوخدو؟
- کور‌اوغلوسان هاي سالارسان،
- پاشالاردان باج آلارسان،
- نئچه شهرلر تالارسان،
- سن تک شهری تالان يوخدو.
- نه درد اولسا منی تاپار،
- سونسوزلوق بیر يانیم چاپار،
- ياریلغان اۇچار، توز قوپار،
- گؤره‌سن کی، قالان يوخدو.
- نیگاری درده گتیرن،
- جسه‌دین قبره يئتیرن،
- کور‌اوغلو نامین گؤتورن
- يۇردوندا سون اولان يوخدو.
- نیگار خانیمین سؤزلریندن کور‌اوغلو دا قملندی. اونو دا درد آلدی.
- آشیق جۆنونون ایشی بئله گؤروب سازی سینه‌سینه باسیب دئدی:
- بۆرويوب عالمی شانین، شؤهرتین،
- بیر دئ، قوچ کور‌اوغلو، نه‌دن ملولسان؟
- آدین چکیلنده ياغی تیترگیر،
- بیر دئ، قوچ کور‌اوغلو، نه‌دن ملولسان؟
- دلیلر يئریگیر، آلايلار بۆکور،
- دۆشمانلار الیندن داد، هزار چکیر،
- قۇشلار قاناد سالیر، شاهلار تۆک تؤکور،
- بیر دئ، قوچ کور‌اوغلو، نه‌دن ملولسان؟
- داغلارین باشیندان کئچممیر کاروان،
- اووساری الینده آغلايیر ساروان،
- تاجیرلر الیندن چکیرلر آمان،
- بیر دئ، قوچ کور‌اوغلو، نه‌دن ملولسان؟
- نرندن مئشه‌ده اسیر آسلانلار،
- زربیندن تیترگیر خوتکارلار، خانلار،
- سنه باش ايیرلر بَيلر، سۇلطانلار،
- بیر دئ، قوچ کور‌اوغلو، نه‌دن ملولسان؟
- قێراتین اۆستونده دیلی-تنگ اولان،
- پاشالار وارینا تالانلار سالان،
- ایسگندر تک سۇدان باج-خراج آلان،
- بیر دئ، قوچ کور‌اوغلو، نه‌دن ملولسان؟
- چنلیبئلده آغیر مجلیسلر قۇرآن،
- تۇنجولار دؤشده‌ين، ايشلر قێران،
- آياقلاردا اسن، باشلاردا دۇران،
- بیر دئ، قوچ کور‌اوغلو، نه‌دن ملولسان؟
- يانیندا ايلشیب آلا گؤز نیگار،
- ایگیدلر، دلیلر بۆتون هر نه وار،
- آشیق جۆنون شوغا گلر، اوخويار،
- بیر دئ، قوچ کور‌اوغلو، نه‌دن ملولسان؟
- آشیق جۆنونون اوخوماسیندان کور‌اوغلونون قلبی جوشا گلدی، کؤهنه
- يارالاری تزه‌لندی، سازی آلدی، گؤرک نه دئدی:
- سنه دئيیم، آشیق جۆنون،
- گؤزلریمده ياش اینیلدر،
- بیر ایگید اوغلان اۇجوندان،
- شئش آتاندا، بئش اینیلدر.
- تئللی نیگار ملول دۇرار،
- ال قوينوندا بوينون بۇرار،
- مۇژگانین سینه‌مه وۇرار،
- گؤز اوخشايار، قاش اینیلدر.
- کؤنلومو نامردلر يێخسا،
- پولاد قولچاق قولوم سێخسا،
- میسری قێلینج قێندان چێخسا،
- لئش سریلر، باش اینیلدر.
- جوشدو دلی کؤنول، جوشدو،
- مؤوج وئردی، کلله‌دن آشدی،
- بیر مئشه‌يه کی، اود دۆشدو،
- قۇرو يانار، ياش اینیلدر.
- کور‌اوغلويام، سؤزوم چوخدو،
- سؤزلریم پئيکانلی اوخدو،
- هانسی ایگیدین سونو يوخدو،
- اوجاق سؤنر، داش اینیلدر.
- ائله کی، کور‌اوغلو سؤزونو تامام ائله‌دی، آشیق جۆنون دئدی:
- – آي قوچ کور‌اوغلو، ائله بۇنا گؤره ملولسان؟ بۇنا نه وار کی؟ سنین
- منیم کیمی آشیغین وار. دۆنيا منیم آياغیمین آلتیندا سینی کیمیدی.
- گئده‌رم، هر يانی گزه‌رم، آختارارام، بیر رۆستم کیمی ایگید، يۇسیف
- کیمی گؤزل اوغلان تاپارام، گلیب سنه خبر وئررم، گتیریب اؤزونه اوغول
- ائله‌يرسن.
- آشیق جۆنونون بۇ مصلحتینه کور‌اوغلو، دلیلر، خانیملار، هامیسی
- راضی اولدو. تئللی نیگار دئدی:
- – آي آشیق جۆنون، نه واخت بیر بئله ایش ائله‌سن منیم، کور‌اوغلونون،
- دلیلرین حؤرمتی سنین اۆستوندن اکسیک اولماز.
- بۇ سؤز نیگارین آغزیندان چێخان کیمی آشیق جۆنون سازینی گؤتوردو.
- کور‌اوغلوينان، دلیلرنن، خانیملارنان الته‌من اولوب يولا دۆشدو. داغ
- آشدی، دره کئچدی، نئچه-نئچه اويماقلار، نئچه-نئچه شهرلر گزدی، دؤوران
- آچدی، مجلیسلر قۇردو، چوخ اوغلانلار گؤردو، چوخ ایگیدلر نیشانلادی،
- آمما قوچ کور‌اوغلويا، آلاگؤز نیگارا لايیق اولان رۆستم کیمی ایگید، يۇسیف
- کیمی گؤزل اوغلان گؤرمه‌دی. هر يئردن، هر تورپاقدان کئچیب گئتدی،
- آخشام اۆسته تکه-تۆرکماندا بیر اوبايا چێخدی. گؤردو اوبانین چوبانچولوقلاری،
- جاوانلاری سۆرولرینی، ناخیرلارینی يوللاردان، دؤشلردن تؤکوب
- قاباقلاریندا اوبايا هايلايیرلار. اونلار آشیق جۆنونو گؤرجک باشینا يێغیشیب
- دئدیلر:
- – آشیق، نه ياخشی اولدو، سنی تاپدیق. بۇ گئجه بیزیم اوبادا توي مجلیسی
- وار.
- آشیق جۆنون ياخاسینی قێراغا چکیب گئتمک ایسته‌دیسه ده، تۆرکمان
- ایگیدلری ال چکمه‌دیلر، اونو اؤزلری ایله آپاردیلار.
- آخشام توي مجلیسی قۇرولدو. توي يیيه‌سی دؤولتلی بیر آدامدی. تکتورکمانین
- آدلی-سانلی ایگیدلری، آغساققال، قاراساققاللاری، جاهال-جۇهوللاری،
- قێز-گلینلری هامیسی ممه يئيندن پپه دئينه تويا يێغیلمیشدیلار.
- يئمک-ایچمکدن سونرا آشیق جۆنونو اورتايا چێخارتدیلار. سوروشدولار کی،
- آي آشیق، هارادان گلیرسن، هارايا گئدیرسن؟ کیمین آشیغیسان؟
- آشیق جۆنون دئدی:
- – قوچ کور‌اوغلونون آشیغیيام. چنلیبئلدن گلیب عرضوروما گئدیردیم.
- ایگیدلردن بیریسی کور‌اوغلو آدینی ائشیدیب دئدی:
- – آي آشیق، کور‌اوغلونو چوخ وۇروب تۇتان، ایگید دئيیرلر. بیر اونون
- شجاعتیندن، ایگیتلیکلریندن دئ، قۇلاق آساق.
- آشیق جۆنون سازی سینه‌سینه باسیب، گؤرک نه دئدی:
- ایگیدلر اويلاغی او چنلیبئلده
- داشدان قالا قۇرآن قوچ کور‌اوغلودو.
- کینلی پاشالارا مئيدان اوخويان،
- چوخ کؤهلننر يوران قوچ کور‌اوغلودو.
- دۆشمانین اۆستونو قۇش تک آلدیران،
- آسلانلار دیشیندن اوولار سالدیران،
- خاقانلار باشینا شئشپر چالدیران،
- قۇلاج قوللار بۇران قوچ کور‌اوغلودو.
- داغلاری، داشلاری دۇمان بۆروسه،
- قێلینجلار پاس آتیب قێندا چۆروسه،
- مصر، ایستانبول، شام، تامام يئریسه،
- تک قاباقدا دۇران قوچ کور‌اوغلودو.
- قايادا تور قۇروب ترلانلار تۇتان،
- يۆز ياغینی بیردن قول-قولا چاتان،
- عربات دؤشونه سردارلار قاتان،
- ار باغیرلار ياران قوچ کور‌اوغلودو.
- جۆنون، ايلشیبلر ارلر قارشیندا،
- آلايلار، باشلانار تر ساواشیندا،
- يئددی مین يئددی يۆز دلی باشیندا،
- شاهلار اۆسته واران قوچ کور‌اوغلودو.
- آشیق جۆنون سؤزونو قۇرتارار-قۇرتارماز توي آداملاری اونا ال چالدیلار،
- آفرین دئدیلر. بول نمر يێغدیلار. آشیق جۆنون يێغیلان نمرلری
- يیيه‌لرینه قايتاریب دئدی:
- – قوچ کور‌اوغلونون مالی، دؤولتی چوخدو. من بئله قپیک-قۇروشلارا
- تاماه سالیب کور‌اوغلونون آدینی باتیرمارام. من نمر، پۇل يێغان آشیقلاردان
- دئيیلم.
- دئدیلر:
- – ائله ایسه اوخو، کؤنلوموزو آچ، دردیمیزی، قمیمیزی داغیت.
- آشیق جۆنون سازینی گؤتوروب ایسته‌دی کی، يئنه کور‌اوغلودان اوخوسون، بۇ
- زامان اؤزونه قۆرره‌لننلردن بیری آياغا دۇروب دئدی:
- – آي آشیق، کور‌اوغلودان اوخودوغون يئتر، ایندی ده بیزیم ایگیدلردن
- اوخو.
- آشیق جۆنون دئدی:
- – آشیق گؤردويونو چاغیرار. من کور‌اوغلونو گؤرموشم، اوندان اوخويورام.
- بۇرايا تزه گلمیشم، سیزین ایگیدلری گؤرمه‌میشم، اونلاردان
- نئجه اوخويوم؟ مجلیسده سیز سؤيله‌ين آدلی-سانلی ایگید وارسا، قالخسین،
- گؤروم، اؤزونه لايیق تعریفینی ائله‌يیم.
- بۇ سؤز آشیق جۆنونون آغزیندان چێخان کیمی هر ياندان:
- – قسسبوغلو ائيواز آياغا قالخسین، آشیق اونون ایگیدلیگینه باخیب تعریف
- سؤيله‌سین – دئدیلر.
- ائيواز آياغا قالخدی. آشیق جۆنون باخدی کی، واللاه بۇ بیر اوغلاندی کی،
- ایگیدلیکده رۆستمزال، گؤزللیکده يۇسیف اونون الینه سۇ تؤکمه‌يه
- ياراماز. اۆرگینده دئدی، آي گیدی دۆنيا، آختاردیغیمی تاپمیشام. ائله
- کور‌اوغلو، تئللی نیگارا لايیق اوغلاندی کی وار. آشیق جۆنون جوشا گلیب آلدی،
- گؤرک نه دئدی:
- مجلیس باشیندا دۇروبسان،
- نئچه ایگیدلر يوروبسان،
- قاشلارینی نه قۇروبسان،
- بۆرجه بنزر بويون، ائيواز!
- گؤزللر پیشوازا گلر،
- دوغان آنا قدرین بیلر،
- آلنین آچیق، اۆزون گۆلر،
- نه شیریندی سۇيون، ائيواز!
- سن يۇسیفی-کنانسانمی؟
- پاشاسانمی، سۇلطانسانمی؟
- ملکسنمی، اینسانسانمی؟
- کیمه چاتار سويون، ائيواز؟!
- چاتماز گۆجونه نر سنین،
- آدین دیلده ازبر سنین،
- کور‌اوغلو کیمی ار سنین،
- آخیر اولور اويون، ائيواز!
- آشیق جۆنون سنه حئیران،
- ائله‌مه کؤنلومو ویران،
- چنلیبئلده قويوب نیشان
- بیر تۇتايدیم تويون، ائيواز!
- هر ياندان کیشیلر، اوغلانلار، قێزلار، گلینلر ال چالدیلار. آشیق جۆنونو
- دؤنه-دؤنه آلقیشلادیلار. ساغ اول، ساغ اولون اۆستوندن ياغیردی. آشیق جۆنون
- گئنه ده جوشدو، باشلادی، گؤرک نه دئدی:
- چنلیبئل باشیندا عصره‌میش بیر نر،
- ائيواز، گلر آلار کور‌اوغلو سنی
- يێخار قايالاری، آتار داغلاری،
- کمندینه سالار کور‌اوغلو سنی.
- ائيواز آشیق جۆنونون کور‌اوغلو ایله اونو قوخوتماسینی گؤروب آلدی جاوابیندا
- گؤرک نه دئدی:
- ایگیدلیکده واردی ائلده آدیمیز
- آشیق، بیزه تکه-تۆرکمان دئيرلر!
- هارا وارساق قاباغیمیز قايیتماز
- آشیق، بیزه تکه-تۆرکمان دئيرلر!
- آشیق جۆنون:
- دینیب دانیشدیغی داوادی، دوودو،
- سؤندورن رۇزگاردی، ياندیران قوودو.
- عالمی بۆروين سؤنمز آلوودو،
- آلوولارا قالار کور‌اوغلو سنی!
- ائيواز:
- دۆشمان گؤزون اويون-اويون اويارام،
- منصور کیمی دریسینی سويارام.
- کور‌اوغلونو قێزیل قانا بويارام،
- آشیق، بیزه تکه-تۆرکمان دئيرلر.
- آشیق جۆنون:
- داوا گۆنو قۇلاج قولو قايیتماز،
- نره‌سیندن گئجه ایگیدلر ياتماز.
- يئرده اولسان، گؤيده اولسان، اۇنوتماز،
- آرار، آخیر بۇلار کور‌اوغلو سنی.
- ائيواز:
- کؤهلن مینیب چێخار اولسام يولوما،
- کیم ياپیشار ریکابیما، قولوما؟
- کور‌اوغلو ساغیما، حسن سولوما،
- آشیق، بیزه تکه-تۆرکمان دئيرلر!
- آشیق جۆنون:
- داغلارین باشیندا يئل کیمین اثر،
- بیر قێلینجا يئتمیش يئددی باش کسر،
- ترلان گمیشدیریب چنلیده کۆسر،
- گلر قێيا، چالار کور‌اوغلو سنی.
- ائيواز:
- تۆرکمانلارین ساي-سئچمه‌سین يێغارام،
- بۇلود اولوب چنلیبئله ياغارام،
- کور‌اوغلونو اؤزوم تۇتوب بوغارام،
- آشیق، بیزه تکه-تۆرکمان دئيرلر!
- آشیق جۆنون:
- جۆنون کور‌اوغلويا بیر شیرین نؤکر،
- دۆشمانین اۆستونه گؤيدن اود تؤکر،
- شێغیيیب قێراتین ترکینه چکر،
- عزیز-خلف قێلار کور‌اوغلو سنی!
- ائيواز:
- هايقیریب مئيداندا آچسام قول-قانات،
- قاری دۆشمان قاباغیمدا اولار مات،
- ائيوازی قورخوتماز کور‌اوغلو، قێرات،
- آشیق، بیزه تکه-تۆرکمان دئيرلر.
- آشیق جۆنون ایسته‌دی کی، حربه-زوربا ایله، سؤز گۆلشدیرمه ایله ائيوازی
- قورخودوب اؤزو ایله چنلیبئله آپارسین. بیر ده کور‌اوغلونو چنلیبئلدن
- بۇرايا گتیریب گؤتور قويا، زحمته سالماسین. گؤردو يوخ، بۇ او دئيیلنلردن
- دئيیل، هر بئله زارافاتلارنان قورخاسی جاناوار دئيیل. بیر آز دا
- آرتیق دانیشسا چؤمچه‌سینی آلیب باشینا چالار. آشیق جۆنون گیزلیجه ائيوازین
- اصیل-سويونو، يئر يۇردونو ياخشیجا اؤيرندی. تويون صاباحی گۆنو يولو
- الینه آلیب چنلیبئل سنسن گئتدی، گئجه گۆندوزه سالدی، يولون دامارینی
- کسیب هر يئردن کئچدی، گلدی بیر صاباح ائرته‌سی چنلیبئله چاتدی. کور‌اوغلو،
- دلیلر، خانیملار اونو گؤروب باشینا يێغیشدیلار. گؤروشندن سونرا يئتمیش
- يئددی يئردن دئدیلر:
- – آي آشیق جۆنون، هارالاری، گزدین، نه گؤردون، نه ائشیتدین؟ نیيه بئله
- گئج گلدین؟
- اونلارین جاوابیندا آشیق جۆنون سازینی گؤتوروب گؤرک نه دئدی:
- واردیم شهره، اوبايا،
- کئچدی زیمیستان، ياز گؤردوم.
- اۇغرادیم چؤله، صحرايا،
- بۇلاق اۆسته يارپیز گؤردوم.
- دن-دن اولدو داغلاردا قار،
- باغلار گتیردی هئيوا، نار.
- دولاندی قێش، گلدی باهار،
- گؤللرده اؤردک، قاز گؤردوم.
- دولاندیم نئچه اويماغی،
- کئچدیم دۆزو، آشدیم داغی،
- حلب قصری، باغداد باغی،
- دؤشنمیش پايانداز گؤردوم.
- گئدنده منه اولدو تۇش
- قارس، قاغیزمان، ایستانبول، مۇش،
- چاناققالا، ساریقامیش
- ایگیدلرین شاهباز گؤردوم.
- آلاجالاردان آشاندا،
- عرضورومو دولاشاندا،
- قنیملرتک ساواشاندا
- گؤزو قانلی خێرسیز گؤردوم.
- ايری قێلینجی بئلینده،
- تعریفی مردلر دیلینده،
- او تکه-تۆرکمان ائلینده،
- قاسسابوغلو ائيواز گؤردوم.
- لاچین کیمی گؤيده سۆزور،
- نامردلر باغرینی ازیر،
- مجلیسینده ساغی گزیر،
- اورتادا صؤحبت، ساز گؤردوم.
- آشیق جۆنون، دئ اۆز باری،
- دولاندیم دۆنيانی ياری،
- قوچ کور‌اوغلونو، نیگاری،
- ائيواز تک اری آز گؤردوم.
- آشیق جۆنونا جاوابیندا کور‌اوغلو اۆزونو باشینداکی خانلارا، بَيلره،
- پاشالارا قان اۇددوران، تاجیرلره تۆک سالدیران ایگید دلیلره تۇتوب، آلدی
- گؤرک نه دئدی:
- يێغیلین دلیلر، مجلیس باشینا،
- وئرین شیرین باده، جانا نۇش اولسون!
- وۇرون نردتاختانی، گلیب اويناياق،
- آتین آغ زرلری، شئشی-بئش اولسون!
- بیر خلت بیچه‌رم ائيواز بويوندان،
- اینجیمه‌رم خاسيتیندن، خويوندان،
- کسین تۇنجلولاردان، قێرین قويوندان،
- يئيین دلیلریم، کئفلر خوش اولسون!
- اۇجا داغلار باشین آلماسین دۇمان،
- کور‌اوغلو کؤنلونه گلمه‌سین گۇمان،
- وئررم او ایگیده بئش يۆز مین تۆمن
- قانسیرقادا گلن قاننی باش اولسون!..
- دلی مئهتر قێراتی ایفچین يهرله‌يیب اونون بارابارینا گتیردی. کور‌اوغلو
- خانیملارلا، دلیلرله گؤروشدو، حالاللاشدی. قێراتی مینمک ایسته‌ينده نیگار
- ایره‌لی يئریگیب دئدی:
- – آي کور‌اوغلو، تکه-تۆرکمان کیمی قورخولو، اۇزاق سفره گئدیرسن،
- قوي دلیلردن بیر نئچه‌سی يانیندا گئتسین، دئمک اولماز، بیردن داوازاد
- اولار، سنین اۆچون يالقیز ياخشی کئچمز.
- کور‌اوغلو دئدی:
- – نیگار خانیم، سن چنلیبئلدن، دلیلردن ياخشی مۇغايات اول،
- مندن قورخما. قێرات کی، آلتیمدادی منه زاوال يوخدو، هارادان اولسا،
- وۇروب، ياریب سلامات چێخاجام. اۆرگینی سێخما، بیر نئچه گۆنه ائيوازی
- گتیریب چاتدیرارام سنه.
- کور‌اوغلو قێراتین زیلتنگینی برکیتدی. بیر الینی يالمانینا آتیب بئلینه
- سێچرادی. دلیلر، خانیملار کور‌اوغلونون ائله قێراتا سێچراماغین گؤردولر.
- قێرات يئل کیمی اسدی، قۇش کیمی اۇچدو، گدیکلری کئچدی، بئللر آشدی، يوخوشلار
- چێخدی، ائنیشلر ائندی، يئرین دامارینی کسیب نئچه گۆندن سونرا تکتورکمانین
- ياخینلیغینا چاتدی. کور‌اوغلو اۇزون يول گلمیشدی، هم آجیمیشدی،
- هم ده يورولموشدو. ایسته‌دی کی، دۆشوب آتی دینجلتسین، اؤزو ده بیر آز
- يئمکدن-زاددان تاپسین يئسین. او يان بۇ يانا گؤز گزدیریردی، بیر ده
- گؤردو کی، يولدان بیر آز آرالی بیر چوبان قويون اوتاریر. دۆشوب قێراتی اوتلاماغا
- اؤتوردو، اؤزو چوبانین يانینا گلیب دئدی:
- – چوبان قارداش، آتالار دئيیبلر کی، آجدین چوبانا، يورولدون ساربانا.
- چؤرکدن زاددان نَيین وار؟
- چوبان دئدی:
- – سۆد بولدو، آنجاق چؤرک بیر آز قوناغا لايیق دئيیل، دۆنندن قالیب
- قۇرويوب.
- کور‌اوغلو دئدی:
- – بری وئر گؤروم، زیان يوخدو. بۇ چؤلون دۆزونده نه قۇرو، نه
- يۇمشاق؟
- چوبان جانلی، قۆووتلی يئکه بیر آدام ایدی. چاناخی دا باتمان ياریم
- سۆد تۇتوردو. آمما چوبان اؤزو ده چاناقدان قالان دئيیلدی، يئکه جانلی
- بیر آدامدی. غرض، چوبان چاناغی الینه آلیب بیر نئچه قويونو ساغدی، ائله
- کی، چاناق سۆد ایله دولدو، گتیردی قويدو کور‌اوغلونون قاباغینا. چؤرک ده
- گتیریب دئدی:
- – قوناق قارداش، گرک منی باغیشلاياسان. چؤرک چوخ قۇرودو. هئچ
- بیلمه‌يیرم نئجه يئيه‌جکسن.
- چوبانین جاوابیندا کور‌اوغلو دئدی:
- – فیکیر ائله‌مه، گتیر بری. ائله آجام کی، داشدان يۇمشاق هر نه اولسا
- يئيه‌جه‌يم.
- کور‌اوغلو قۇرو چؤرکلری دوغرايیب سۆدون ایچینه تؤکدو، چاناق ایله
- آغیزبااغیز سۆد دوغراماجی ائيله‌يیب الینه ده بیر قاشیق آلیب دوغراماجین
- اۆستونه دۆشدو. دوغراماجی قاشیقلايیب بیر گؤز يۇموب-آچان واختا قارا
- بێغلارین آلتیندان کئچیرتدی. اونا کیمی قێرات دا اوتلايیب دويدو.
- کور‌اوغلو اؤز-اؤزونه فیکیر ائله‌يیب دئدی: من تۆرکمانا بۇ پالتارلا
- گئتسم يقین کی، تانیيارلار. ياخشیسی بۇدو کی، پالتاریمی چوباننان ديَیشدیریم.
- بیر آز گؤتور-قويدان سونرا پالتارینی چوبان ایله ديَیشدی. اونونلا
- الته‌من اولدو. سێچرايیب قێراتا میندی، گلیب تکه-تۆرکمانا چێخدی.
- گزدی، دولاندی، ائيوازین يئرینی ائله‌دی. بیلدی کی، بس ائيواز آتاسی قسساب
- آلی ایله سۆرودن قويون آلماغا گئدیب. قێراتی سۆروب گلدی گؤردو دوغرودان
- دا ائيوازگیل سۆرولردن قويون سئچیرلر. تئز آتدان دۆشوب اونلارا ياناشدی.
- سوروشدو کی:
- – قارداش، قويونون بیری نئچه‌يه‌دی؟
- قسساب آلی دئدی:
- – بئش ماناتدی.
- کور‌اوغلو يۆز ائرکک سئچدیردی. اون بئش ماناتدان پۇلونو وئردی. قسساب
- آلی گؤردو کی، قويونون بیرینه بئش مانات يئرینه اون بئش مانات وئریر.
- قالدی مات-مهتتل کی، بۇ نیيه بئله ائلیگیر.
- کور‌اوغلونون نه قويون گؤزونه گیریردی، نه پۇلون آرتیق وئریلمه‌سی.
- گؤزو ائيوازین اۆزونده ایدی. قۇش ککلیگی آلان کیمی گؤزو ائيوازی آلمیشدی.
- ائيواز دا بۇنو دۇيموشدو. قاش-گؤز ایله آتاسینی ایشدن خبردار ائله‌مک
- ایسته‌يیردی. آنجاق آتاسی مطلبی ایشاره‌دن آنلامیردی. بئله اولاندا آلدی
- گؤرک ائيواز نه دئدی:
- – قدم قويار هردن-هردن يئریشلر،
- بۇ قێلیقدا چودار اولماز، هاي اولماز،
- بئش-بئش دئير، اون بئش-اون بئش باغیشلار،
- بۇ قێلیقدا چودار اولماز، هاي اولماز.
- قسساب آلی دئدی:
- – بالا، چودار اولمايیب نه اولاجاق؟ گؤرونور بۇنلارین يئرینده قويون
- باهادی.
- ائيواز آتاسی‌نین جاوابیندا آلدی سؤزونون او بیری بندینی:
- مرد ایگیدلر کیمی يوللاری باسان،
- تۆلک ترلان کیمی بره‌لر پۇسان،
- بۇ يا کور‌اوغلودو، يا دلی حسن،
- بۇ قێلیقدا چودار اولماز، هاي اولماز.
- جۆنون گلدی چنلیبئلین ائلیندن،
- ائيواز بۆلبول اولدو اۇچدو گۆلوندن،
- بۇ سؤز چێخیب تئللی نیگار دیلیندن،
- بۇ قێلیقدا چودار اولماز، هاي اولماز.
- قسساب آلی ياواشجا اوغلونا دئدی:
- – سن سارساقلامیسان. بۇرا نه آشیقلیق، شاعرلیک يئریدی؟ سونرا اۆرکودرسن
- آلماز، قوي آلوئریمیزی ائله‌يک.
- کور‌اوغلو دئدی:
- – قسساب عمی، آدام قات بۇ قويونلاری مننن کؤمکلی بله‌نی
- آشیرسین، قايیتسین.
- قسساب ائيوازی چاغیریب دئدی:
- – يئری، قوناغا کؤمک ائله، قويونلاری بله‌دن آشیر.
- ائيواز کور‌اوغلو ایله برابر قويونلاری هايلادی. بله‌دن آشیردی. ائله
- کی، بله‌دن آشدیلار، کور‌اوغلو بیر دالا باخدی، گؤردو، تاي قسساب آلی اونلاری
- گؤره بیلمز، قويونلاری بۇراخدی، قۇش کیمی سێچرادی قێراتین بئلینه میندی،
- آلدی گؤرک نه دئدی:
- قاردی چنلیبئلین باشی،
- واراق، آ قسسابین اوغلو!
- گل گئدک دۆشمانا قارشی،
- دۇراق، آ قسسابین اوغلو!
- چوخ اولدوم داوادا، دويدا،
- ایگید گؤرمه‌دیم سن بويدا.
- ال وئر، بۇردا سننن سويدا
- وۇراق، آ قسسابین اوغلو!
- عجلی قويدوم بؤرکومه
- بۆروندوم چودار کۆرکومه.
- گل مین قێراتین ترکینه،
- واراق، آ قسسابین اوغلو!
- چوخدو کور‌اوغلونون ياشی،
- نه قووغالار چکیب باشی،
- ال وئر، سننن داغی داشی
- ياراق، آ قسسابین اوغلو!..
- کور‌اوغلو قێراتا آجی بیر قامچی چکدی. قێراتین بۇرنونون دئشیکلریندن
- آلوو چێخدی. يۆيه‌نی گمیریب لئي کیمی قاناتلاندی. چنلیبئله طرف
- باش آلماق ایسته‌ينده کور‌اوغلو قێرغی کیمی ائيوازین اۆستونه شێغیدی. الینی
- آتیب اونون کمریندن تۇتدو، آنجاق نه قدر قولونا زور وئردیسه، اونو
- يئریندن ترپه‌ده بیلمه‌دی کی، بیلمه‌دی. دلی کور‌اوغلو آجیقلاندی، قێزدی بیر
- دلی نره چکدی، ائيواز تیترگیب يئره يێخیلدی. بۇ دفعه الینی آتدی، قۇش کیمی
- ائيوازی گؤتوروب قێراتین ترکینه قويدو، چنلیبئل دئيیب يوللاندی.
- قسساب آلی گؤردو خئيلی کئچدی، آمما ائيواز گلمه‌دی. بیر يئلدن
- يئيین، سۇدان ایتی گئدن تۆرکمان آتی واردی. تئز اونو چکدیردی، يهرلتدی.
- کور‌اوغلونون دالینجا سۆردو. تۆرکمان آتی بوغاناغا دۆشموشدو. ایلان کیمی
- آغزینی آچیب، قۇيروغونو دیک تۇتوب دؤردنالا چاپیردی. کور‌اوغلو بیر ده
- دؤنوب گؤردو واللاه قسساب آلی بۇدو ائله گلیر کی، تاي نه دئيیم. کور‌اوغلو
- ياواشجا قێراتی ايله‌دی. قسساب آلی گلدی اونا چاتدی. گؤتوردو گؤرک نه
- دئدی:
- – عجم اوغلو، دلی چودار،
- وئرمه‌رم ائيوازی سنه!
- ائيوازسیز قلبیم قان اۇدار،
- وئرمه‌رم ائيوازی سنه!
- ائيوازدی ایگیدلر گؤزو،
- اللیسی، آلتمیشی، يۆزو،
- بۇراخ گلسین، ائشیت سؤزو،
- وئرمه‌رم ائيوازی سنه!
- سینه‌مه چکمیسن داغی،
- يول آل بۇردان، قانلی ياغی،
- بۇ گؤزومون اودلو چاغی
- وئرمه‌رم ائيوازی سنه!
- کۆللو مخلوقات يێغیلا،
- چتیندی سؤودام داغیلا،
- کیم قێيار ائيواز اوغولا؟
- وئرمه‌رم ائيوازی سنه!
- قسساب آلی قێلینج چالار،
- دۆشماندان قیصاصین آلار،
- باشین گئدر، لئشین قالار،
- وئرمه‌رم ائيوازی سنه!
- کور‌اوغلو قسساب آلینین جاوابیندا آلدی گؤرک نه دئدی:
- جانیم قسساب، گؤزوم قسساب،
- قوي آپاریم من ائيوازی!
- يئره سالما سؤزوم قسساب،
- قوي آپاریم من ائيوازی!
- ائيواز دئيیب نیگار آغلار،
- کؤيسونو چال-چارپاز داغلار.
- آپارماسام قارا باغلار،
- قوي آپاریم من ائيوازی!
- ائيوازین قارادی قاشی،
- دلیلرین اولار باشی،
- تۇتما منله تر ساواشی
- قوي آپاریم من ائيوازی!
- تۆک تؤکر مندن پاشالار،
- خوتکارلار چکر هاشالار
- تۆرکمانا ارلر باش آلار،
- قوي آپاریم من ائيوازی!
- کور‌اوغلويام، من چاپارام،
- قیيامت اولوب قوپارام،
- راضی اولما زورنان آپارام،
- قوي آپاریم من ائيوازی!
- کور‌اوغلو سؤزله دئدیگی کیمی دیلله دئدی:
- – من خوتکارلارا، پاشالارا قان اۇددوران، يوللار کسن، آلايلار باسان
- قوچ کور‌اوغلويام. منیم اؤولادیم يوخدو، گلدیم ائيوازی آپاریم،
- اؤزومه اوغول ائيله‌يیم، يئددی مین، يئددی يۆز يئتمیش يئددی دلیيه سردار
- تیکیم. گل منی دلیلرین، خانیملارین يانیندا خجالت ائله‌مه. ائيوازی
- الیمدن آلما. مندن سنه خئيیر ديَر. ائيواز دا ایسته‌دیگی واخت سنین
- يانینا گلر.
- قسساب گؤردو کی، کور‌اوغلو گۆج، خوش ائيوازی آپاراجاقدی، اؤز-اؤزونه
- دئدی:
- – گئنه خوشنان وئرسم ياخشی اولار. بئله آپارسا اوغول يئنه ائله
- منیمدی. آمما زورلا آپارسا نه اولار؟ چوخ فیکیر-خيالدان سونرا دئدی:
- – کور‌اوغلو، نامینا قێيیب ائيوازی سنین الیندن آلمیرام. آپار گئت،
- آمما گؤزون اۆستونده اولسون.
- کور‌اوغلوينان ائيواز قسساب آلی ایله گؤروشوب آيریلدیلار. قسساب آلی
- تکه-تۆرکمانا، کور‌اوغلو ایله ائيواز چنلیبئله يولا دۆشدولر.
- کور‌اوغلو ایله ائيواز چنلیبئله طرف گئتمکده اولسون، سنه کیمدن
- خبر وئریم، عرب ریحاندان. عرب ریحان تۆرکمانین وارلیلاریندان
- بیری ایدی. پهلوانلیغی دا وار ایدی. دئيیرلر کی، عرب ریحان باشیندا يۆز
- آتلی اووا چێخمیشدی. اوو ائيله‌يیب گئری قايیدیردی کی، بیردن کور‌اوغلويا راست
- گلدی. کور‌اوغلونون چنلیبئلدن گلیب تۆرکمان ائلیندن ائيوازی آپارماسینی
- قبول ائله‌يه بیلمه‌دی. ائله بیل باشینا گؤيدن بیر داش دۆشدو.
- هۆجوم ائله‌يیب باشی‌نین آداملاری ایله کور‌اوغلونون يولونو کسدی.
- بلی، کور‌اوغلو باخدی کی، دۆشمان گلیر. او، قورخمادیسا دا، آنجاق
- تکلیيه داریخدی. چندیبئل، دلیلر کور‌اوغلونون يادینا دۆشدو. بۇ دار
- واختدا اؤلوموندن قورخمايان، دۆشمانا باش ايمه‌ين، قنیملره قان
- اۇددوران ایگید، مرد دلیلرینی يانیندا گؤرمک ایسته‌دی.
- ائله بۇ فیکیرده ایدی بیر ده باخدی کی، بۇدو قاققیلداشا-قاققیلداشا
- گؤينن بیر دسته دۇرنا کئچیر. اۆرگی جۇشا گلیب آلدی گؤرک نه دئدی:
- گؤيدن گئدن بئش دۇنرالار،
- وطندن خبرین وارمی؟
- بیر-بیریندن خوش دۇرنالار
- وطندن خبرین وارمی؟
- کیم چێخاردار اولماز اويون،
- اۆستونه گؤتورمز دئيین،
- بیر قێلینجا يئددی بويون،
- کسندن خبرین وارمی؟
- کور‌اوغلو اولماز هئچ خسته
- ياغی ایستر گیره قصده،
- يئل تکی دۆشمانین اۆسته،
- اسندن خبرین وارمی؟
- کور‌اوغلو فیکیرلشیب اؤز-اؤزونه دئدی. من گؤيله گئدن بۇ قاتار دۇرنانین
- باشچیسینی وۇرسام، اوندا دۆشمانی دا باسا بیله‌جه‌يم. بۇ منیم
- اۆچون بیر سێناق اولسون. بۇنو دئيیب کامانینی چیلله‌يه میندیردی، قاتار دۇرنانین
- باشچیسینی نیشان آلدی. اوخ يايیندان چێخان کیمی دۇرنانین باشچیسی‌نین
- اۆرگی‌نین باشیندان کئچدی. باشچی دۇرنا فێرلانا-فێرلانا گؤيدن گلدی،
- قێراتین آياغی‌نین آلتینا دۆشدو. کور‌اوغلو بۇندان شاد اولدو. فال ياخشی گلمیشدی.
- قێراتدان دۆشدو، باشچی دۇرنانین تئلیندن بیر نئچه‌سینی اۆزوب
- ائيوازین پاپاغینا تاخدی. سونرا يئنه قێراتا مینیب ائيوازی دا ترکینه
- آلیب يولا دۆزلدی.
- عرب ریحان کور‌اوغلونون يولونو کسمیشدی. کور‌اوغلونون آغزی دۆشموشدو
- قورخونج بیر اۇچوروما. اۇچورومون دؤرد بیر يانی ائله سێلدیریم
- قايالیق، داشلیق ایدی کی، قۇش قۇشلوغو ایله کئچه بیلمزدی. کور‌اوغلو بیر اۇچوروما
- باخدی، بیر ترکینده‌کی ائيوازا باخدی، بیر ده اونو دفعه‌‌لرله اؤلومدن،
- مۆحاصیره‌‌دن خانلارین، پاشالارین چنگیندن قۇرتاران قێراتا باخدی،
- آلدی گؤرک نه دئدی:
- آرخام قاری دۆشمان، قاباغیم اۇچروم،
- آپار چنلیبئله منی، قێراتیم!
- سنه سێغینمیشام، قۇرتار بۇ داردان،
- آپار چنلیبئله منی، قێراتیم!
- اولور چنلیبئلین صؤحبتی، سازی،
- گلیر گۇمراه کئچیر باهاری، يازی،
- آلمیشام ترکیمه ایگید ائيوازی،
- آپار چنلیبئله منی، قێراتیم!
- کور‌اوغلو اميی گئتمه‌سین زايا،
- گرک قان اۇددورام بَيه، پاشايا،
- سێچرايیب قۇش کیمی آتیل او تايا،
- آپار چنلیبئله منی، قێراتیم!
- کور‌اوغلو قێراتی جؤولانا گتیردی، سسلندی. قێرات دؤرد آياغینی يێغیب
- اؤزونو يێغیشدیردی، قێزیل قۇش کیمی سێچرادی، اۇچورومون او تايینا دۆشدو. قێرات
- ائله سێچرادی کی، کور‌اوغلونون باشیندا پاپاغی دا ترپنمه‌دی. عرب ریحان
- بۇنا تاماشا ائله‌يیردی. او ائله فیکیر ائله‌يیردی کی، قێرات بۇ اۇچورومدان
- سێچرايا بیلمه‌يه‌جک. باشینداکی يۆز آتلی ایله هۆجوم ائله‌يیب کور‌اوغلونو
- تۇتاجاق، اؤزونون ده قوللارینی باغلايیب تۆرکمانا آپاراجاق. قێرات کی،
- اۇچورومو ائله سێچرادی، عرب ریحان بۇندان حسابینی آپاردی. قارنینا
- سانجی دۆشدو. آنجاق بۇنو باشینداکی آتلیلارا بیلدیرمه‌دی. بیر نره چکیب
- يۆز آتلی ایله دولاما يولدان کئچیب کور‌اوغلونون اۆستونه گلدی. کور‌اوغلو
- دؤنوب گئری باخدی، گؤردو عرب ریحان باشینداکی آتلیلارلا اونون دالینجا
- گلیر. کور‌اوغلو قێراتین باشینی چکدی، گئری دؤندو عرب ریحانین يانینا
- قايیتدی، آلدی گؤرک نه دئدی:
- ياغی دۆشمانین حربه‌سی
- قاچیرتماز مئيداننان منی.
- قورخاق مۆخننت ضربه‌‌سی
- قاچیرتماز مئيداننان منی.
- گیررم مئيدانا ار کیمی،
- دۇررام قاباقدا نر کیمی،
- دۆشمان بويلانار خر کیمی،
- قاچیرتماز مئيداننان منی.
- هردن بره‌ده ياتارام،
- اورتادا شئشپر آتارام،
- پاشانی دیری تۇتارام،
- قاچیرتماز مئيداننان منی.
- عالمه بللی هۆنریم،
- چنلیبئلده دلیلریم،
- مرد ایگیده پئشکش سریم
- قاچیرتماز مئيداننان منی.
- کور‌اوغلويام، بۇدو دۆزو،
- جومردین سرت اولار اۆزو.
- مۆخننتین تنه سؤزو
- قاچیرتماز مئيداننان منی!
- کور‌اوغلو سازلا دئدیگی کیمی سؤزله ده دئدی:
- – عرب ریحان، من پاشالارا، بَيلره، خانلارا قان اۇددوران کور‌اوغلويام.
- من سنین کیمی آداملاردان قورخمارام. آنجاق سنین بۇ
- آداملارینا يازیغیم گلیر. اونلاری ناحاق يئره قێردیریب قانلارینا باعث
- اولما. منیمله داوا ائتمک ایسته‌يیرسن بۇيور، بۇ مئيدان، بۇ شیطان.
- مرد ایگید داوادا باشی‌نین آدامینی قێردیرماز.
- کور‌اوغلو بۇ سؤزلردن سونرا گئنه ده اؤزونو ساخلايا بیلمه‌يیب اۆچ
- تئللی سازی دؤشونه باسدی. قێراتی جؤولانا گتیریب دئدی:
- مردسنسه گل، عرب ریحان
- ساواشاق ایندی سننن من!
- گؤر گۆجومو ائيله هاشا،
- ساواشاق ایندی سننن من!
- گؤتوررم الیمه نیزه،
- مردلر احسن دئسین بیزه،
- دۇراق مئيداندا اۆز-اۆزه
- ساواشاق ایندی سننن من!
- دئمه منه بۇ هديانین،
- يقین بیل کی، آللام جانین،
- قێلینجلا تؤکرم قانین،
- ساواشاق ایندی سننن من!
- گرک دوست دۆشمانیم سئچم،
- چتین اولار قورخام، قاچام،
- ایسته‌رم کی، مئيدان آچام،
- ساواشاق ایندی سننن من!
- کور‌اوغلويام، دۇرموشام مرد،
- يامان اۆره يه دۆشسون درد،
- ایگیدسنسه، اول مئيدانگرد،
- ساواشاق ایندی سننن من!
- بلی، داوا باشلاندی. اولجه اولار ائله آت اۆستونده مئيدانا گیردیلر.
- بیر-بیرینه نیزه آتدیلار، قێلینج وۇردولار، نه قدر حیله ایشلتدیلرسه، بیر
- کاش آشمادی.
- کور‌اوغلو گؤردو يوخ، عرب ریحان ائله بالاجا جاناوار دئيیل، بئله‌لیکله
- بیر شئي چێخماياجاق. آتدان دۆشوب، قوللارینی چێرمادی. پالتارلاری‌نین
- اتکلرینی بئلینه سانجیب مئيدانی دولانماغا باشلادی. بلی، عرب ریحان
- دا آتدان دۆشدو. هر ایکیسی پیيادا اولوب گۆلشمه‌يه باشلادیلار. چوخ
- گۆلشدیلر، بیر-بیرینی کوتان کیمی يئرده سۆروب، مئيدانی قارالتدیلار.
- گئنه ده بیر مۇراد حاصیل اولمادی.
- آخیردا دلی کور‌اوغلو ائله بیر نره چکدی کی، بۆتون داغلار، داشلار سسه
- گلدی. عرب ریحانین آداملاری ایچینه قێرغی گیرمیش تويوق جۆجه‌لری کیمی
- پرن-پرنه دۆشوب هامیسی قاچیب داغیلدی. عرب ریحانین قۇلاقلاری باتدی.
- کور‌اوغلو اونو باشینا قالدیریب يئره وۇردو، سینه‌سینه چؤکوب خنجرینی بوغازینا
- دايادی. عرب ریحان بیر دفعه ده اولسون نه دینمه‌دی، نه آغلامادی، نه
- ده آمان ایسته‌مه‌دی. کور‌اوغلو خنجری يئرینه قويوب آياغا دۇردو.
- دئيیرلر کی، کور‌اوغلو چوخ مرد ایمیش. آغلامايان، يالوارمايان
- دۆشمانی اؤلدورمزمیش. عرب ریحانی دا مردلیگینه گؤره اؤلدورمه‌دی،
- باغیشلادی. عرب ریحان مین انوای-مۆسیبت ایله آياغا دۇردو. قولو، قێچی
- ازیلمیش، هايتیيا-هايتیيا بیر تهر کی، آتینا مینیب تۆرکمانا طرف يولا
- دۆشدو. قوچ کور‌اوغلو دا ائيوازی ترکینه آلیب چنلیبئله يول باشلادی.
- نیگار خانیم چوخداندی کی، کور‌اوغلونون يولونو گؤزله‌يیردی. وعده‌‌سیندن
- چوخ کئچمیشدی، کور‌اوغلو هله گلیب چێخمامیشدی. بیر گۆن يئنه
- نیگار بیر هۆندور تپه‌ده دۇروب يوللارا باخیردی. بیر ده گؤردو نه، يوللاردا،
- توز-دۇمانا، دۇمان توزا قاریشدی، دقت ائله‌يیب گؤردو کور‌اوغلو
- قێراتین اۆستونده، ترکینده ده ائيواز بۇدو گلیر. نیگار خانیم تپه‌دن
- يئنیب دلیلرین يانینا قاچدی، آلدی گؤرک نه دئدی:
- آت بئلینده قوچ دلیلر،
- ائيوازی پیشواز ائله‌يین
- بیر-بیریندن خوش دلیلر،
- ائيوازی پیشواز ائله‌يین.
- ائيوازیم بنزر لاچینا،
- توووزلار حئیران ساچینا،
- وئرمه‌رم چینه، ماچینا،
- ائيوازی پیشواز ائله‌يین.
- دولون لیباسا، ياراغا،
- آتلیلار گئتسین سوراغا،
- قويمارام گؤزدن ایراغا،
- ائيوازی پیشواز ائله‌يین.
- کور‌اوغلو اوخونو قۇروب،
- سئویب، سئچیب، ترلان وۇروب،
- قێراتین ترکینده دۇروب،
- ائيوازی پیشواز ائله‌يین.
- کۆللی مخلوقات يێغیلی،
- پايلايین قندی، نوغولو،
- کور‌اوغلونون قوچ اوغولو،
- ائيوازی پیشواز ائله‌يین.
- قوچ دلیلر، آچین قانات،
- دۆزلدین مجلیس، توي، بۆسات،
- گؤتورون لیباس، قێلینج، آت،
- ائيوازی پیشواز ائله‌يین.
- اوردو باسان، قالا يێخان،
- پنجه‌سینده پلنگ سێخان،
- قنیمینه قارشی چێخان،
- ائيوازی پیشواز ائله‌يین.
- خوش دانیشان، شیرین گۆلن،
- مجلیس آپارماغین بیلن،
- دلیلره سردار گلن،
- ائيوازی پیشواز ائله‌يین.
- آتی گتیرر جؤولانا،
- اوخ آتار نامرد دۆشمانا،
- نیگار دا ائيوازا آنا،
- ائيوازی پیشواز ائله‌يین.
- نیگار خانیمین سؤزو ایله يئددی مین يئددی يۆز يئتمیش يئددی دلی آت
- بئلینه دولدو. آت، قێلینج، خلت گؤتوروب کور‌اوغلو ایله ائيوازی پیشواز ائله‌دیلر.
- گؤروشدولر، دانیشدیلار، شادلیق مجلیسی قۇرولدو. قويونلار کسیلدی،
- اتلر دوغراندی، کابابلار يئيیلدی، ایچکیلر ایچیلدی. گۆلدولر، اوينادیلار،
- اوخودولار، داماخلار دۇرولدو، کئفلر آچیلدی. نیگار ائيوازین اۆزوندن اؤپدو،
- کؤينيی‌نین ياخاسیندان کئچیردیب اؤزونه اوغول ائله‌دی.
قایناق‌لار
- Azadliq . org